13 ގަޑިއިރުގެ ތެރޭގައި، ރަޝިޔާ އިން ޔޫކްރެއިންގެ 339 ޑްރޯން ހުއްޓުވައިފި

ރަޝިޔާ އަށް އަމާޒުކޮށް ޔޫކްރެއިން އިން ފޮނުވާލި ގިނަ ޑްރޯން ހަމަލާ ތަކެއް ހުއްޓުވާފައިވާ ކަމަށް، ރަޝިޔާގެ ޑިފެންސް މިނިސްޓްރީ އިން ބުނެފި އެވެ. 

ރަޝިޔާގެ ޑިފެންސް މިނިސްޓްރީ އިން ބުނެފައި ވަނީ، ހޮނިހިރު ދުވަހު 13 ގަޑިއިރުގެ ތެރޭގައި ޔޫކްރެއިން އިން ފޮނުވާލި 339 ޑްރޯން އެ ޤައުމުގެ ވައިގެ ދިފާއީ ނިޒާމުން ހުއްޓުވައި، ހަލާކު ކޮށްލާފައިވާ ކަމަށެވެ. މި ހަމަލާ ތަކުގެ ތެރޭގައި، ރަޝިޔާގެ ވެރި ރަށް މޮސްކޯގެ ސަރަހައްދު ތަކަށް ދިން ހަމަލާތައް ވެސް ހިމެނެ އެވެ. 

ރޮއިޓާސް އިން ރިޕޯޓު ކޮށްފައިވާ ގޮތުގައި މިއީ ރަޝިޔާގެ ވެރިރަށް މޮސްކޯ އާއި، އެ ސަރަހައްދު ތަކަށް ޔޫކްރެއިން އިން ދިން އެންމެ ބޮޑު ޑްރޯން ހަމަލާ ކަމަށް ބެލެވޭ ކަމަށެވެ. މި ހަމަލާތައް ހުއްޓުވުމަށް ރަޝިޔާގެ ދިފާއީ ބާރު ތަކުން ވަރަށް ބޮޑަށް މަސައްކަތް ކުރަން ޖެހިފައިވެ އެވެ.

ރަޝިޔާގެ ޑިފެންސް މިނިސްޓްރީ އިން ބުނެފައިވާ ގޮތުގައި، މި ޑްރޯންތައް ހަލާކު ކުރުމުގެ އޮޕަރޭޝަން ހިންގާފައި ވަނީ ރަޝިޔާގެ އެކި ސަރަހައްދު ތަކުގައި އެވެ. މިއީ ރަޝިޔާ އާއި ޔޫކްރެއިންއާ ދެމެދު ހިނގަމުން އަންނަ ހަނގުރާމައިގެ ތެރެއިން ދީފައިވާ ހަމަލާ ތަކެކެވެ. ރަޝިޔާ އިން ވެސް ވަނީ ޔޫކްރެއިންގެ އެކި ސަރަހައްދު ތަކަށް ވަރުގަދަ ހަމަލާ ތަކެއް ދެމުންނެވެ. 

މި ހަމަލާތަކާ ގުޅޭ ގޮތުން ރަޝިޔާގެ ޑިފެންސް މިނިސްޓްރީ އިން ބުނެފައި ވަނީ، ހަމަލާ ތަކުގައި އެ ޤައުމުގެ އާންމު ރައްޔިތުންނަށް ބޮޑެތި ގެއްލުން ތަކެއް ލިބިފައި ނުވާ ކަމަށެވެ. އަދި ރަޝިޔާގެ މުހިންމު އިދާރާ ތަކަށް ވެސް ބޮޑެތި ގެއްލުން ތަކެއް ލިބިފައި ނުވާ ކަމަށް ހާމަ ކޮށްފައިވެ އެވެ. 

ރަޝިޔާ އަށް އަމާޒުކޮށް ޔޫކްރެއިން އިން މިފަދަ ހަމަލާ ތަކެއް ދިނުމުގެ މަޤުސަދަކީ، ރަޝިޔާގެ ސިފައިންގެ މަރުކަޒު ތަކަށާއި، މުހިންމު ބައެއް ތަންތަނަށް ގެއްލުން ދިނުން ކަމަށް ބެލެވެ އެވެ. ނަމަވެސް، ރަޝިޔާގެ ޑިފެންސް މިނިސްޓްރީ އިން ވަނީ އެ ޤައުމުގެ ވައިގެ ދިފާއީ ނިޒާމުން މި ހަަމަލާތައް ހުއްޓުވުމުގައި ކާމިޔާބު ހޯދާފައިވާ ކަމަށް ބުނެފައިވެ އެވެ.