ވޭންސް އާއި ރޫބިއޯ ވާދަކުރަންވީ އެކުގައި، ބަލި ކުރަން އުނދަގޫ ވާނެ: ޓްރަމްޕް

އެމެރިކާގައި 2028 ވަނަ އަހަރު އޮންނަ ރިޔާސީ އިންތިޚާބުގައި މިހާރުގެ ނައިބު ރައީސް ޖޭޑީ ވޭންސް އާއި، ސެކްރެޓަރީ އޮފް ސްޓޭޓް މާކޯ ރޫބިއޯ އެއް ޓިކެޓެއްގައި ވާދަކުރަން ފެނިވަޑައިގަންނަވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ބުދަ ދުވަހު ނިއު ޔޯކް ޕޯސްޓްގެ ޕޮޑް ފޯސް ވަން ޕޮޑްކާސްޓުގައި ޓްރަމްޕް ވިދާޅުވީ، ވޭންސް އާއި ރޫބިއޯ އެކުގައި ވާދަ ކުރުން ވަރަށް ރަނގަޅު ވާނެ ކަމަށެވެ. ނަމަވެސް، ރައީސް ކަމަށް ވާދަ ކުރަންވީ ކޮން ބޭފުޅެއް ކަމެއް ޓްރަމްޕް ވިދާޅެއް ނުވެ އެވެ. ޓިކެޓުގައި ރައީސް ކަމަށް ނިކުންނަވަންވީ ކޮން ބޭފުޅެއްތޯ ސުވާލު ކުރުމުން ޓްރަމްޕް ވިދާޅުވީ، ދެ ބޭފުޅުން ދެކެ ވެސް އޭނާ ލޯބިވާ ކަމަށާއި، ދެ ބޭފުޅުން ވެސް އެކުގައި ހުންނެވުމަށް އެދޭ ކަމަށެވެ. 

މިހާރު ޓްރަމްޕްގެ ނައިބު ރައީސްގެ ގޮތުގައި ހުންނެވި ވޭންސް އަކީ، ކުރިއަށް އޮތް އިންތިޚާބުގައި ވެރިކަން ކުރާ ރިޕަބްލިކަން ޕާޓީގެ ޓިކެޓުގައި ރައީސް ކަމަށް ވާދަ ކުރައްވާނެ ކަމަށް އެންމެ ބޮޑަށް ބެލެވޭ ބޭފުޅާ އެވެ. ނަމަވެސް، ވޭންސް އަށް ފުރިހަމަ އަށް ތާއީދު ކުރައްވާ ކަމެއް މިހާތަނަށް ޓްރަމްޕް ހާމަ ކުރައްވާފައި ނުވެ އެވެ. އޭގެ ބަދަލުގައި ޓްރަމްޕް ގެންދަވަނީ، ޖަވާބު ތަކުން އިތުރު ސުވާލު ތަކެއް ކުރިމަތި ވާނެ ފަދަ ގޮތަކަށް ވާހަކަ ދައްކަވަމުންނެވެ. 

ރިޕޯޓު ތަކުގައި ބުނެފައިވާ ގޮތުން، ރިޕަބްލިކަން ޕާޓީގެ ކެންޑިޑޭޓަކަށް އެންމެ ރަނގަޅު ވާނީ ކޮން ބޭފުޅެއްތޯ ޓްރަމްޕް އޭނާގެ އަރިސް ބޭފުޅުން ގާތު އައްސަވަ އެވެ. އަދި އެކި ފަރާތް ތަކުގެ ޚިޔާލު އޭނާ ހޯއްދަވަމުން ގެންދަވާ ކަމަށް ފާހަގަ ކޮށްފައިވެ އެވެ. އެގޮތުން ނައިބު ރައީސް ވޭންސް އާއި، ސެކްރެޓަރީ އޮފް ސްޓޭޓް ރޫބިއޯގެ ތެރެއިން، ރިޔާސީ ޓިކެޓު ދިނުން ރަނގަޅީ ކޮން ބޭފުޅެއްތޯ ޓްރަމްޕް ވަރަށް ގިނައިން އައްސަވާ ކަމަށް ވަނީ ފާހަގަ ކޮށްފަ އެވެ. 

މިކަމާ ގުޅިގެން އަބަދު ވެސް ޓްރަމްޕް އަށް ގިނަ ސުވާލު ތަކެއް ކުރިމަތި ކުރުވަ އެވެ. އެންމެ ފަހުން ބުދަ ދުވަހު ޓްރަމްޕް ވިދާޅުވީ، ވޭންސް އާއި ރޫބިއޯ އެއް ޓިކެޓެއްގައި ގުޅިގެން ވާދަ ކުރައްވަން ފެނިވަޑައިގަންނަވާ ކަމަށެވެ. އަދި އެ ފަދަ ޙާލަތެއްގައި އެ ދެ ބޭފުޅުން ބަލި ކުރުމަކީ ވަރަށް އުނދަގޫ ކަމަކަށް ވާނެ ކަމުގައި ޓްރަމްޕް ފާހަގަ ކުރެއްވި އެވެ. އެގޮތުން ޓްރަމްޕް ވިދާޅުވީ، ވޭންސް އާއި ރޫބިއޯގެ ޓީމު ވެގެންދާނީ ވަރަށް ވަރުގަދަ ޓީމަކަށް ކަމަށެވެ. 

މީގެ އިތުރުން ޓްރަމްޕް ވިދާޅުވީ، ވޭންސް އާއި ރޫބިއޯ އަކީ ވަރަށް ގިނަ ގޮތް ގޮތުން އެއްގޮތް ދެ ބޭފުޅުން ކަމަށެވެ. އަދި އެ ދެ ބޭފުޅުންގެ ގުޅުން ވެސް ވަރަށް ރަނގަޅު ކަމަށް ޓްރަމްޕް ވިދާޅުވި އެވެ. ނަމަވެސް، ވަކި ނިންމުމެއް ނިންމަން ވަރަށް ވަގުތު އެބަ އޮތް ކަމަށާއި، އެއް ޓިކެޓެއްގައި ވާދަ ކުރުމަށް ވޭންސް އާއި ރޫބިއޯ އެއްބަސް ވާން ޖެހޭ ކަމަށް ޓްރަމްޕް ވަނީ ވިދާޅުވެފަ އެވެ. ޓްރަމްޕްގެ ރިޔާސީ ދެ ވަނަ ދައުރުގައި އެންމެ ނުފޫޒު ގަދަ ދެ ބޭފުޅުންނަކީ ވޭންސް އާއި ރޫބިއޯ ކަމަށްވާއިރު، ޓްރަމްޕް ވިދާޅުވީ އެ ދެ ބޭފުޅުންނަކީ ވެސް ވަރަށް ހުނަރުވެރި އަދި މޮޅު ދެ ބޭފުޅުން ކަމަށެވެ. 

މިހާރު ޓްރަމްޕް ފުރުއްވަމުން ގެންދަވަނީ އޭނާގެ ވެރި ކަމުގެ ދެ ވަނަ ދައުރު ކަމަށްވާއިރު، އިތުރު ދައުރަކަށް ކުރިމަތި ލުމުގެ ފުރުސަތެއް ޓްރަމްޕް އަކަށް ނޯންނާނެ އެވެ. އެހެންކަމުން، 2028 ވަނަ އަހަރުގެ އިންތިޚާބުގައި ރިޕަބްލިކަން ޕާޓީގެ ފަރާތުން ވާދަ ކުރައްވާނީ އައު ކެންޑިޑޭޓެކެވެ.