އާދިއްތަ ދުވަހުގެ މެންދުރަށް ތަވާލު ކުރި ޖަލްސާ ކެންސަލް ކޮށްފި
މަޖިލީހުގެ ނައިބު ރައީސް ކަމުން އަހުމަދު ނާޒިމް ވަކިކުރުމުގެ މައްސަލަ އެޖެންޑާކޮށްފައި ވަނިކޮށް، އޭނާ ވަނީ އެ މަގާމުން އިސްތިއުފާ ދެއްވާފަ. މިކަމާ ގުޅިގެން އާދިއްތަ ދުވަހުގެ މެންދުރު ބޭއްވުމަށް ތާވަލުކުރި ޖަލްސާ ކެންސަލްކޮށް، ދެން ޖަލްސާއެއް އޮންނާނީ ހޯމަ ދުވަހު ކަމަށް މަޖިލީހުގެ އިދާރާއިން ވަނީ ބުނެފަ. ބެލެވޭ ގޮތުގައި ހޯމަ ދުވަހުގެ ޖަލްސާއަކީ ހުސްވެފައިވާ ނައިބު ރައީސްގެ މަގާމަށް ބޭފުޅަކު އިންތިހާބު ކުރުމަށް ބާއްވާ ޖަލްސާ އެއް.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ | ރާއްޖެއެމްވީ
ރައްޔިތުންގެ މަޖިލީހުގެ ޖަލްސާއެއް އާދިއްތަ ދުވަހުގެ މެންދުރުފަހަށް ތަވާލު ކުރުމަށްފަހު އެ ޖަލްސާ ކެންސަލް ކޮށް، ހޯމަ ދުވަހު ޖަލްސާއެއް ބާއްވާނެ ކަމަށް މަޖިލީހުގެ އިދާރާ އިން ބުނެފި އެވެ.
ރައްޔިތުންގެ މަޖިލީހުގެ ނައިބު ރައީސްގެ މަގާމުން ދިއްގަރު ދާއިރާގެ މެންބަރު އަހްމަދު ނާޒިމް ވަކިކުރުމަށް ބޭއްްވި ޖަލްސާގެ ކުރިން ނާޒިމް އެ މަގާމުން އިސްތިއުފާ ދެއްވާފައިވާތީ އެ ޖަލްސާ ވަނީ ކުރުކޮށްލާފަ އެވެ.
އާދިއްތަ ދުވަހުގެ ހެނދުނު 9:00 އަށް މަޖިލީހުގެ ޖަލްސާއެއް އެޖެންޑާ ކޮށްފައި ވަނީ, މަޖިލީހުގެ ނައިބު ރައީސް ކަމުން އަހުމަދު ނާޒިމް ވަކިކުރުމަށް ހުށަހަޅާއިފަވާ މައްސަލައިގައި ގޮތެއް ނިންމުމަށެވެ. އެ ޖަލްސާ ފަށަން 30 އަކަށް މިނެޓަށް ވެފައި ވަނިކޮށް ނާޒިމް ވަނީ މަޖިލީހުގެ ނައިބު ރައީސްގެ މަގާމުން އިސްތިއުފާ ދެއްވައިފަ އެވެ.
އާދިއްތަ ދުވަހުގެ ޖަލްސާ ފައްޓަވަމުން ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވަނީ ނާޒިމް ވަކިކުރުމުގެ މައްސަލަ އެޖެންޑާކޮށްފައި ވަނިކޮށް ގާނޫނުއަސާސީގައިވާ ގޮތުގެ މަތިން ނާޒިމް އެ މަގާމުން އިސްތިއުފާ ދެއްވާފައިިވާ ކަމަށާ އެހެންކަމުން އެ މައްސަލަ ނިމުނީ ކަމަށް ވިދާޅުވެ އެކަން އިއުލާނު ކުރައްވާފަ އެވެ.
އެޖެންޑާގައި އިތުރު ކަމެއް ނެތުމާއެކު ޖަލްސާ ނިންމާލައްވަނީ ކަމަށް އިއުލާނު ކުރެއްވުމަށް ފަހު އަބްދުއްރަހީމް ވަނީ އާދިއްތަ ދުވަހުގެ މެންދުރު 1:00 ގައި މަޖިލީހުގެ އިތުރު ޖަލްސާއެއް އޮންނާނެ ކަމަށް ވިދާޅުވެފަ އެވެ.
ނަމަވެސް މަޖިލީހުގެ އިދާރާއިން މިހާރު ވަނީ މެންދުރުގެ ޖަލްސާ ނޯނާނެކަމަށް ބުނެފަ އެވެ. މަޖިލީހުގެ އިދާރާ އިން މީޑިއާތަކަށް ބުނީ ދެން މަޖިލީހުގެ ޖަލްސާ އެއް އޮންނާނީ 1 ޖޫން ވާ ހޯމަ ދުވަހު ކަމަށެވެ. ބެލެވޭ ގޮތުގައި އާދިއްތަ ދުވަހުގެ މެންދުރު ބޭއްވުމަށް ތާވަލު ކުރި ޖަލްސާ އަކީ މިހާރު ހުސްވެފައިވާ މަޖިލީހުގެ ނައިބު ރައީސްގެ މަގާމަށް މީހަކު އިންތިހާބު ކުރުމަށް ބާއްވާ ޖަލްސާ އެކެވެ.
ހިނގަމުން ދާ 2026 ވަނަ އަހަރުގެ ފުރަތަމަ ދައުރު މި މަހުގެ 15 އަށް ހަމަވި ނަމަވެސް މުއްހިމު މަސައްކަތްތަކެއް ހުރި ކަމަށް ބުނެ މި މަހުގެ ނިޔަލަށް މި ދައުރު ވަނީ ދަންމާލާފަ އެވެ.
