އެމެރިކާ އިން ކުރިއަށް ގެންދިޔަ މަސްތުވާ ތަކެތީގެ އޮޕަރޭޝަނެއްގައި ތިން މީހަކު މަރާލައިފި

އިރުމަތީ ޕެސިފިކް ކަނޑުގެ ސަރަހައްދުގައި މަސްތުވާ ތަކެތީގެ ވިޔަފާރި ކުރާ އޮޕަރޭޝަނެއްގައި ބައިވެރިވި އުޅަނދަކަށް އެމެރިކާގެ އަސްކަރިއްޔާ އިން ހަމަލާދީ، އެ އުޅަނދުގައި ތިބި ތިން މީހަކު މަރާލާފައިވާ ކަމަށް އެމެރިކާގެ އަސްކަރިއްޔާ އިން ހާމަ ކޮށްފި އެވެ.

މި ހާދިސާ ހިނގާފައި ވަނީ ހުކުރު ދުވަހު ކަމަށް ރޮއިޓާސް ނިއުސް އެޖެންސީ އިން ވަނީ ރިޕޯޓު ކޮށްފަ އެވެ.

އެމެރިކާގެ އަސްކަރިއްޔާ އިން ނެރުނު ބަޔާނެއްގައި ބުނެފައި ވަނީ، މި އޮޕަރޭޝަން ހިންގާފައި ވަނީ ކަނޑު މަގުން މަސްތުވާ ތަކެތި އެތެރެ ކުރުން ހުއްޓުވުމަށް ކުރިއަށް ގެންދާ މަސައްކަތް ތަކުގެ ތެރެއިން ކަމަށެވެ. އަދި ހަމަލާދިން އުޅަނދަކީ މަސްތުވާ ތަކެތީގެ ވަގުފާރި ކުރުމުގައި އަމަލީ ގޮތުން ބައިވެރިވަމުން ދިޔަ އުޅަނދެއްކަން ޔަގީން ކުރެވިފައިވާ ކަމަށް ވެސް އެމެރިކާގެ އަސްކަރިއްޔާ އިން ބުނެފައިވެ އެވެ.

މި ހާދިސާގައި މަރުވި ތިން މީހުންނަކީ ކޮން ގައުމަކަށް ނިސްބަތްވާ ބައެއްކަން، ނުވަތަ އެއީ ކޮން ބައެއްކަން އެމެރިކާގެ އަސްކަރިއްޔާ އިން މިހާތަނަށް ހާމަ ކޮށްފައި ނުވެ އެވެ. މީގެ އިތުރުން، އެ އުޅަނދުން އަތުލައި ގަނެވުނު މަސްތުވާ ތަކެތީގެ ބާވަތާއި އަދި މިންވަރާ ގުޅޭ އިތުރު ތަފްސީލެއް ވެސް މިހާތަނަށް އާންމު ކޮށްފައި ނުވެ އެވެ.

އިރުމަތީ ޕެސިފިކް ސަރަހައްދަކީ ދެކުނު އެމެރިކާގެ ގައުމު ތަކުން އުތުރު އެމެރިކާ އަށް މަސްތުވާ ތަކެތި އެތެރެ ކުރުމަށް ވަގުފާރިވެރިން އާންމުކޮށް ބޭނުން ކުރާ މަގަކަށް ވުމާއެކު، އެމެރިކާގެ ކޯސްޓުގާޑާއި އަސްކަރިއްޔާ އިން އެ ސަރަހައްދުގައި އަބަދު ވެސް ހާއްސަ އޮޕަރޭޝަންތައް ކުރިއަށް ގެންދެ އެވެ. މިފަދަ އޮޕަރޭޝަން ތަކުގައި ބައެއް ފަހަރު ކުރިމަތިލުންތައް ހިނގައި މީހުން މަރުވުމުގެ ހާދިސާތައް މީގެ ކުރިންވެސް ހިނގާފައިވެ އެވެ.

މި ހާދިސާއާ ގުޅިގެން ކުރަން ޖެހޭ އިތުރު ތަހުގީގުތައް އެމެރިކާގެ ކަމާ ބެހޭ އިދާރާ ތަކުން މިހާރު ދަނީ ކުރަމުންނެވެ. އަދި މި އޮޕަރޭޝަންއާ ގުޅޭ އިތުރު މައުލޫމާތު ކުރިއަށް އޮތް ތަނުގައި ހާމަ ކުރާނެ ކަމަށް ބެލެވެ އެވެ.