މެސީގެ ލަނޑާ އެކު އާޖެންޓީނާ މޮޅުވެއްޖެ

ފީފާ ވޯލްޑް ކަޕްގެ ކުރިން އާޖެންޓީނާ އިން ކުޅުނު ރަޙުމަތްތެރި ކަމުގެ މެޗުގައި އައިސްލެންޑް ބަލިކޮށްފި އެވެ.

އައިސްލެންޑާ ދެކޮޅަށް ކުޅުނު މެޗު އާޖެންޓީނާ އިން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި އާޖެންޓީނާ އިން އެއް ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގައި އެވެ.

މެޗު ފަށައިގެން އަށް ވަނަ މިނެޓުގައި އާޖެންޓީނާ އަށް ލީޑު ނަގައިދިނީ ވެލެންޓިން ބާކޯ އެވެ. އޭގެ ފަހުން މެޗުގެ ފުރަތަމަ ހާފުގައި ވެސް އާޖެންޓީނާ އިން ވަނީ އިތުރު ލަނޑު ޖަހަން މަސައްކަތް ކޮށްފައި އެވެ.

މެޗުގެ ދެ ވަނަ ހާފުގެ 72 ވަނަ މިނެޓުގައި އާޖެންޓީނާ އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފައި އެވެ. އާޖެންޓީނާ އަށް ލިބުނު ޕެނަލްޓީ ކާމިޔާބުކޮށް، އެ ލަނޑު އެ ޓީމަށް ޖަހައިދިނީ ކެޕްޓަން ލިއޮނަލް މެސީ އެވެ. މެޗުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް، އާޖެންޓީނާގެ ތިން ވަނަ ލަނޑު ޖެހީ ތިއާގޯ އަލްމަޑާ އެވެ.

މިއީ ވޯލްޑް ކަޕްގެ ކުރިން އާޖެންޓީނާ އިން ކުޅުނު ފަހު މެޗެވެ. މި މެޗުގައި މެސީ ކުޅެފައިވާއިރު، ވޯލްޑް ކަޕަށް މެސީ ހުރީ ފިޓުކޮށް ކަމަށް ބެލެވެ އެވެ. މުބާރާތުގައި އާޖެންޓީނާގެ ފުރަތަމަ މެޗުގައި ނިކުންނާނީ އަލްޖީރިއާއާ ދެކޮޅަށެވެ. ދެ ވަނަ މެޗުގައި އޮސްޓްރިއާއާ ދެކޮޅަށް ކުޅުމަށް ފަހު، މެޗުގައި ކުޅޭނީ ޖޯޑަންއާ ދެކޮޅަށެވެ.

އައިސްލެންޑް މެޗުގެ ކުރިން ހޮންޑިއުރަސްއާ ދެކޮޅަށް އާޖެންޓީނާ އިން ކުޅުނު މެޗުގައި މެސީ ކުޅެފައި ނުވެ އެވެ. އާޖެންޓީނާގެ ކޯޗު ލިއޮނަލް ސްކަލޯނީ ބުނެފައި ވަނީ، އެ މެޗުގައި މެސީ ލައްވާ ނުކުޅުވީ މެސީ އަށް ރެސްޓު ދިނުމަށް ކަމަށެވެ.