ރައްޔިތުންގެ ތަނަވަސްކަން އިތުރު ކުރުމަށް ގެންނަން ޖެހޭ ސިޔާސަތުތައް ގެނެސް، އެ މަސައްކަތް ހަމައެކަނި ކުރެވޭނީ އަޅުގަނޑަށް: ކުރީގެ ރައީސް ނަޝީދު
31 މެއި 2026 | އާދީއްތަ 06:19އއ. އުކުޅަހުގައި ބޭއްވި ބައްދަލުވުމެއްގައި ކުރީގެ ރައީސް ނަޝީދު ވިދާޅުވީ، ރައްޔިތުންގެ އާމްދަނީ ދެގުނަ ކުރުމުގެ ގާބިލްކަން ހުރީ ހަމައެކަނި އެމަނިކުފާނުގެ ކިބައިގައި ކަމަށާއި އެމްޑީޕީގެ ސިޔާސަތުތަކާއެކު އެކަން ތަންފީޒު ކުރައްވާނެ ކަމަށް. ރާއްޖޭގެ ތަރައްގީގެ މަޝްރޫއުތައް ކުރިއަށް ގެންދަންވާނީ ރައްޔިތުންގެ މަޝްވަރާއާއެކު މާލީ އަދި އިޖުތިމާއީ ފައިދާއަށް ބަލައިގެންކަން ފާހަގަކުރައްވައި، ޕާޓީ ހިންގުމުގެ ވައްޓަފާޅި ބަދަލުކުރަން ޖެހޭ ކަމަށްވެސް އެމަނިކުފާނު ވިދާޅުވި. އެހެންކަމުން، ގައުމަށް ބޮޑު ބަދަލެއް ގެނައުމަށްޓަކައި އެމަނިކުފާނަށް ފުރުސަތު ދިނުމަށް ނަޝީދު ވަނީ އެދިވަޑައިގެންފައި.
ބޮޑު ބަދަލު ކެންޕޭނަށް ކުރީގެ ރައީސް މުހައްމަދު ނަޝީދު އއ.އުކުޅަހަށް ވަޑައިގެންނެވުމުން އެރަށުގެ ރައްޔިތުން ވަނީ އެމަނިކުފާނަށް ހޫނު މަރުހަބާއެއް ދަންނަވާފައި. | އެމްޑީޕީ
ރާއްޖޭގެ ރައްޔިތުންގެ ތަނަވަސްކަން އިތުރު ކުރުމަށް ގެންނަން ޖެހޭ ސިޔާސަތުތައް ގެނެސް ތަންފީޒު ކުރުމުގެ މަސައްކަތް ކުރެވޭނީ ހަމައެކަނި އެމަނިކުފާނަށް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ބޮޑު ބަދަލު ކެންޕޭނަށް އއ. އުކުޅަހަށް ވަޑައިގަންނަވައި، އެރަށުގެ ރައްޔިތުންނާއެކު ބޭއްވެވި ބައްދަލު ކުރެއްވުމުގައި ނަޝީދު ވަނީ އއ. އަތޮޅުގެ ރަށްތަކުގައި ގެސްޓްހައުސް ވިޔަފާރިފުޅާ ވަމުންދާތީ އެކަމަށް އިޝާރާތް ކުރައްވައި ވާހަކަ ދައްކަވާފަ އެވެ.
ނަޝީދު ވިދާޅުވީ، އުކުޅަހުގައި އެއްލައްކަ ރުފިޔާ މަހެއްގެ މައްޗަށް އާމްދަނީގެ ގޮތުގައި ގާތްގަނޑަކަށް 30 މީހުން އުޅޭ ކަމަށާއި، މަސައްކަތް ކުރިއަރާއިރު، ލިބޭ އާމްދަނީ އިތުރުވާން ޖެހޭ ކަމަށެވެ. އަދި އެމްޑީޕީގެ ވެރިކަމުގައި ކުރިއަށް އޮތް 7 އަހަރުގެ ތެރޭގައި މި އާމްދަނީ ދެގުނަ ކޮށްދޭނެ ކަމަށް އެމަނިކުފާނު ވިދާޅުވި އެވެ.
ނަމަވެސް ރައްޔިތުންގެ މި ތަނަވަސްކަން އިތުރު ކުރެވޭނީ އެ ސިޔާސަތުތައް ގެނެސް، އެކަން ތަންފީޒު ކޮށްގެން ކަމަށް ނަޝީދު ވިދާޅުވި އެވެ. އެމަނިކުފާނު ވިދާޅުވީ އެ މަސައްކަތް ކުރަން ދަންނަ އޮތީ އެންމެ މުއައްސަސާއެއް ކަމަށާއި، އެއީ އެމްޑީޕީ ކަމަށެވެ. އަދި އެމަސައްކަތް ކުރުމުގެ ގާބިލްކަން ހުރީ ހަމައެކަނި އެމަނިކުފާނުގެ ކަމަށާއި، ރައްޔިތުން އެފުރުސަތު ދިނުމަށް ނަޝީދު އެދިވަޑައިގެންނެވި އެވެ.
އަޅުގަނޑު ހިތުން ކިބުރުވެރިކަމާއެކު ބުނާ ވާހަކައެއްގެ ގޮތުގައި ތިބޭފުޅުން ބަލައެއް ނުގަންނާނެ. އެހެންނަމަވެސް ދަންނަވަން ބޭނުން އަޅުގަނޑަށް މިކަންވާ އޮތީ. މި އެމްޑީޕީއާއެކު ނުކުމެ މި ދިވެހިރާއްޖެ ބަދަލުކުރަން އެ މަސައްކަތް އެއީ އަޅުގަނޑު ކުރާ ހިތްވާ މަސައްކަތެއް. ތިބޭފުޅުންނާއެކު އެމަސައްކަތް ކުރާން ހުރި މީހަކީ އަޅުގަނޑު. އެހެންވެ އަޅުގަނޑު މިތަނަށް އައިސް މިހުރީ. އެއީ ކޮންމެހެން ޕާޓްޓައިމް ވަޒީފާއެއްގެ ވާހަކަ އެއް އެކަހަލަ އެއްވެސް ވާހަކައެއް ނޫން. އަޅުގަނޑަށް ތިބޭފުޅުން ދީފައި ހުރި ގާބިލްކަން އަޅުގަނޑަށް ތިބޭފުޅުން ދީފައި ހުރި ތަޖުރިބާ ތިބޭފުޅުންނަށް ނުދޭ އެހެން މީހަކަށް. އެއީ ބައިކޮށްފައި ދިން އެއްޗެއް ނޫން. އެއީ ޖުމްލަކޮށް އަޅުގަނޑަށް ދިން އެއްޗެއް. އެހެންވީމަ މައްޗަށް ތެދުވެ މިރާއްޖޭގައި ރައީސްކަން ކުރަން ވެސް ފުރުސަތު ލިބުނީ. އެމައްޗަށް ތެދުވެ އަޅުގަނޑަށް މިރާއްޖޭގެ ރައްޔިތުން މަޖިލީހުގެ ރައީސްކަން ވެސް ކުރަން ފުރުސަތު ލިބުނީ.ކުރީގެ ރައީސް މުހައްމަދު ނަޝީދު
ރާއްޖޭގެ ތަރައްގީއަށް އިޝާރާތް ކުރައްވައި ނަޝީދު ވިދާޅުވީ މިހާރު އެމްޑީޕީ ހިންގަން ޖެހޭނީ ތަފާތު ގޮތަކަށް ކަމަށާއި، ކުރީގައި ހިންގަމުން އައިގޮތް އެކުއެކީގައި ބަދަލު ކުރަން ޖެހޭ ކަމަށެވެ. ރާއްޖޭގެ ރައްޔިތުންގެ ތަނަވަސްކަން ހޯދައިދިނުމަށްޓަކައި ޕާޓީން ކުރަން ޖެހޭ މަސައްކަތްތައް ވަރަށް ގިނަ ކަމަށާއި، އެމްޑީޕީން ޕްރޮޖެކްޓް ޑިޕާޓްމަންޓެއް ވެސް އެކުލަވާލަން ޖެހޭ ކަމަށް އެމަނިކުފާނު ވިދާޅުވި އެވެ.
ނަޝީދު ވިދާޅުވީ ކުރިއަށް އޮތްތަނުގައި ރަށްރަށުގައި ހިންގާނީ ކޮންކަހަލަ ޕްރޮޖެކްޓެއް ކަމާމެދު ރައްޔިތުންނާ މަޝްވަރާ ކޮށްގެން ކުރިއަށް ގެންދަން ޖެހޭ ކަމަށާއި، އެ ޕްރޮޖެކްޓެއް ކުރިއަށް ގެންދިއުމުން މާލީ ގޮތުންނާއި، އިޖްތިމާއީ ގޮތުން ލިބޭ ފައިދާ އާއި ގެއްލުމަށް ބަލަންޖެހޭ ކަމަށެވެ. އަދި ހުރިހާ ގޮތަކުން ދެކޮޅު ޖެހޭ ގޮތަށް ރައްޔިތުންނަށް އެންމެ ފައިދާވާ ގޮތަށް މަސައްކަތްތައް ކުރިއަށް ގެންދަންޖެހޭ ކަމަށް އެމަނިކުފާނު ވިދާޅުވި އެވެ. އަދި މިކަން ކުރެވޭނީ އެމްޑީޕީން އެމަނިކުފާއެކު ނުކުތުމުން ކަމަށް ނަޝީދު ވިދާޅުވި އެވެ.
