އެސްޓީއޯގެ ހުސްވި އަހަރުގެ އާމްދަނީ ކުރީ އަހަރާ އަޅާބަލާއިރު ހީނަރުވެއްޖެ

ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ އާމްދަނީ އަށް އޭގެ ކުރީ އަހަރާ ބަލާއިރު ހީނަރުކަމެއް އައިސްފައިވާކަން އަހަރީ ރިޕޯޓުން ހާމަވެއްޖެ އެވެ. އެހެން ނަމަވެސް އަހަރީ ރިޕޯޓުގައިވާ ގޮތުން، 2025 ވަނަ އަހަރު އެ ކުންފުންޏަށް ލިބުނު ފައިދާ ވަނީ އިތުރުވެފައެވެ. 

އެސްޓީއޯގެ 2025 ވަނަ އަހަރުގެ އަހަރީ ރިޕޯޓުގައިވާ ގޮތުން، އެ އަހަރު ކުންފުންޏަށް އާމްދަނީގެ ގޮތުގައި ލިބިފައިވަނީ 16.68 ބިލިއަން ރުފިޔާއެވެ. މިއީ 2024 ވަނަ އަހަރު ލިބުނު 16.76 ބިލިއަން ރުފިޔާއާ އަޅާބަލާއިރު 0.5 އިންސައްތައިގެ ދަށްވުމެކެވެ. އާމްދަނީ ދަށްވީ ތެޔޮ ވިއްކި މިންވަރު 8 އިންސައްތަ އިތުރުވި ނަމަވެސް، ދުނިޔޭގެ ބާޒާރުގައި ތެލުގެ އަގުތައް ދަށްވުމާ ގުޅިގެންނެވެ. ނަމަވެސް، އިންޝުއަރެންސާއި ގޭސް އަދި ޓްރޭޑިންގ ދާއިރާއިން ލިބުނު ކުރިއެރުމާއެކު، ޓެކްސަށް ކެނޑުމަށްފަހު ސާފު ފައިދާގެ ގޮތުގައި 785 މިލިއަން ރުފިޔާ ވަނީ ލިބިފައެވެ. މިއީ ކުރީ އަހަރާ އަޅާބަލާއިރު 1.7 އިންސައްތައިގެ ކުރިއެރުމެކެވެ.

މި ނަތީޖާތަކުން ހާމަވާ ގޮތުގައި އެސްޓީއޯގެ މައިގަނޑު ވިޔަފާރިއަކީ އަދިވެސް ތެލުގެ ދާއިރާ ކަން ފާހަގަ ކުރެވެއެވެ. އެގޮތުން ގްރޫޕުގެ ޖުމްލަ އާމްދަނީގެ 70 އިންސައްތަ ހިއްސާކުރަނީ ތެލުގެ ވިޔަފާރިންނެވެ. ތެލުގެ ވިޔަފާރިން ލިބުނު އާމްދަނީ 3 އިންސައްތަ ދަށްވެ، 11.69 ބިލިއަން ރުފިޔާއަށް އަރާފައިވެއެވެ.

އެސްޓީއޯގެ ތެޔޮ ނޫން އެހެން ވިޔަފާރިތަކަށް ބަލާއިރު  ޓްރޭޑިންގ އާމްދަނީ 8 އިންސައްތަ އިތުރުވެ 3.39 ބިލިއަން ރުފިޔާއަށް ވަނީ އަރާފައެވެ. މީގެ ތެރެއިން އެންމެ ބޮޑު ކުރިއެރުމެއް ހޯދީ ކޮންސްޓްރަކްޝަން ސޮލިއުޝަންސްއިންނެވެ. މި ދާއިރާގެ އާމްދަނީ 15 އިންސައްތަ އިތުރުވެ 718 މިލިއަން ރުފިޔާއަށް ވަނީ އަރާފައެވެ. މީގެ އިތުރުން ހެލްތުކެއާ ސޮލިއުޝަންސްއަށް 9 އިންސައްތައިގެ ކުރިއެރުމަކާއެކު 1.55 ބިލިއަން ރުފިޔާ ލިބުނުއިރު، އާންމު ވިޔަފާރިން 3 އިންސައްތައިގެ ކުރިއެރުމަކާއެކު 1.12 ބިލިއަން ރުފިޔާ ވަނީ ލިބިފައެވެ.

އެލައިޑް އިންޝުއަރެންސް މެދުވެރިކޮށް ހިންގާ އިންޝުއަރެންސް ދާއިރާއިންވެސް ވަނީ 15 އިންސައްތައިގެ ކުރިއެރުމެއް ހޯދައި، 875 މިލިއަން ރުފިޔާގެ އާމްދަނީއެއް ހޯދާފައެވެ. އަދި ކައްކާ ގޭހާއި، ސިއްހީ އަދި ސިނާއީ މަސައްކަތްތަކަށް ބޭނުންވާ ގޭހުގެ ޑިމާންޑް އިތުރުވުމާ ގުޅިގެން، ގޭހުގެ ވިޔަފާރިން ލިބުނު އާމްދަނީ ވަނީ 12 އިންސައްތަ އިތުރުވެ 291 މިލިއަން ރުފިޔާއަށް އަރާފައެވެ.

ކުންފުނީގެ ވިޔަފާރިތަކުގެ ތެރެއިން އެންމެ ބޮޑު ހީނަރުކަމެއް އައިސްފައިވަނީ ޝިޕިންގ ދާއިރާއަށެވެ.  ޝިޕިންގ އާމްދަނީ ވަނީ 5 އިންސައްތަ ދަށްވެ 409 މިލިއަން ރުފިޔާއަށް ވެއްޓިފައެވެ. 

މާލީ ހިންގުން ހަރުދަނާކުރުމުގެ ގޮތުން އެސްޓީއޯއިން ކުރި މަސައްކަތުން، ދަރަންޏަށް ދައްކަންޖެހޭ އިންޓްރެސްޓް ނުވަތަ ފައިނޭންސް ކޮސްޓް ވަނީ 16 އިންސައްތަ ދަށްކުރެވިފައެވެ. އެގޮތުން 230 މިލިއަން ރުފިޔާއަށް އެ އަދަދު ތިރިކުރެވުނީ ލޯނުތަކުގެ އިންޓްރެސްޓް ކުޑަވުމާއި، ތެލުގެ ވިޔަފާރިއަށް ބޭނުންވާ ފައިސާ ހޯދުމުގައި ލުއި ގޮތްތަކެއް ހަމަޖެހުމުންނެވެ. މީގެ އިތުރުން، ކުންފުނީގެ އޮޕަރޭޓިންގ ކޭޝް ފްލޯ 2024 ވަނަ އަހަރު ހުރި 398 މިލިއަން ރުފިޔާއިން 1.1 ބިލިއަން ރުފިޔާއަށް ވަނީ ރަނގަޅުވެފައެވެ.

މި ކުރިއެރުންތަކާއެކު ވެސް، ކުންފުންޏަށް ފައިސާ ލިބުމުގައި ނުވަތަ ލިކުއިޑިޓީގެ ދަތިތަކެއް އަދިވެސް އެބަހުއްޓެވެ. އެގޮތުން ކުންފުންޏަށް ލިބެންޖެހޭ ފައިސާ ނުވަތަ ރިސީވަބަލްސް ވަނީ 7 އިންސައްތަ އިތުރުވެ 6.4 ބިލިއަން ރުފިޔާއަށް އަރާފައެވެ. މިއީ މައިގަނޑު ގޮތެއްގައި ސަރުކާރުގެ އިދާރާތަކާއި ސަރުކާރު ހިއްސާވާ ކުންފުނިތަކުން ލިބެންޖެހޭ ފައިސާއެވެ. 

ވޭތުވެދިޔަ އަހަރު އެސްޓީއޯއިން ނިންމި އެންމެ މުހިންމު އެއް ނިންމުމަކީ ހުޅުމާލޭގައި ތަރައްގީކުރަމުންދިޔަ ހޮޓާ މަޝްރޫއު ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ދޫކޮށްލުމެވެ. 20 މިލިއަން ޑޮލަރުގެ މި މަޝްރޫއު ދޫކޮށްލީ ހުޅުމާލެއިން ބިމެއް ލިބޭ ގޮތަށެވެ. އެސްޓީއޯއިން ބުނި ގޮތުގައި މިއީ ކުންފުނީގެ ރައުސްމާލު އެންމެ ފައިދާހުރި ގޮތުގައި ބޭނުންކުރުމަށާއި، ކުންފުނީގެ މައިގަނޑު ވިޔަފާރިތަކަށް ސަމާލުކަން ދިނުމަށް ނިންމި ނިންމުމެކެވެ.

ހިއްސާދާރުންނަށް ލިބޭ މަންފާވެސް މިދިޔަ އަހަރު ވަނީ އިތުރުވެފައެވެ. އެގޮތުން 2025 ވަނަ އަހަރުގެ ހިއްސާގެ ފައިދާގެ ގޮތުގައި ކޮންމެ ހިއްސާއަކަށް 85 ރުފިޔާ ބެހުމަށް ބޯޑުން ވަނީ ހުށަހަޅާފައެވެ. މިއީ އޭގެ ކުރީ އަހަރު ބެހި 80 ރުފިޔާއަށްވުރެ އިތުރު އަދަދެކެވެ. އަދި އަހަރު ނިމުނުއިރު އެސްޓީއޯގެ ހިއްސާގެ އަގު 64 އިންސައްތަ އިތުރުވެ، ހިއްސާއެއްގެ އަގު ވަނީ 1,800 ރުފިޔާއަށް އަރާފައެވެ. މީގެ އިތުރުން ކުންފުނީގެ މާކެޓް ކެޕިޓަލައިޒޭޝަން 2.03 ބިލިއަން ރުފިޔާއަށް އަރާފައިވާއިރު، ހިއްސާގެ މުއާމަލާތްތައް ކުރި މިންވަރުވެސް ވަނީ 43 އިން 183 އަށް އިތުރުވެފައެވެ.