މަޖިލީހުގެ ނައިބު ރައީސްކަމުން ނާޒިމް ވަކިކުރުމާ ގުޅޭ ޖަލްސާ އާދިއްތަ ދުވަހަށް ތާވަލްކޮށްފި
28 މެއި 2026 | ބުރާސްފަތި 13:35ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމްގެ އިތުބާރު ނެތްކަމުގެ މައްސަލަ ޕީއެންސީގެ 73 މެންބަރުންގެ ސޮޔާއެކު ހުށަހެޅީ، އަމިއްލައަށް އިސްތިއުފާ ދެއްވުމަށް އެންގުމުން އެކަމަށް އިންކާރު ކުރެއްވުމާ ގުޅިގެން. މި މައްސަލައިގައި ޖަވާބުދާރީވުމަށް ނާޒިމަށް 14 ދުވަހުގެ ނޯޓިސް ދީފައިވާއިރު، އޭނާ ވަކިކުރުމަށް ފާސްކުރަން ބޭނުންވަނީ ވޯޓުގައި ބައިވެރިވާ މެންބަރުންގެ އަގުލަބިއްޔަތުން. ނާޒިމް ގެންދަވަނީ ސިއްރިއްޔާތުގައި ރައީސުލްޖުމްހޫރިއްޔާގެ އިތުބާރު ނެތްކަމުގެ ވޯޓެއް ނެގުމަށް މަސައްކަތް ކުރައްވަމުން ކަމަށް ޕީއެންސީގެ ބައެއް މެންބަރުން ތުހުމަތު ކުރޭ.
މަޖިލީހުގެ ނައިބު ރައީސް ނާޒިމާއި ރައީސް މުއިއްޒު | ރައީސް އޮފީސް
ރައްޔިތުންގެ މަޖިލީހުގެ ނައިބު ރައީސް ކަމުގެ މަގާމުން ދިއްގަރު ދާއިރާގެ މެންބަރު އަހްމަދު ނާޒިމް ވަކިކުރުމާ ގުޅޭ ގޮތުން ގޮތެއް ނިންމުމަށް ބާއްވާ ޖަލްސާ އަންނަ އާދިއްތަ ދުވަހަށް ތާވަލުކޮށްފި އެވެ.
"ރާއްޖެއެމްވީ" އަށް މައުލޫމާތު ލިބިފައިވާ ގޮތުގައި، ނާޒިމްގެ އިތުބާރު ނެތް ކަމަށް ބުނެ ހުށަހަޅާފައިވާ ގަރާރާ މެދު ގޮތެއް ނިންމުމަށް އާދިއްތަ ދުވަހު ޖަލްސާ އޮންނާނެކަން މަޖިލީހުގެ އިދާރާއިން މިހާރު ވަނީ މެންބަރުންނަށް އަންގާފަ އެވެ.
ވެރިކަންކުރާ ޕީއެންސީގެ ޕާލިމަންޓްރީ ގްރޫޕުން މި މަހުގެ 13 ވަނަ ދުވަހު ބޭއްވި ބައްދަލުވުމެއްގައި ނާޒިމަށް އިތުބާރު ނެތް ކަމަށް ނިންމައި، އޭނާ މަގާމުން ވަކިކުރުމުގެ މައްސަލަ މަޖިލީހަށް ހުށަހެޅީ މި މަހުގެ 14 ވަނަ ދުވަހު އެވެ. ޕީއެންސީގެ 73 މެންބަރުންގެ ސޮޔާއެކު ހުށަހެޅި މި މައްސަލައިގައި، މަޖިލީހުގެ ގަވާއިދާ އެއްގޮތަށް 14 ދުވަހުގެ ނޯޓިސް ނާޒިމަށް ވަނީ ދީފަ އެވެ.
މަޖިލީހުގެ ގަވާއިދު ބުނާގޮތުން، ނޯޓިސްގެ މުއްދަތު ހަމަވުމަށްފަހު އެންމެ އަވަހަށް އަންނަ ރަސްމީ ދުވަހެއްގައި އެ މައްސަލައަކާ މެދު ގޮތެއް ނިންމުމަށް ޖަލްސާއެއް ބާއްވަން ޖެހެ އެވެ. ނާޒިމަށް ދިން ނޯޓިސްގެ މުއްދަތު މި މަހުގެ 29 ވާ ހުކުރު ދުވަހަށް ހަމަވާއިރު، އޭގެ ފަހުން ދެން އެންމެ އަވަހަށް އަންނަ ރަސްމީ ދުވަހަކީ އަންނަ އާދިއްތަ ދުވަ ހެވެ. މި މައްސަލައިގައި ގޮތެއް ނިންމުމަށްޓަކައި، މި މަހުގެ 14 ގައި ޗުއްޓީއަށް ދާން އޮތް މަޖިލީހުގެ މި ދައުރު ވަނީ މި މަހުގެ ނިޔަލަށް ދިގުދަންމާލާފަ އެވެ.
މަޖިލީހުގެ އިދާރާ އިން މެންބަރުންނަށް ފޮނުވި ސިޓީގައި ބަޔާންކޮށްފައިވާ ގޮތުގައި، އާދިއްތަ ދުވަހުގެ ޖަލްސާގެ އެޖެންޑާގައި އޮންނާނީ ގަވާއިދުގައިވާ ގޮތުގެ މަތިން ނާޒިމް ވަކިކުރުމުގެ މައްސަލަ އެވެ. މަޖިލީހުގެ ރައީސް ރިޔާސަތު ބަލަހައްޓަވަން ޖެހޭ މި ޖަލްސާގައި ނާޒިމް މަގާމުން ވަކިވާނީ، ވޯޓުގައި ބައިވެރިވާ މެންބަރުންގެ އަގުލަބިއްޔަތުން އެ ގަރާރު ފާސްވުމުންނެވެ. މި ވަގުތު ޕީއެންސީގެ ޕާލިމަންޓްރީ ގްރޫޕުގައި މަޖިލީހުގެ ރައީސް އަބްދުއްރަހީމް އަބްދުﷲ އާއި ނާޒިމް ނުހިމެނޭހެން 72 މެންބަރުން އެބަތިއްބެވި އެވެ. ޖަލްސާ އޮންނާތީ އެ ދުވަހު މާލޭގައި ތިބުމަށް ޕީއެންސީގެ މެންބަރުންނަށް މިހާރު ވަނީ އަންގާފަ އެވެ.
ޕީއެންސީގެ އިސް މެންބަރަކު މީގެ ކުރިން ވިދާޅުވެފައިވާ ގޮތުގައި، ނާޒިމް ވަކިކުރަން ހުށަހެޅީ އަމިއްލައަށް އިސްތިއުފާ ދެއްވުމަށް އެންގުމުން އެކަމަށް އިންކާރު ކުރެއްވުމާ ގުޅިގެންނެވެ. ޕީއެންސީގެ ބައެއް މެންބަރުން ތުހުމަތު ކުރާ ގޮތުގައި، ނާޒިމް ގެންދަވަނީ ޕާޓީގެ 23 މެންބަރަކާއެކު ޕާޓީ ބަދަލުކުރައްވައި، ރައީސުލްޖުމްހޫރިއްޔާގެ އިތުބާރު ނެތްކަމުގެ ވޯޓެއް ނެގުމަށް ސިއްރިއްޔާތުގައި މަސައްކަތް ކުރައްވަމުންނެވެ.
