ވެމްކޯގެ ޖެނެރަލް މެނޭޖަރ އައިމިނަތު ފަޒްލާ ޕީއެންސީގެ ސެނެޓާއި، ޕާޓީ އިން ވެސް ވަކިވެވަޑައިގަންނަވައިފި

ވެމްކޯގެ ޖެނެރަލް މެނޭޖަރކަމުގައި ހުންނެވި އައިމިނަތު ފަޒްލާ ޕީއެންސީގެ ސެނެޓުން އިސްތިއުފާ ދެއްވުމުގެ އިތުރުން، އެ ޕާޓީ އިން ވެސް ވަކިވެވަޑައިގަންނަވައިފި އެވެ.

ފަޒްލާ އަކީ މި ސަރުކާރު ގެންނަން ވަރަށް ބޮޑަށް މަސައްކަތް ކުރެއްވި ބޭފުޅެކެވެ. އެނގިފައިވާ ގޮތުން ޕީއެންސީ އިން އެންމެ ފަހުން ބޭއްވި ސެނެޓް ބައްދަލުވުމަށް ފަހު އޭނާ ވަނީ ޕީއެންސީގެ ސެނެޓުން އިސްތިއުފާދެއްވައި، ޕާޓީ އިން ވަކިވެވަޑައިގަންނަވަން ހުށަހަޅުއްވާފަ އެވެ. 

އޭނާ ޕާޓީ އިން ވަކިވެވަޑައިގެންނެވި ވަކި ސަބަބެއް ހާމަ ނުކުރެއްވި ނަމަވެސް ޕާޓީ އިން ވަކިވެވަޑައިގަންނަވާކަން އޭނާ ވަނީ މީސްމީޑިއާގައި ހިއްސާކުރައްވާފަ އެވެ. ނަމަވެސް މިހާތަނަށް އޭނާ ހުންނެވި ވެމްކޯގެ ޖެނެރަލް މެނޭޖަރކަމުގެ މަޤާމުން ވަކިކޮށްފައި ނުވާކަން މި ނޫހަށް ވަނީ އިތުބާރު ހުރި ގޮތަކަށް މައުލޫމާތު ލިބިފަ އެވެ.

ފަޒްލާ އަކީ ޕީޕީއެމް އާއި ޕީއެންސީގެ ހަރަކާތްތަކުގައި އިސްކޮށް އުޅުއްވި ބޭފުޅެކެވެ. ކުރިން އެމްޑީޕީގެ ވެރިކަމާއި ދެކޮޅަށް ހިންގި މުޒާހަރާތަކާއި ހަރަކާތްތަކުގައި ވެސް އޭނާ ވަނީ  އިސް ދައުރެއް އަދާކުރައްވާފަ އެވެ. އޭނާ މަޤާމުން ވަކިވެވަޑައިގަންނަވާފައި މި ވަނީ ސަރުކާރު ހިންގާ ގޮތާއި ޕާޓީ ހިންގާ ގޮތާ މެދު ޕީއެންސީގެ ތެރޭގައި ނުތަނަވަސްކަން އޮތްކަމުގެ އަޑު ގަދަވެފައިވާ ދުވަސްވަރެއްގަ އެވެ.