އިނގިރޭސި ޑިފެންސް ސެކްރެޓަރީ ދަތުރު ކުރެއްވި ބޯޓު، ރަޝިޔާ އިން ޖޭމް ކޮށްފި

އިނގިރޭސިވިލާތުގެ ޑިފެންސް ސެކްރެޓަރީ ޖޯން ހީލީ ދަތުރު ކުރެއްވި ރޯޔަލް އެއާ ފޯސް (އާރްއޭއެފް) ގެ މަތިންދާ ބޯޓެއް ރަޝިޔާގެ ބޯޑަރު ކައިރިން ދަތުރު ކުރަނިކޮށް، އެ ބޯޓުގެ ސިގްނަލް ތަކަށް ހުރަސް އަޅައި ޖޭމް ކޮށްލައިފި އެވެ.

މި ހާދިސާ ހިނގާފައި ވަނީ މިދިޔަ ހަފުތާގެ ބުރާސްފަތި ދުވަހު، އެސްޓޯނިއާގައި ތިބި އިނގިރޭސި ސިފައިންނާ ބައްދަލު ކުރެއްވުމަށް ފަހު، ހީލީ އެނބުރި ގައުމަށް ވަޑައިގެންނެވި މަގު މަތީގަ އެވެ. ދަ ޓައިމްސް ނޫހުން ރިޕޯޓު ކޮށްފައިވާ ގޮތުގައި، ތިން ގަޑިއިރަށް ދެމިގެން ދިޔަ މި ދަތުރުގައި ބޯޓުގެ ޖީޕީއެސް ސިގްނަލް ކެނޑުމުގެ ސަބަބުން، ޕައިލެޓުންނަށް ޖެހުނީ ނެވިގޭޝަންގެ އެހެން ނިޒާމެއް ބޭނުން ކުރާށެވެ.

މި ހަމަލާގެ ފަހަތުގައި އޮތީ ރަޝިޔާ ކަމަށް ބެލެވޭ އިރު، މިއީ ސީދާ ހީލީ އަށް އަމާޒުކޮށް ދިން ހަމަލާއެއްކަން އަދި ކަށަވަރެއް ނުވެ އެވެ. ނަމަވެސް، އެ ބޯޓު ދަތުރު ކުރި މަގު ފްލައިޓް ޓްރެކިން ވެބްސައިޓް ތަކުން ފެންނަން ހުރި ކަމަށް ރިޕޯޓްތައް ބުނެ އެވެ.

މި ހާދިސާ ހިނގާފައި މި ވަނީ، ކަޅު ކަނޑުގެ މަތިން ދަތުރު ކުރި އިނގިރޭސި ޖާސޫސީ ބޯޓަކަށް ރަޝިޔާގެ ދެ ހަނގުރާމަ މަތީ ބޯޓަކުން ނުރައްކާތެރި ގޮތަކަށް ހުރަސް އެޅި މައްސަލައެއް ފެންމަތިވިތާ އެއް ދުވަސް ފަހުންނެވެ. މިދިޔަ މަހު ހިނގި އެ ހާދިސާގައި ރަޝިޔާގެ ސޫ-35 މަރުކާގެ ބޯޓެއް އިނގިރޭސި ބޯޓާ މާ ކައިރިން ދަތުރު ކުރުމުގެ ސަބަބުން، ބޯޓުގެ އެމަޖެންސީ ސިސްޓަމްތައް މަސައްކަތްކޮށް އޮޓޯ ޕައިލެޓް ވަނީ ކެނޑިފަ އެވެ.

މީގެ އިތުރުން ރަޝިޔާގެ ސޫ-27 ޖެޓަކުން ވަނީ އިނގިރޭސި ބޯޓުގެ ކުރިމަތިން ހަ ފަހަރެއްގެ މަތިން ދަތުރު ކޮށްފަ އެވެ. ބައެއް ފަހަރު ބޯޓުގެ އިންޖީނާ އެންމެ 19 ފޫޓު ކައިރިން ވެސް އެ ބޯޓު ދަތުރު ކުރި ކަމަށް ރިޕޯޓުތައް ބުނެ އެވެ.

ޑިފެންސް ސެކްރެޓަރީ ހީލީ ވަނީ ރަޝިޔާގެ މި އަމަލު ތަކަކީ ބަލައި ގަނެވޭނެ ކަންކަމެއް ނޫން ކަމަށް ވިދާޅުވެ، އެ ހާލަތުގައި އިނގިރޭސި އެއާ ފޯސްގެ ފްލައިޓް ކުރޫ އިން ދެއްކެވި ހުށިޔާރު ކަމަށް ތައުރީފު ކުރައްވާފަ އެވެ. އިނގިރޭސި ޑިފެންސް މިނިސްޓްރީ އިން ބުނި ގޮތުގައި މިއީ 2022 ވަނަ އަހަރު ރަޝިޔާގެ ޕައިލެޓަކު އިނގިރޭސި ބޯޓަކަށް މިސައިލެއް ފޮނުވާލި ހާދިސާއަށް ފަހު، ރަޝިޔާގެ ފަރާތުން ފެނުނު އެންމެ ނުރައްކާތެރި އަމަލެވެ.

މިއީ އިނގިރޭސި ވަޒީރަކު ދަތުރު ކުރެއްވި ބޯޓެއްގެ ސިގްނަލް ރަޝިޔާ ކައިރިން ޖޭމްކޮށްލި ފުރަތަމަ ފަހަރެއް ނޫނެވެ. މިއަހަރުގެ ކުރީކޮޅު އޭރުގެ ޑިފެންސް ސެކްރެޓަރީ ގްރާންޓް ޝެޕްސް ދަތުރު ކުރެއްވި ބޯޓުގެ ޖީޕީއެސް ސިގްނަލް ވެސް ރަޝިޔާގެ ސަރަހައްދާ ކައިރިން ދަތުރު ކުރަނިކޮށް ވަނީ ޖޭމް ކޮށްލާފައި އެވެ. މި ހާދިސާއާ ގުޅޭ ގޮތުން އިތުރު މައުލޫމާތު ހޯދުމަށް އިނގިރޭސި ޑިފެންސް މިނިސްޓްރީ އަށް މިހާރު ވަނީ ހުށަހަޅާފައި އެވެ.