ހެލިކޮޕްޓަރު ވައްޓާލީ އީރާން އިން ކަމަށް ބުނެ، އެމެރިކާ އިން ހަމަލާ ދީފި

އެމެރިކާގެ ސިފައިން އަންގާރަ ދުވަހުގެ ހަވީރު އީރާން އަށް ހަމަލާ ދީފި އެވެ.

އެމެރިކާގެ މެދުތެރޭގެ ސިފައިންގެ ބާރު (ސެންޓްކޮމް) އިން ބުނީ މި ހަމަލާތައް ދިނީ އީރާން އިން އެމެރިކާގެ އަޕާޗޭ ހެލިކޮޕްޓަރެއް ވައްޓާލާފައި ވާތީ، އެކަމަށް ބަދަލު ހިފުމުގެ ގޮތުން ކަމަށެވެ.

ސެންޓްކޮމް އިން ބުނީ މި ހަމަލާތައް ދިނީ އެމެރިކާގެ ރައީސް ޑޮނަލްޑް ޓްރަމްޕްގެ އަމުރުފުޅާ އެއްގޮތަށް ކަމަށެވެ. އެ އިދާރާ އިން ބުނީ މި މަސައްކަތަކީ އީރާން އިން ހަމަ ނުޖެހޭ ގޮތުގައި ކުރިއަށް ގެންދިޔަ ހަނގުރާމަވެރި އަމަލުތަކާ އެއްވަރުގެ ހަމަލާ ތަކެއް ކަަމަށެެވެ. 

ފުރަތަމަ ހަމަލާތައް ދިނުމަށް ފަހު، ގާތް ގަނޑަކަށް ގަޑިއެއްހާ އިރު ފަހުން އެމެރިކާގެ އޮފިޝަލުން އަލް އަރަބިއްޔާ އިނގިރޭސި އަށް ވިދާޅުވީ އީރާންގެ ވައިގެ ރައްކާތެރި ކަމުގެ ނިޒާމު ތަކާއި ރާޑަރު ތަކަށް ވެސް މި ހަމަލާތައް ދީފައިވާ ކަމަށެވެ. މި އޮޕަރޭޝަން ފެށި ފަހުން، ދެ ގަޑިއިރު ފަހުން ވެސް އޮޕަރޭޝަން ކުރިއަށް ގެންގޮސްފައިވާ ކަމަށް އޮފިޝަލުން ވިދާޅުވެފައިވެ އެވެ. 

އެމެރިކާގެ ރައީސް ޓްރަމްޕް އޭބީސީ ނިއުސް އަށް ވިދާޅުވީ، އީރާން އަށް ދޭން ޖެހޭ ބަދަލަކީ ވަރަށް ވަރުގަދަ އަދި ބާރުގަދަ ބަދަލެއް ކަމަށާއި، މިއީ އެފަދަ ބަދަލެއް ކަމަށެވެ.

އެމެރިކާގެ ހަމަލާތަކާ ގުޅިގެން، އީރާންގެ ފޮރިން މިނިސްޓަރު އައްބާސް އަރާގްޗީ ވަނީ އެ ޤައުމުން އެމެރިކާގެ އަމަލު ތަކަށް ބަދަލު ހިފާނެ ކަމުގެ އިންޒާރު ދެއްވައިފަ އެވެ. އަރާގްޗީ ވިދާޅުވެފައި ވަނީ، ބިއްރު ދެއްކުމުގެ އަމަލު ތަކާއި، ހަމަލާ ތަކުގެ ކުރިމަތީގައި އީރާންގެ ސިފައިން ބަދަލު ނުހިފައި ނުތިބޭނެ ކަމަށެވެ. 

އެމެރިކާ އިން މިފަދަ ހަމަލާ ތަކެއް ދީފައިވާއިރު، އެމެރިކާ އާއި އީރާންއާ ދެމެދު އޮތް ނުތަނަވަސްކަން ވަނީ ބޮޑުވެފައި އެވެ. އަދި ހެލިކޮޕްޓަރު ވެއްޓުނު ހާދިސާގެ ބަދަލު ހިފުމުގެ ގޮތުން އެެމެރިކާ އިން ދިން ހަމަލާ ތަކުގެ ސަބަބުން، މެދު އިރުމަތީގެ ސަރަހައްދުގައި ނުތަނަވަސްކަން ބޮޑުވެގެން ދާނެ އެވެ.