ރާއްޖޭގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާ، އަދި ޤައުމީ ފުޓުބޯޅަ ޓީމުގެ ކުރީގެ ކެޕްޓަން އަލީ އަޝްފާޤު (ދަގަނޑޭ) ކަކުލުގެ އޮޕަރޭޝަނެއް ކޮށްފި އެވެ.
މިވަގުތު ރަސްމީ ފުޓުބޯޅަ ކުޅުމާ ދުރުގައި ހުރި ދަގަނޑޭ، ކަކުލުގެ އޮޕަރޭޝަނެއް ކޮށްފައި ވަނީ އިންޑިއާގެ ބެންގަލޫރުގަ އެވެ. މިފަހަކަށް އައިސް ދަގަނޑޭ އަށް ވަނީ އަނިޔާގެ މައްސަލައާ ކުރިމަތިލާން ވެސް ޖެހިފަ އެވެ. އެންމެ ފަހުން ކުރިއަށް ދިޔަ ސަރަހައްދީ ފުޓުބޯޅަ މުބާރާތް (ސާފް ޗެމްޕިއަންޝިޕްް) ވެސް ދަގަނޑޭ އަށް ގެއްލުނީ އަނިޔާ އިން ރަނގަޅު ނުވާތީ އެވެ.
މިދިޔަ ސީޒަަންގެ ޕްރެޒިޑެންޓްސް ކަޕް ފުޓުބޯޅަ މުބާރާތުގެ ތެރެއިން ލިބުނު އަނިޔާއެއްގެ ސަބަބުން ދަގަނޑޭ ހުންނަނީ ކުޅުމާ ދުރު އެވެ. ދަގަނޑޭ ވަނީ މިހާތަނަށް ރާއްޖޭގެ ޤައުމީ ޓީމަށް ކުޅެދިން 98 މެޗުން 58 ލަނޑު ޖަހައިފަ އެވެ. ޤައުމީ ޓީމާ އެކު އޭނާ ވަނީ 2008 ވަނަ އަހަރުގެ ސާފް ޗެމްޕިއަންޝިޕް ވެސް ކާމިޔާބު ކޮށްފަ އެވެ.
ޤައުމީ ޓީމުގެ އިތުރުން، ކުލަބު ފެންވަރުގައި ވެސް ދަގަނޑޭ ވަނީ ގިނަ ކާާމިޔާބީތަކެއް ހޯދައިފަ އެވެ. މީގެ ކުރިން ދަގަނޑޭ ވަނީ ބޭރު ޤައުމެއްގައި ކުލަބަކަށް ވެސް ކުޅެފަ އެވެ. އުމުރުން މިހާރު 39 އަހަރުވެފައިވާ ދަގަނޑޭ އަކީ، ފުޓުބޯޅައިގެ ގިނަ ރެކޯޑު ތަކެއް ހޯދާފައިވާ، ދިވެހިން ފަޚުރުވެރިވާ ކުޅުންތެރިޔެކެވެ.
