ޓްރަމްޕްގެ ބަރުދަނުގައި 108 ކިލޯ، ބަރުދަން ލުއި ކުރަން ޑޮކްޓަރުން އިރުޝާދު ދީފި

އެމެރިކާގެ ރައީސް ޑޮނަލްޑް ޓްރަމްޕްގެ ސިއްހީ ހާލަތު ވަރަށް ރަނގަޅު ކަމަށާއި، ނަމަވެސް ހަށިގަނޑުގެ ބަރުދަން ލުއި ކުރުމަށް ޑޮކްޓަރުން އިރުޝާދު ދެއްވާފައިވާ ކަމަށް ވައިޓް ހައުސް އިން ހުކުރު ދުވަހު ހާމަ ކޮށްފި އެވެ.

އަންނަ ޖޫން މަހުގެ 14 ވަނަ ދުވަހު 80 އަހަރު ފުރޭ ޓްރަމްޕްގެ އަހަރީ މެޑިކަލް ޗެކަޕް ހަދާފައިވަނީ ވޮޝިންޓަންއާ ކައިރީގައި އޮންނަ ވޯލްޓާ ރީޑް މިލިޓަރީ ހޮސްޕިޓަލުގަ އެވެ.

ޓްރަމްޕްގެ ސިއްހީ ހާލަތާ ގުޅޭ ގޮތުން ޔޫއެސް ނޭވީގެ ކެޕްޓަން ޑޮކްޓަރު ސޯން ބާބަބެލާ ނެރުއްވި ތިން ސަފުހާގެ ރިޕޯޓުގައި ބުނެފައި ވަނީ، ރައީސް ޓްރަމްޕްގެ ހިތާއި، ފުއްޕާމެޔާއި، ނާރުގެ ނިޒާމުގެ އިތުރުން ޖިސްމާނީ ހުރިހާ މަސައްކަތް ތަކެއް ހުރީ ވަރަށް ވަރު ގަދަކޮށް ކަމަށެވެ. އަދި ގައުމުގެ އެންމެ މަތީ ވެރިޔާގެ ހައިސިއްޔަތުން އަދާ ކުރަން ޖެހޭ ހުރިހާ މަސްއޫލިއްޔަތެއް އަދާ ކުރުމަށް އޭނާ ފުރިހަމަ އަށް ފިޓް ކަމަށް ޑޮކްޓަރު ވަނީ ކަނޑަ އަޅުއްވާފައި އެވެ.

މި ރިޕޯޓުގައިވާ ގޮތުން އިސްކޮޅުގައި ހަ ފޫޓު ތިން އިންޗި ހުންނަ ޓްރަމްޕްގެ ބަރުދަނަކީ މިހާރު 108 ކިލޯ ގްރާމް އެވެ. މިއީ މިދިޔަ އަހަރުގެ އޭޕްރީލް މަހު ހެދި މެޑިކަލްއާ އަޅާ ބަލާއިރު، 6.4 ކިލޯ ގްރާމްގެ އިތުރު ވުމެކެވެ. އެހެންކަމުން ކެއުމަށް ބަދަލު ގެނައުމަށާއި، ކަސްރަތު އިތުރު ކުރުމަށް ޑޮކްޓަރު ވަނީ ލަފާ ދެއްވާފަ އެވެ. ނަމަވެސް ޓްރަމްޕްގެ އުމުރު އޭނާގެ އަސްލު އުމުރަށް ވުރެ 14 އަހަރު ހަގު ކަމަށް ޑޮކްޓަރު ފާހަގަ ކުރެއްވި އެވެ. މީގެ އިތުރުން ސިކުނޑީގެ ގާބިލުކަން ދެނެގަތުމަށް ހެދި ޓެސްޓުން ޓްރަމްޕް ވަނީ 30 އަކުން 30 މާކްސް ހޯއްދަވާފައި އެވެ.

ޓްރަމްޕްގެ އަތްޕުޅުގައި ނޫފައިގަނެފައި ހުންނަ މައްސަލައާ ގުޅޭ ގޮތުން ރިޕޯޓުގައި ބުނެފައި ވަނީ، އެއީ ގިނަ ގިނައިން މީހުންނާ ސަލާމް ކުރުމުގެ ސަބަބުން މަޑު ޓިޝޫ ތަކަށް ލިބޭ ކުދި އަނިޔާ ތަކެއް ކަމަށެވެ. ޓްރަމްޕް އަކީ ހިތުގެ ބަލި ތަކުން ރައްކާތެރި ވުމަށް އެސްޕިރިން ބޭނުން ކުރައްވާ ބޭފުޅަކަށް ވާތީ، މިފަދަ އަނިޔާ ތަކުގެ ސަބަބުން ލޭ ހީލިވުން ނުވަތަ ނޫފައިގަތުން އަވަސްވާ ކަމަށް ޑޮކްޓަރު ވިދާޅުވި އެވެ. މީގެ އިތުރުން ޓްރަމްޕްގެ ފައި ދުޅަވާ މައްސަލަ އަކީ، "ކްރޮނިކް ވެނަސް އިންސަފިޝަންސީ" ނަމަކަށް ކިޔާ، ލޭ ނާރު ތަކުގެ މައްސަލައެއްގެ ސަބަބުން ދިމާވާ ކަމެއް ކަމަށް ވައިޓް ހައުސް އިން ވަނީ ކުރިން ހާމަ ކޮށްފައި އެވެ.

މީގެ އިތުރުން 2024 ވަނަ އަހަރުގެ ރިޔާސީ އިންތިޚާބުގެ ކެމްޕެއިންގައި ޕެންސިލްވޭނިއާގައި ބޭއްވި ރެލީއެއްގެ ތެރެއިން ޓްރަމްޕް އަވަހާރަ ކޮށްލަން ދިން ބަޑީގެ ހަމަލާގައި އޭނާގެ ކަނާއަތު ކަންފަތަށް ލިބުނު އަނިޔާގެ ލަކުނު އަދި ވެސް ހުރިކަން މި ރިޕޯޓުގައި ފާހަގަ ކޮށްފައިވެ އެވެ. ޓްރަމްޕް މި މެޑިކަލްއާ ގުޅޭ ގޮތުން ސޯޝަލް މީޑިއާގައި ވިދާޅުވީ އޭނާގެ ސިއްހީ ހާލަތު ހުރީ "އެންމެ ފުރިހަމަ" އަށް ކަމަށެވެ.

މި ރިޕޯޓު އާންމު ކޮށްފައި މި ވަނީ ޓްރަމްޕްގެ ސިއްހީ ހާލަތާ މެދު ސުވާލު ތަކެއް އުފެދިފައިވާ ދަނޑިވަޅެއްގައި އެވެ. ހާއްސަކޮށް ބައެއް ބައްދަލުވުން ތަކުގައި އޭނާ ނިދި ޖެހޭ މަންޒަރު ފެނުމާއި، އަތްޕުޅުގައި ހުންނަ ނޫފައިގަތުންތައް ފޮރުވުމަށް މޭކަޕް ބޭނުން ކުރައްވާ ކަމަށް ދެކެވޭ ވާހަކަ ތަކާ ގުޅިގެންނެވެ.

ވައިޓް ހައުސް އިން އާންމުކޮށް މެޑިކަލް ރިޕޯޓުތައް ވަގުތުން އާންމުކުރި ނަމަވެސް، މިފަހަރު ރިޕޯޓު ނެރުމުގައި ތިން ދުވަހުގެ ލަސްވުމެއް އައުމުން ބައެއް ފަރާތް ތަކުން ވަނީ ފާޑު ކިޔައިފަ އެވެ. މިއީ ވެރިކަމާ ހަވާލުވި ފަހުން ޓްރަމްޕް ހެއްދެވި ތިން ވަނަ މެޑިކަލް ޗެކަޕް އެވެ.