ބަދަލު ހިފުމުގެ ގޮތުން އީރާން އަށް ދިން ހަމަލާތައް ނިމިފައިވާ ކަމަށް އެމެރިކާ އިން ބުނެފި

އެމެރިކާގެ ސިފައިން އީރާންއާ ދެކޮޅަށް ކުރިއަށް ގެންދިޔަ ބަދަލު ހިފުމުގެ ހަމަލާތައް ނިމިފައިވާ ކަމަށް، އެމެރިކާގެ އަސްކަރިއްޔާ އިން ބުދަ ދުވަހު ބުނެފި އެވެ. 

މެދުއިރުމަތީގައި އެމެރިކާގެ ސިފައިންގެ މަސައްކަތްތައް ބަލަހައްޓާ އެމެރިކާގެ މެދުތެރޭ ސިފައިންގެ ބާރު (ސެންޓްކޮމް) އިން އެކްސް މެދުވެރިކޮށް ބުނީ އީރާން އަށް ދިން ދިފާއީ ހަމަލާތައް ނިންމާލާފައިވާ ކަމަށެވެ.

އެ ބަޔާނުގައި ބުނީ އެމެރިކާގެ ސިފައިންގެ ބާރު ތަކުން ހޮރްމޫޒް ކަނޑު އޮޅީގެ ކައިރީގައި އީރާންގެ ވައިގެ ދިފާއީ ނިޒާމު ތަކާއި، ބިންގަނޑުން ކޮންޓްރޯލް ކުރާ ތަންތަނާއި، ނަޒަރު ހިންގާ ރާޑަރު ހުރި ތަންތަނަށް އެމެރިކާގެ ވައިގެ ސިފައިންގެ ބާރާއި ނޭވީގެ ހަނގުރާމަ ފައިޓަރު ޖެޓު ތަކުން ސީދާ ހަމަލާތައް ދިނުމަށްފަހު އެ އޮޕަރޭޝަން ނިންމާލާފައިވާ ކަމަށެވެ.

މީގެ އިތުރުން އެ ބަޔާނުގައި ބުނެފައި ވަނީ އެމެރިކާގެ ސިފައިން ސަމާލުކަމާ އެކު ތިބި ކަމަށާއި، އީރާންގެ ފަރާތުން ކުރިމަތިވާ ބޭއިންސާފު އަދި އަދާވާތްތެރި ކަމަށް ދިފާއުވުމަށް އަސްކަރިއްޔާ އޮތީ ތައްޔާރަށް ކަމަށެވެ. މި ހަމަލާތައް ދީފައި ވަނީ އެމެރިކާގެ ރައީސް ޑޮނަލްޑް ޓްރަމްޕް އަމުރުފުޅަށް ކަަމަށް ވެސް ބުނެފައިވެ އެވެ. 

އަންގާރަ ދުވަހު އެމެރިކާގެ ސެންޓްކޮމް އިން ބުނެފައި ވަނީ، އީރާން އަށް ހަމަލާ ދޭން ފަށާފައި ވަނީ އެ ޤައުމުން ހިންގި ހަނގުރާމައިގެ އަމަލެއްގެ ސަބަބުން ކަމަށެވެ. އަދި އެ އޮޕަރޭޝަން ކުރިއަށް ގެންދާނެ ކަމަށް ބުނެފައިވެ އެވެ. އޭގެ ފަހުން ބުދަ ދުވަހު މި ވަނީ އެ އޮޕަރޭޝަން ނިމިފައިވާ ކަމަށް ހާމަ ކޮށްފައި އެވެ. 

އެމެރިކާ އިން އީރާން އަށް ހަމަލާ ދީފައި ވަނީ، ހޮރްމޫޒް ކަނޑު އޮޅި ކައިރިން އެމެރިކާގެ އަސްކަރިއްޔާގެ ހެލިކޮޕްޓަރެއް ވެއްޓިފައި ވަނިކޮށެވެ. އެމެރިކާާ އިން ވަނީ އެއީ އީރާން އިން ހިންގި އަމަލެއް ކަމަށް ތުހުމަތު ކޮށްފައި އެވެ. އެއީ އީރާން އިން ދިން ބޭއިންސާފު ހަމަލާއެއް ކަމަށާއި، އެކަމުގެ ބަދަލު ހިފާނެ ކަމަށް އެމެރިކާ އިން ކުރިން ވެސް ވަނީ ބުނެފައި އެވެ.

މި ހަމަލާ ތަކުގެ ސަބަބުން މެދު އިރުމަތީގެ މަސްރަހު އިތުރަށް ގޯސްވެގެން ދާނެ ކަމަށް ތަޖުރިބާކާރުން ވަނީ ބުނެފައި އެވެ.