ލުބުނާންގެ ސިފައިންގެ އިސްވެރިޔާ ޕާކިސްތާން އަށް

ލުބުނާންގެ ސިފައިންގެ އިސްވެރިޔާ ރޮޑޮލްފް ހައިކަލް ހޮނިހިރު ދުވަހު ޕާކިސްތާން އަށް ވަޑައިގެންފި އެވެ.

އޭއެފްޕީ އަށް އެކި އެކި މަސްދަރު ތަކުން މައުލޫމާތު ދެމުން ބުނެފައި ވަނީ، މި ދަތުރުފުޅާއި އެމެރިކާ އާއި އީރާންއާ ދެމެދު ކުރިއަށްދާ މަޝްވަރާތަކާ ގުޅިފައިވާ ކަމަށެވެ. އެމެރިކާ އާއި އީރާންއާ ދެމެދު މެދުވެރިއެއްގެ ދައުރު އަދާ ކުރަމުން އަންނަނީ ޕާކިސްތާން އިންނެވެ. 

ލުބުނާންގެ ސިފައިންގެ ބަޔާނެއްގައި ބުނީ ހައިކަލް ޕާކިސްތާން އަށް ފުރާވަޑައިގެންފައި ވަނީ އެގައުމުގެ ސިފައިންގެ އިސްވެރިޔާ ފީލްޑް މާޝަލް ސައްޔިދު އާސިމް މުނީރުގެ ދައުވަތަކަށް ކަމަށެވެ. އަދި ޕާކިސްތާންގައި މި ދެ ބޭފުޅުން ބައްދަލު ކުރައްވާނެ ކަމަށް ވެސް ބުނެފައިވެ އެވެ. 

މި ކަމާ ގުޅޭ މައުލޫމާތު ލިބިފައިވާ މަސްދަރަކުން އޭއެފްޕީ އަށް ބުނީ، ހައިކަލްގެ މި ދަތުރުފުޅާއި އީރާން އާއި އެމެރިކާއާ ދެމެދުގައި ޕާކިސްތާން އިން އަދާ ކުރަމުން އަންނަ މެދުވެރި ކަމުގެ ދައުރާ ގުޅިފައިވާ ކަމަށެވެ. މެދު އިރުމަތީގެ ސަރަހައްދީ ހަނގުރާމަ ނިންމުމަށް އެ ދެ ގައުމުން މަޝްވަރާ ކުރަމުންދާތީ، އެ މައްސަލަތައް ހައްލު ކުރުމަށް ޕާކިސްތާން އިން އަންނަނީ ވަރަށް ބޮޑު އިސްކަމެއް ދެމުންނެވެ. 

ނަން ހާމަ ކުރަން ބޭނުން ނުވާ އެ މަސްދަރުން އިތުރަށް ބުނީ، މި މަޝްވަރާ ތަކުގައި ލުބުނާންގެ ވަރަށް މުހިންމު ބައިވެރިވުމެއް އޮންނަ ކަމަށެވެ. 

ޕާކިސްތާންގެ މުނީރު އަކީ، އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމަ ނިންމުމަށް، އީރާން އާއި އެމެރިކާގެ ދެ މެދުގައި ޕާކިސްތާންގައި ބޭއްވި މަޝްވަރާ ތަކުގައި ވެސް ބައިވެރިވި ބޭފުޅެކެވެ. އަދި އޭނާ އަކީ ޕާކިސްތާންގެ ފަރާތުން މަޝްވަރާ ތަކުގައި އިސްކޮށް ހުންނަވާ ބޭފުޅާ އެވެ. 

އެމެރިކާ އާއެކު ސުލްޙަ ޤާއިމު ކުރުމަށް އީރާން އިން ކުރަމުން އަންނަ މަޝްވަރާ ތަކުގައި، އެ ޤައުމުން ވަނީ ކޮންމެ އެއްބަސްވުމެއްގައި ލުބުނާންގެ މައްސަލަ ހިމަނަންް ވާނެ ކަމަށް ޝަރުތު ކޮށްފަ އެވެ. އެގޮތުން ލުބުނާންގައި ހިނގަމުން އަންނަ ހަނގުރާމަ ނިންމުމަށް ވެސް އީރާން އިން ވަނީ ޝަރުތު ކޮށްފައި އެވެ.