ދަގަނޑޭ އަލުން އެނބުރި ޤައުމީ ޓީމަށް

ރާއްޖޭގައި މިހާތަނަށް އުފެދުނު އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާޤު (ދަގަނޑޭ) އަލުން އެނބުރި ރާއްޖޭގެ ސީނިއާ ޤައުމީ ޓީމުގައި ހިމެނިއްޖެ އެވެ.

އުމުރުން 40 އަހަރުގެ ދަގަނޑޭ އަލުން ޤައުމީ ޓީމުގައި ހިމަނާފައި މި ވަނީ، އޭޝިއަން ކަޕް ކޮލިފިކޭޝަންގައި ރާއްޖެ އިން ޓިމޯ ލެސްޓޭއާ ދެކޮޅަށް ކުޅޭ މެޗަށެވެ. އެ މެޗަށް ރާއްޖެ އިން އެކުލަވާލި 26 ކުޅުންތެރިންގެ ޕްރެލިމިނަރީ ސްކޮޑުގައި ދަގަނޑޭ ވަނީ ހިމަނައިފަ އެވެ.

ގަލޮޅު ދަނޑުގައި މާޗު މަހުގެ 31 ވަނަ ދުވަހު ރާއްޖެ އިން ޓިމޯ ލެސްޓޭއާ ދެކޮޅަށް ކުޅޭ މެޗުގެ ފަރިތަކުރުންތައް ހޮނިހިރު ދުވަހުގެ ރޭ ފަށާފައިވާާއިރު، ދަގަނޑޭ ވެސް ވަނީ ފަރިތަކުރުން ތަކުގައި ބައިވެރިވެފަ އެވެ.

އެންމެ ފަހުން ދަގަނޑޭ ޤައުމީ ޓީމަށް މެޗެއް ކުޅެފައި ވަނީ 2023 ވަނަ އަހަރު އެވެ. އެގޮތުން ލ.އަތޮޅު ގައި ރާއްޖެ އިން ޕާކިސްތާންއާ ދެކޮޅަށް ކުޅުނު ބައިނަލްއަޤުވާމީ ރަޙުމަތްތެރިކަމުގެ މެޗުގައި ދަގަނޑޭ ކުޅުނުއިރު، އޭގެ ފަހުން މިވީ މުއްދަތުގައި ދަގަނޑޭ ޤައުމީ ޓީމުގައި ހިމެނިފައި ނުވެ އެވެ. 

ޤައުމީ ޓީމުން ދަގަނޑޭ އަށް ޖާގަ ލިބުނުއިރު، މިފަހަރުގެ ސީޒަންގައި ދަގަނޑޭ ވަނީ ނިއު ރޭޑިއަންޓް ސްޕޯޓްސް ކުލަބުގެ ޖާޒީގައި ކުޅެފަ އެވެ. އެގޮތުން ދަގަނޑޭ ކުޅުނު މެޗު ތަކުގައި އޭނާ ވަނީ ރަނގަޅު ކުޅުމެއް ވެސް ދައްކައިފަ އެވެ. ޤައުމީ ޓީމުން ދަގަނޑޭ އަށް ޖާގަ ލިބުމުން ނިއު ރޭޑިއަންޓް އިން ވަނީ އެކަމަށް މަރުޙަބާ ކިޔައިފަ އެވެ. 

އެގޮތުން ނިއު ރޭޑިއަންޓްގެ ޗެއާމަން އަޙުމަދު މުބީން ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައި ވަނީ، ތިން އަހަރަށް ފަހު ދަގަނޑޭ ޤައުމީ ޓީމުގައި ހިމެނުމަކީ ބޮޑު އުފަލެއް ކަމަށެވެ. މުބީން ވިދާޅުވީ އެއީ ދަގަނޑޭގެ ބުރަ މަސައްކަތާއި، ހިތްވަރުގެ ނަތީޖާ ކަމަށެވެ. އެއާ އެކު މުބީން ވަނީ ޤައުމު ތަމްސީލު ކުރުމުގެ ދަތުރުގައި ދަގަނޑޭ އަށް ކާމިޔާބަށް ވެސް އެދިވަޑައިގެންފަ އެވެ.

 ޤައުމީ ޓީމުގެ އިތުރުން ކުލަބު ފެންވަރުގައި ވެސް ގިނަ ކާމިޔާބީ ތަކެއް ހޯދާފައިވާ ދަގަނޑޭ އަކީ ރާއްޖޭގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާ އެވެ.