ހަނގުރާމަ ހުއްޓާލުމުގެ އެއްބަސްވުން ހުރިހާ ފަރާތަކުން ގަބޫލުކުރާތާ 24 ގަޑިއިރު ތެރޭ އެއަށް އަމަލު ކުރަން ފެށޭނެ: ލުބުނާނުގެ ރައީސް

ލުބުނާނުގެ ރައީސް ޖޯސެފް އައުން ބުރާސްފަތި ދުވަހު އެ ގައުމުގެ މީޑިއާތަކަށް މައުލޫމާތު ދެއްވަމުން ވިދާޅުވީ، އެމެރިކާ މެދުވެރިވެގެން ލުބުނާނާއި އިޒްރޭލާ ދެމެދު އެއްބަސްވެފައިވާ ހަމަލާބަދަލުކުރުން ހުއްޓާލުމުގެ އެއްބަސްވުން ކަމާބެހޭ ހުރިހާ ފަރާތްތަކުން ގަބޫލުކޮށްފިނަމަ، 24 ގަޑިއިރު ނުވަނީސް އެ އެއްބަސްވުމަށް އަމަލުކުރަން ފެށޭނެ ކަމަށެވެ.

ރައީސް އައުންގެ މި ވާހަކަފުޅުތަކަކީ ލުބުނާނުގެ ހަތިޔާރުއެޅި ޖަމާއަތް ކަމަށްވާ ހިޒްބުالله އަށް އިޝާރާތް ކުރައްވައި ދެއްކެވި ވާހަކަފުޅުތަކެއް ކަމަށް ބެލެވެއެވެ. ވޮޝިންޓަނުގައި ލުބުނާނާއި އިޒްރޭލާ ދެމެދު ކުރެވުނު މަޝްވަރާތަކަށްފަހު އިއުލާންކުރި މި އެއްބަސްވުމާ ގުޅޭގޮތުން ހިޒްބުالله އިން އަދި އެއްވެސް އެއްޗެއް ބުނެފައެއް ނުވެއެވެ. ހިޒްބުالله އިން ދަނީ ދެ ގައުމުގެ ދެމެދުގައި ކުރެވޭ ސީދާ މަޝްވަރާތަކާ ދެކޮޅު ހަދައި، ލުބުނާނުގައި ތިބި އިޒްރޭލް ސިފައިންނަށް ހަމަލާދެމުންނެވެ. ހަމައެއާއެކު، އިޒްރޭލުން ވެސް ދަނީ ލުބުނާނަށް ހަމަލާތައް ދެމުންނެވެ. އީރާނުގެ ހަނގުރާމައާ ގުޅިގެން އުފެދުނު މި ހަމަނުޖެހުންތައް ނިމުމަކަށް ގެނައުމަށް ވޮޝިންޓަނުގައި ކުރެވުނު މަޝްވަރާތަކަށްފަހު، ހަމަލާބަދަލުކުރުން ހުއްޓާލުމަށް އެއްބަސްވެފައިވާ ކަމަށް ލުބުނާނާއި އިޒްރޭލުން ބުދަ ދުވަހު ވަނީ ބުނެފައެވެ.

އެމެރިކާއާއެކު ނެރުނު ގުޅިފައިވާ ބަޔާނެއްގައިވާ ގޮތުން، މި އެއްބަސްވުން ދެމިއޮންނާނީ އީރާނަށް ތާއީދުކުރާ ހިޒްބުالله ޖަމާއަތުން ހަމަލާދިނުން މުޅިން ހުއްޓާލައި، ސައުތު ލިޓާނީ ސަރަހައްދުން އެ ޖަމާއަތުގެ ހުރިހާ ހަނގުރާމަވެރިން ފޭބުމުންނެވެ.

އެ ބަޔާނުގައި ބުނެފައިވަނީ، އެމެރިކާގެ އިރުޝާދުގެ ދަށުން، ދައުލަތުގެ ބާރު ނުހިނގާ އެއްވެސް ފަރާތެއްގެ ނުފޫޒެއް ނެތް ގޮތަށް، ލުބުނާނުގެ އަސްކަރިއްޔާގެ ފުރިހަމަ ކޮންޓްރޯލް އޮންނަ "ޕައިލެޓް ޒޯން" ތަކެއް އުފެއްދުމުގެ މަސައްކަތް އަވަސްކުރުމަށް ދެ ގައުމުން އެއްބަސްވެފައިވާ ކަމަށެވެ.

މީގެ ކުރިން އޭޕްރީލް މަހު ވެސް އިސްރާއީލާއި ލުބުނާނުން ހަމަލާބަދަލުކުރުން ހުއްޓާލުމަށް އެއްބަސްވެ، މޭ މަހު އެ އެއްބަސްވުމުގެ މުއްދަތު އިތުރުކުރި ނަމަވެސް، ހަމަނުޖެހުންތަކަށް ހުއްޓުމެއް އައިސްފައެއް ނުވެއެވެ.

ލުބުނާނުގެ ސަލާމަތީ ބާރުތަކުން މައުލޫމާތުދޭ ގޮތުގައި، ބުދަ ދުވަހު އިސްރާއީލުން ދިން ޑްރޯން ހަމަލާތަކެއްގައި ލުބުނާނުގެ ދެކުނުން މަދުވެގެން ހަ މީހަކު މަރުވެފައިވާއިރު، ބޭރޫތުގެ ދެކުނުން ދަތުރުކުރި ކާރަކަށް ވެސް ވަނީ ހަމަލާދީފައެވެ. އިސްރާއީލުން ބުނީ ހިޒްބުالله އިން ފޮނުވާލި ކަމަށް ބެލެވޭ ހަމަލާއެއް ދިފާއުކޮށްފައިވާ ކަމަށެވެ.

އެމެރިކާ މެދުވެރިވެގެން ހޯމަ ދުވަހު އިއުލާންކުރި އެއްބަސްވުމާއެކު، ހިޒްބުاللهގެ ކޮންޓްރޯލް އޮންނަ ބޭރޫތުގެ ދެކުނު ސަރަހައްދުތަކަށް އިސްރާއީލުން ދެމުންދިޔަ ހަމަލާތައް މަޑުޖައްސާލާފައިވާއިރު، އީރާނުގެ ތާއީދު އޮންނަ ހިޒްބުالله އިން ވެސް ވަނީ ބޯޑަރު ހުރަސްކޮށް ދެމުންދިޔަ ހަމަލާތައް ހުއްޓާލާފައެވެ.

ތެހެރާނަށް ތާއީދުކޮށް ހިޒްބުالله އިން ބޯޑަރު ހުރަސްކޮށް ހަމަލާދޭން ފެށުމާ ގުޅިގެން، އެ ޖަމާއަތް ނައްތާލުމަށް އިސްރާއީލުން ލުބުނާނަށް އަރައިގަތީ މާރިޗު މަހުގެ ތެރޭގައެވެ.

އީރާނުން ބުނެފައިވަނީ، ފެބްރުއަރީ މަހުގެ ފަހުކޮޅު އެމެރިކާ އާއި އިސްރާއީލުން ފެށި މި ހަމަނުޖެހުންތައް ނިމުމަކަށް ގެނައުމުގެ އެއްބަސްވުމެއްގައި، ލުބުނާނުގައި ހަމަލާބަދަލުކުރުން ހުއްޓާލުން ނުހިމެނޭ ނަމަ އެއްބަސްނުވާނެ ކަމަށެވެ.

އިތުބާރު އުފެއްދުމަށާއި ހައްލުނުވެ ހުރި އެހެނިހެން މައްސަލަތައް ނިންމުމަށްޓަކައި، ސީދާ މަޝްވަރާތައް ކުރިއަށް ގެންދިއުމަށް ލުބުނާނާއި އިސްރާއީލުން ބުދަ ދުވަހު ވަނީ އެއްބަސްވެފައެވެ.

ބަޔާނުގައިވާ ގޮތުން، ފުރިހަމަ އެއްބަސްވުމަކަށް އައުމުގެ މަގްސަދުގައި، ސިޔާސީ އަދި ސަލާމަތީ ކަންކަމާ ގުޅޭ މަޝްވަރާތައް ބޭއްވުމަށް ޖޫން މަހުގެ 22 ވަނަ ދުވަހު ފެށޭ ހަފުތާގައި ދެ ގައުމުގެ މަންދޫބުން އަލުން ބައްދަލުކުރާނެއެވެ.