އީރާނުގެ ހަމަލާ އާ ގުޅިގެން ކުވެއިތާއި ބަހްރައިންގެ ދިފާއީ ނިޒާމްތައް ހަރަކާތްތެރިވަނީ

އެމެރިކާއާއި އީރާނާ ދެމެދު އޮތް ނުތަނަވަސްކަން އިތުރުވަމުންދާ ދަނޑިވަޅެއްގައި، ހަފުތާއެއް ނުވަނީސް އީރާނުން ދިން ދެވަނަ ހަމަލާއާ ގުޅިގެން، ވައިގެ މަގުން ކުރިމަތިވެދާނެ ނުރައްކާތަކަކުން ދިފާއުވުމަށް ކުވެއިތާއި ބަހްރައިންގެ އެއާ ޑިފެންސް ސިސްޓަމްތައް ހޮނިހިރު ދުވަހުގެ ފަތިހުގެ ވަގުތެއްގައި ހަރަކާތްތެރިވާން ފަށައިފިއެވެ.

ކުވެއިތުގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، އެ ގައުމުގެ އެއާ ޑިފެންސް ސިސްޓަމްތަކުން މިހާރު ދަނީ ދީފައިވާ މިސައިލް އަދި ޑްރޯން ހަމަލާތަކަށް ރައްދު ދެމުން ކަމަށެވެ. އަދި މުޅި ގައުމަށް އިވުނު ގޮވުންތަކުގެ އަޑަކީ، ދިން ހަމަލާތައް ވައިގެ ތެރޭގައި ހުއްޓުވުމުގެ ސަބަބުން އިވުނު އަޑުތަކެއް ކަމަށް ފަހުން އެ ގައުމުން ވަނީ ސާފުކޮށްދީފައެވެ.

މި ހަމަލާތަކާ ގުޅިގެން ބަހްރައިންގެ ކަމާބެހޭ ފަރާތްތަކުން ވަނީ ވައިގެ މަގުން ހަމަލާއެއް ދީފާނެ ކަމުގެ އިންޒާރު ނެރެ، ރައްކާތެރިކަން ހޯދުމަށް އެ ގައުމުގެ ރައްޔިތުންނަށް އަންގާފައެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހުކުރު ދުވަހު ބުނެފައިވަނީ، ހޮރްމޫޒް ކަނޑުއޮޅިއާއި ގަލްފް ސަރަހައްދަށް އަމާޒުކޮށް އީރާނުން ފޮނުވާލި ގިނަ އަދަދެއްގެ ބެލިސްޓިކް މިސައިލާއި ޑްރޯންތައް އެމެރިކާގެ ސިފައިން ހުއްޓުވާފައިވާ ކަމަށެވެ.

ސެންޓްކޮމްގެ ބަޔާނުގައިވާ ގޮތުން، ހޮރްމޫޒް ކަނޑުއޮޅިއަށް އަމާޒުކޮށް އީރާނުން ފޮނުވާލި ހަތަރު ޑްރޯން އެމެރިކާ ސިފައިން ވައްޓާލިތާ މަދު ގަޑިއިރުތަކެއްގެ ތެރޭގައި، އީރާނުން ވަނީ ކުވެއިތާއި ބަހްރެއިނަށް އަމާޒުކޮށް ހަތް ބެލިސްޓިކް މިސައިލް ފޮނުވާލާފައެވެ. އަދި އީރާނުން ފޮނުވާލި މި ޑްރޯންތަކަކީ އެ ސަރަހައްދުގެ ކަނޑުގެ ދަތުރުފަތުރަށް އޮތް ބޮޑު ނުރައްކަލެއް ކަމަށްވެސް އެ ބަޔާނުގައި ފާހަގަކޮށްފައިވެއެވެ.

ކަނޑުގެ މަގުން ދީފާނެ އިތުރު ހަމަލާތަކަކުން ދިފާއުވުމުގެ ގޮތުން، އެމެރިކާ ސިފައިން ވަނީ އީރާނުގެ ގޯރޫކް އަދި ގޭޝްމް އައިލެންޑްގައި ހުރި އެ ގައުމުގެ ކޯސްޓަލް ސަވައިލަންސް ރާޑަރު ސައިޓްތަކަށް ހަމަލާދީފައެވެ.

ސެންޓްކޮމްއިން ބުނި ގޮތުގައި، މިހާތަނަށް ބެލި ބެލުމުން އެނގޭ ގޮތުގައި އީރާނުން ފޮނުވާލި ހަތް މިސައިލްގެ ތެރެއިން ހަ މިސައިލް ވަނީ ވައިގެ ތެރޭގައި ހުއްޓުވާފައެވެ. އަދި ހަތްވަނަ މިސައިލް އަމާޒުކުރި ތަނަށް ފޯރާފައެއް ނުވެއެވެ.