އީދުގެ ކުރިން 15 ރުފިޔާ އަށް ލިބުނު ފިޔާ ކިލޯގެ އަގު 45 ރުފިޔާ އާއި ހަމައަށް އުފުލިއްޖެ
ބާޒާރުގައި ފިޔާގެ އަގު އުފުލިފައިވާއިރު، ފިޔާގެ ޑިމާންޑާއި އެއްވަރަށް ސަޕްލައި ކުރެވެމުން ނުދާކަން ފާހަގަކޮށްލެވޭ.
ބާޒާރުގައި ފިޔާ ހުސްވެ، އާންމުންނަށް ދަތިވުން | ސޯޝަލް މީޑިއާ
އީދުގެ ކުރިން 15 ރުފިޔާ އަށް ލިބުނު ފިޔާ ކިލޯގެ އަގު 45 ރުފިޔާ އާއި ހަމައަށް އުފުލިއްޖެ އެވެ.
ރާއްޖެ އެމްވީ އިން ބާޒާރުގެ ބައެއް ތަންތަން ބެލި ބެލުމުން އެނގިފައިވާ ގޮތުގައި ބައެއް ތަންތަނުގައި ފިޔާ 25 އާއި 35 ރުފިޔާ އާއި ދެމެދު ލިބެން ހުރި ނަމަވެސް އެ ތަންތަނުގައި ހުރީ ވަރަށް ބޮޑަށް ހަލާކުވެފައި ހުރި ފިޔާ، ސާފުކޮށްގެން ހޮވާފައިވާ ފިޔާކޮޅެކެވެ. ކިރިޔާ ވެސް ބޭނުން ކުރަން ކަމުދާ ވަރުގެ ފިޔާ ނަމަ ލިބެން ހުރީ 40 އާއި 45 ރުފިޔާ އާއި ދެމެދުގަ އެވެ.
ވިޔަފާރިވެރިން ބުނީ ފިޔާ ލިބުމުގައި ދަތިތަކާއި ދިމާވީ އީދަށް ގެނައި ފިޔާގެ ބޮޑު ޝިޕްމެންޓެއް ހަލާކުވެ އުކާލަން ޖެހުމުން ޑިމާންޑާއި އެއްވަރަށް ގިޔާ ސަޕްލައި ނުކުރެވުމުން ކަމަށެވެ. އަދި އެސްޓީއޯ އިން ފިޔާ ވިއްކި އިރު ލިމިޓްކޮށްގެން މީހަކަށް ބަސްތާ އެއްގެ މަގުން ވިއްކުމުން އާއްމުންނަށް ފިޔާ ނުލިބި ބޮޑެތި ދަތިތަކާއި ކުރިމަތިވި ކަމަށް ވެސް އާއްމުން ބުނެ އެވެ.
ވިޔަފާރި ވެރިން ބުނީ މިހާރު ފިޔާގެ އާ ޝިޕްމެންޓަށް އޯޑަރ ދީފައިވާ ކަމަށް ފިޔާ ސަޕްލައި ކުރާ ފަރާތްތަކުން ބުނާ ކަމަށެވެ. އަދި މިހާރު އާދައިގެ ގިނަ ފިހާރަތަކުން އެއްކޮށްހެން ފިޔާ ހުސްވެފައިވާ ކަމަށް މި ނޫހާއި ވާހަކަދެއްކި ފަރާތްތަކުން ބުނެފައި ވެ އެވެ.
