ތެލުގެ އަގަށް އައި ބަދަލު ކަރަންޓުން ރިފްލެކްޓް ނުވާނެ ކަމަށް ފާހަގަކުރައްވާ ވަޒީރު ޒަމީރު ކަރަންޓު ބިލު ބޮޑުވުން ދިފާއު ކުރައްވައިފި
މެދުއިރުމަތީގެ ހަނގުރާމައާ ގުޅިގެން ތެލުގެ އަގަށް އަންނަ ބަދަލުތަކުން ރައްޔިތުން ސަލާމަތްކުރުމަށް ސަރުކާރުން މަސައްކަތް ކުރަމުންދާ ކަމަށް މާލީ ވަޒީރު މޫސާ ޒަމީރު ވިދާޅުވި. ކަރަންޓު ބިލުތައް ބޮޑުވުމުގެ ޝަކުވާ އާންމުން ކުރަމުންދިޔަ ނަމަވެސް، މި މަހުގެ ބިލުތަކަށް އިތުރު ޑިސްކައުންޓެއް ދިނުމުގެ ވިސްނުމެއް ސަރުކާރުގެ ނެތް ކަމަށް ވަޒީރު ފާހަގަކުރެއްވި.
ފިނޭންސް މިނިސްޓަރު މޫސާ ޒަމީރު ނޫސްވެރިންގެ ބައްދަލުވުމެއްގައި ވާހަކަދައްކަވަނީ | ރައީސް އޮފީސް
މެދުއިރުމަތީގެ ހަނގުރާމައާ ގުޅިގެން ތެލުގެ އަގަށް އައި ބަދަލު ކަރަންޓުން ރިފްލެކްޓް ނުވާނެ ކަމަށް ފާހަގަކުރައްވައި، މާލީ ވަޒީރު މޫސާ ޒަމީރު ކަރަންޓު ބިލު ބޮޑުވުން ދިފާއު ކުރައްވައިފި އެވެ.
އެމަނިކުފާނު އެފަދައިން ވިދާޅުވީ މެދުއިރުމަތީގެ ހަނގުރާމައާ ގުޅިގެން އެކުލަވާލާފައިވާ ކްރައިސިސް ކޮމިޓީ އިން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
ކަރަންޓު ބިލު ބޮޑު ވިޔަސް ޑިސްކައުންޓް ދިނުމުގެ ވިސްނުމެއް ނެތް ކަމަށް ވެސް ވަޒީރު ވަނީ ވިދާޅުވެފަ އެވެ. މާޗު މަހަކީ ކޮންމެ އަހަރެއްގައި ވެސް ކަރަންޓު ބިލް ބޮޑުވާ ދުވަސްކޮޅެއް ކަމަށް ފާހަގަކުރައްވައި ވަޒީރު ވަނީ ކަރަންޓު ބިލު އާދަޔާއި ޚިލާފަށް ބޮޑުވުމުގެ މައްސަލަ ފާހަގަ ނުކުރެވޭ ކަމަށް ވިދާޅުވެފަ އެވެ. ޒަމީރު ވިދާޅުވީ ބިލުތަކަށް މި މަހު އިތުރު ޑިސްކައުންޓެއް ދިނުމަކީ ސަރުކާރުގެ ވިސްނުމެއް ނޫން ކަމަށެވެ. މީގެ އިތުރުން މާލޭގައި މި ދުވަސްވަރު ކަރަންޓު ބޭނުންކުރާ މިންވަރު 130 މެގަވޯޓަށް އަރާނެ ކަމަށާއި އެއީ 15% ގެ އިތުރުވުމެއް ކަމަށް ވަޒީރު ވަނީ ފާހަގަކުރައްވާފަ އެވެ.
"ތެލުގެ ސަބްސިޑީ އަށް ކުރާ ޚަރަދު ވަރަށް ބޮޑު. ތެލުގެ އަގަށް ސަބްސިޑީ ދިނުމުގައި އެސްޓީއޯގައި އޮންނަ ފޯމިއުލާ އަކަށް މި ބަލަނީ. ޓްރާންސްޕޯޓް ސެކްޓަރ އެވެސް އަގުތަށް އަތް ނުފޯރާ ހިސާބަށް ދާނެ ގޮތަކަށް ބަލައިގެން ތެޔޮ ލިބޭނެ ގޮތް ގޮތް ރޭވޭ. ޖެނެރަލީ އަގުތައް އަތް ނުފޯރާ ހިސާބަށް ދިޔަ ނުދިނުމަށް ފިޔަވަޅު އެބަ އަޅަން." ޒަމީރު ވިދާޅުވި އެވެ.
އާއްމުން ދަނީ ކަރަންޓު ބިލު ބޮޑުވުމާއި ގުޅިގެން އެކަމާއި މެދު ކެނޑިނޭޅި ކަންބޮޑުވުން ފާޅުކުރަމުންނެވެ. ތެލުގެ އަގު އާދަޔާއި ޚިލާފަށް ބޮޑުވިޔަ ނުދިނުމަށް ގިނަ މަސައްކަތްތަކެއް ކުރަމުންދާ ކަމަށް ޒަމީރު ވަނީ ފާހަގަކުރައްވާފަ އެވެ. ތެލުގެ ރިޒާވް ޤާއިމްކުރުމަށް 2 ފަޅެއް ބަލަމުންދާ ކަމަށާއި، ކުރިއަށް އޮތް ހަފުތާގެ ތެރޭގައި އެކަމަށް ބޭނުންވާ ސަރވޭގެ މަސައްކަތް ފަށާނެ ކަމަށް ވަޒީރު ވިދާޅުވި އެވެ.
މީގެ އިތުރުން، އެކަމަށް ބޭނުންވާ ޑިޒައިންގެ މަސައްކަތްތަކާއި ފައިނޭންސިންގެ މަސައްކަތްތަކުގެ އިތުރުން ފީސިބިލިޓީ ހިމެނޭހެން ފައިނަލް ޕްލޭންއެއް ތައްޔާރުކޮށް ރައީސުލްޖުމްހޫރިއްޔާއަށް ހުށަހަޅަން ނިންމާފައިވާ ކަމަށް ވަޒީރު ވިދާޅުވި އެވެ. އެ މަސައްކަތް ކުރިއަށް ގެންދާނީ ރައީސް ނިންމަވާ ގޮތަށް ކަމަށް ވަޒީރު ވިދާޅުވި އެވެ.
