ބަނގްލަދޭޝް މެޗުގެ ޓިކެޓް 50 ރުފިޔާއާއި 100 ރުފިޔާއަށް، ޓިކެޓް ވިއްކަން ފަށާނީ މިރޭ!

ފީފާ ވަރލްޑް ކަޕް/ އޭޝިޔަން ކަޕް ޖޮއިންޓް ކޮލިފައިންގައި ބަނގްލަދޭޝްއާ ދެކޮޅަށް ރާއްޖޭގެ ޤައުމު ޓީމް ކުޅޭ މެޗުގެ ޓިކެޓް މިރޭ ވިއްކަން ފަށާނެއެވެ.

ބުދަ ދުވަހުގެރޭ ޓިކެޓް ވިއްކާނީ ރަސްމީ ސްޓޭޑިއަމްގެ އޮލިމްޕަހާ ދިމާ ގޭޓުންނެވެ. ޓިކެޓް ވިއްކަން ފަށާނީ 20:00 ގައި ކަމަށް އެފްއޭއެމްއިން މައުލޫމާތު ދެއްވިއެވެ. ޓިކެޓް ވިއްކަނީ 50 ރުފިޔާއާއި 100 ރުފިޔާއަށެވެ. ގަލޮޅު ރަސްމީ ސްޓޭޑިއަމްގެ ހާލަތުގެ ސަބަބުން މެޗަށް ވިއްކާނީ 4500 ޓިކެޓް ކަމަށް އެފްއޭއެމްއިން މައުލޫމާތުދެއްވިއެވެ. އޭގެ %20 އަށްވާ 900 ޓިކެޓް ވިއްކަން ހަމަޖެހިފައިވަނީ ބަނގްލަދޭޝްގެ ސަޕޯޓަރުންނަށެވެ.

ބަނގްލަދޭޝްއާ ދެކޮޅަށް ކުޅޭ މެޗުތަކަށް އެގައުމުގެ ސަޕޯޓަރުން ވަދެ ރަސްމީ ސްޓޭޑިއަމްގެ ކޮންޓްރޯލް ނަގައެވެ. ރާއްޖޭގެ ފުޓްބޯޅައިގެ ފޯރި ކުޑަވެ, ޤައުމީ ޓީމްގެ މެޗުތައް ބަލަން ވަންނަ ސަޕޯޓަރުންގެ އަދަދުވެސް ވަނީ މަދުވެފައެވެ. ބަނގްލަދޭޝްއާ ދެކޮޅަށް ރާއްޖޭގެ ޤައުމީ ޓީމް, ރާއްޖޭގައި ކުޅޭ މެޗު އޮންނާނީ މާދަމާއެވެ. މެޗު ފަށާނީ 16:00 ގައެވެ. ދެވަނަ ލެގު ބަނގްލަދޭޝްގައި ކުޅޭނީ މިމަހުގެ 17 ވަނަ ދުވަހުއެވެ.