ކަމަދޫ އީދު އުފާ: އަންހެނުންގެ ކޯޑީގެ ފޯރި ނިކަން ގަދަ

ކަމަދޫ އީދު އުފާ އަންހެނުންގެ ކޯޑި ވަރަށް ފޯރި އާއި އެކު ކުރިއަށް ގެންގޮސްފި އެވެ.

ހުކުރު ދުވަހު އެ ރަށުގައި ފިރިހެން ވެރިންގެ ކޯޑިކެޑުން ވަނީ ބާއްވާފަ އެވެ. އެ ދުވަހުގެ ރޭ ކޯޑި ވަނީ ކަނޑާފަ އެވެ. އަދި އަދަބެއްގެ ގޮތުން ޝައްކުވާ މީހުން ވަނީ ހޮނިހިރު ދުވަހު ހަވީރު އައްސާފައި ބަނދަރު މަތީގައި ބައިތިއްބާފަ އެވެ. އެ މީހުންގެ ޝަރީއަތް ކުރިއަށް ގެންދިޔައީ އަންހެން ވެރިންގެ އީދު ކޯޑި ޖަހާ ނިމުމުންނެވެ.

އެ ރަށުގެ މަގުތަކުން ސަޤާފީ ރީތި ލަވަތަކައި ނެށުމާއި އެކު ކޯޑި އާއި އެކު އަންހެންވެެިން ވަނީ ހިނގާފަ އެވެ. މި ހަރަކާތުގައި އެ ރަށުގެ އެކި އުމުރުފުރާތަކުގެ އަންހެނުން ލ ބައިވެރިވެފައި ވެއެވެ. އީދު ކޯޑީގެ ޝަރީއަތް ކުރިއަށް ދިޔައީ ރަށުގެ ރައްޔިތުންގެ އަމިއްލައަށް އުގެއްދި ކޯޓުގެ ކުރިމަތީގަ އެވެ. މުޅި ޝަރީއަތުގެ ތެރެއިން ފެނުނީ ސަމާސާ އަދި ޝައުގުވެރި ކަންތައްތަކެކެވެ. ކޯޑި ކެނޑި ގޮތް ސާފު ނުވެގެން ޑަބްލިއުޑީސީގެ ރައީސާ އާއި ވެސް ސުވާލުކޮށްފައިވެ އެވެ. 

ޝަރީއަތް ނިމުނު އިރު ފެނުނީ ނިކަން ތަފާތު މަންޒަރެކެވެ. ޝަރީއަތަށް ފަހު ޖަމްހަރު އަށް ވަރުގަދަ ހުކުމެއް ކުރުމަށް ވެސް ނިންމި އެވެ. އެއީ 4 އަހަރު ވަންދެން ރަށުގައި މަހަށް ނުދެވޭ ގޮތަށް ބަންދުކުރުމެވެ. 

ކަމާއި ގުޅުން ނެތް ބައެއްގެ ބޮލުގައި ކޯޑި ކެނޑިކަމުގެ ޒިންމާ އަޅުވާފައިވާތީ އެ މީހުން ދޫކޮށްލުމަށް ރައްޔިތުންގެ ކޯޓުން ހުކުމް ކުރި އެވެ. ދެ ޖިންސުގެ މީހުންނަށް އެއް ބަޔަކު އަނެއް ބަޔަކަށް ކައްކާފައި ކާންދޭން ވެސް ވަނީ ހުކުމްކޮށްފަ އެވެ.

މުޅި ކޯޑި ޙަރަކާތުގެ ތެރެއިން ވެސް ފެނުނީ ތަފާތު ސަގާފީ ކުލަވަރެވެ. އީދު ހަރަކާތްތަކުގެ ތެރެއިން ހޮނިހިރު ދުވަހު ކުލަ ޖެހުމުގެ ފޯރި ގަދަ ހަރަކާތްތަކެއް ވެސް ކަމަދޫގައި ކުރިއަށް ދިޔަ އެވެ.