މީކާއިލްގެ "މައިފުނަ" ރަށުން މީކާއިލްގެ މެސެޖެއް: އިންތިޚާބެއް ނެތަސް އައްޑޫގައި އެމްޑީޕީގެ ހަރަކާތްތައް ހިނގާނެ ގޮތް ހޯދާނަން
އެމްޑީޕީގެ ޗެއަރޕަރސަންގެ މަގާމަށް ވާދަކުރައްވާ މީކާއީލް އަޙުމަދު ނަސީމް އައްޑޫ ސިޓީއަށް ކުރައްވާ ދަތުރުފުޅުގައި، އިންތިޚާބުތަކާ ދިމާކޮށް ނޫނީ ޕާޓީގެ ހަރަކާތްތައް ނުހިނގާ އޮތުމުގެ ކަންބޮޑުވުންތައް އާންމު މެންބަރުން ވަނީ ހިއްސާކޮށްފަ.
ހުޅުދޫގައި ކުރިއަށް ދިޔަ އެމްޑީޕީގެ ދޮރުން ދޮރަށް ހަރަކާތުގެ ތެރެއިން | އެމްޑީޕީ
އިންތިޚާބަކާއި ދިމާކޮށް ނޫން ގޮތަކަށް އައްޑޫގެ ހަރަކާތްތައް ހުއްޓުމަކީ އައްޑޫގެ އެންމެ ބޮޑު އެއް ކަންބޮޑުވުން ކަމަށް އިދިކޮޅު މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއަރޕަރސަންކަމަށް ވާދަ ކުރައްވާ ގަލޮޅު ދެކުނު ދާއިރާގެ މެމްބަރު މީކާއީލް އަޙުމަދު ނަސީމް ވިދާޅުވެއްޖެއެވެ.
މީކާއިލްގެ "މައިފުނަ" ރަށް ނުވަތަ މީކާއިލްގެ މަންމަގެ ރަށް ސ. ހުޅުދޫގައި ހުންނަވައި މީކާއިލްގެ ޚާއްޞަ މެސެޖެއް އޭނާ ވަނީ އައްޑޫބަހުން ހިއްސާކުރައްވާފަ އެވެ. އޭނާ އެ މެސެޖް ހިއްސާކުރެއްވީ މިހާރު އައްޑޫ އަށް ކުރައްވަމުންގެންދަވާ ދަތުރުގެ ތެރެއިން ހުޅުދޫގައި ކުރިއަށް ދިޔަ ދޮރުން ދޮރަށް ހަރަކާތަށް ފަހު ވާހަކަދައްކަވަމުންނެވެ.
ބުރާސްފަތި ދުވަހު މީދޫގައި ކުރިއަށް ދިޔަ ދޮރުން ދޮރަށް ހަރަކާތާއި ހުކުރު ދުވަހު ހުޅުދޫގައި ކުރިއަށް ދިޔަ ދޮރުން ދޮރަށް ހަރަކާތުން އިންތިޚާބަކާއި ދިމާކޮށް ނޫން ގޮތަކަށް ޕާޓީ ނުހިނގާ އޮތުމަކީ އައްޑޫގެ ބޮޑު ކަންބޮޑުވުމެއްކަން އެނގެން އޮތުމުން އެކަން ހައްލުކުރުމަށް މަސައްކަތް ކުރައްވާނެ ކަމަށް މީކާއިލް ވިދާޅުވި އެވެ. އަދި ކުރިއަށް އޮތްތަނުގައި އައްޑޫގެ އިތުރު ރަށްރަށުގެ ދޮރުން ދޮރަށް ހަރަކާތްތައް ހިންގުމަށް ހަމަޖެހިފައިވާ ކަމަށް އޭނާ ވިދާޅުވި އެވެ.
އަތޮޅުތެރޭގައި އެމްޑީޕީގެ ޙަރަކާތްތައް ވަޅުޖެހިގެން ދިއުމަށް ފުރުސަތު ނުދެއްވާނެކަމަށް މީކާއިލް ވަނީ މީގެ ކުރިން ވައުދުވެވަޑައިގަންނަވާފަ އެވެ. ދާދި ފަހުން ބޭއްވި ނޫސްވެރިންގެ ބައްދަލުވުމެއްގައި މީކާއީލް ވިދާޅުވީ، އަތޮޅު ތެރޭގައި އެމްޑީޕީގެ ޙަރަކާތްތައް މަޑުޖެހިފައިވާ ކަމުގެ ޝަކުވާ އާންމު މެމްބަރުން ކުރަމުންދާ ކަމަށާއި، އެކަން ޙައްލުކުރަން ޖެހޭ ކަމަށެވެ. އިންތިޚާބެއް ނެތަސް އައްޑޫގައި އެމްޑީޕީގެ ހަރަކާތްތައް ހިނގާނެ ގޮތް ހޯދާދެއްވާނެ މީކާއިލް ވަނީ ވިދާޅުވެފަ އެވެ.
އަތޮޅު ތެރޭގެ ރަށްރަށުގައި ހުރި އެމްޑީޕީގެ ޖަގަހަތައް ހިންގުމަށް ކުރިމަތިވެފައިވާ ގޮންޖެހުންތަކަށް އަލިއަޅުއްވާލައްވަމުން މީކާއީލް ވިދާޅުވީ، ބައެއް ރަށްރަށުގައި ޕާޓީގެ ހިންގުން ހުއްޓިފައިވަނީ އެކަށީގެންވާ ވަސީލަތްތައް ނެތުމުގެ ސަބަބުން ކަމަށެވެ. އެހެންކަމުން ޖަގަހަތައް ހިންގުމަށް ބޭނުންވާ މާލީ އެހީތެރިކަން ފޯރުކޮށްދެއްވާނެ ކަމަށް އޭނާ ވިދާޅުވިއެވެ.
ޕާޓީގެ ހިންގުމާއި ވައްޓަފާޅިއަށް ބޮޑެތި ބަދަލުތަކެއް އަންނަން ޖެހޭ ކަމަށާއި، އެ ބަދަލުތައް ގެންނާނީ ޕާޓީގެ އާންމު މެމްބަރުންގެ ލަފަޔާއި މަޝްވަރާއާ އެކުގައި ކަމަށްވެސް މީކާއީލް ފާހަގަކުރެއްވިއެވެ. ޕާޓީގެ މުސްތަގުބަލާ ގުޅޭގޮތުން ވާހަކަދައްކަވަމުން މީކާއީލް ވިދާޅުވީ، އެމްޑީޕީގެ މެމްބަރޝިޕްގައި ޒުވާނުންގެ އަދަދު އިތުރު ކުރުމަށް ގިނަ މަސައްކަތްތަކެއް ކުރަން ޖެހިފައިވާ ކަމަށެވެ.
އެކަމަށްޓަކައި ޕާޓީގެ ހިންގުމުގެ ތެރެއިން ޒުވާން މޫނުތައް ފެންނަން ޖެހޭ ކަމަށް މީކާއިލް ދަނީ ވަކާލާތުކުރައްވަމުންނެވެ. ސިޔާސީ ގޮތުން ކުރިމަގު ހޯދަން ބޭނުންވާ ފަރާތްތަކަށް އެ ފުރުސަތު ފަހިކޮށްދެއްވާނެ ކަމަށާއި، ޕާޓީގެ ހިންގުން ހަރުދަނާކޮށް މެމްބަރުންގެ އިތުބާރު ހޯދުމަކީ އެންމެ އިސް އަމާޒު ކަމުގައި މީކާއީލް ވިދާޅުވިއެވެ.
މީގެ އިތުރުން، އެމްޑީޕީގެ އާންމު މެމްބަރުންނާއި ކައުންސިލު މެމްބަރުންނަށްވެސް ޕާޓީގެ ކަންކަމުގައި ބަސް ކިޔޭނެ ފަދަ ނިޒާމެއް ގާއިމުކޮށްދެއްވާނެ ކަމަށް މީކާއީލް ވިދާޅުވިއެވެ. މީކާއީލް އިތުރަށް ވިދާޅުވީ، އޭނާގެ ޗެއަރޕަރސަންކަމެއްގައި ޕާޓީގެ އިސް ސަފުން ފުރުސަތު ހޯދަން ބޭނުންވާ ކޮންމެ މެމްބަރަކަށްވެސް އެ މަގު ފަހިވެފައި އޮންނާނެ ކަމަށެވެ.
