ޗެއަރޕަރސަންގެ އިންތިޚާބުން ނުހޮވިއްޖެ ނަމަ ވަކި ބަޔަކު ބާކީ ކުރާނެ ކަމަށް ބުނާތީ މީކާއިލް ކަންބޮޑުވުން ފާޅުކުރައްވައިފި
30 މެއި 2026 | ހޮނިހިރު 19:02އެމްޑީޕީގެ އެތެރޭގެ އިންތިޚާބުތަކުގައި ވަކި ފަރާތަކަށް ތާއީދުކުރުމުން ބާކީކޮށް ފަހަތު ސަފަށް ލުމަކީ ބަލައިގަނެވޭނެ ކަމެއް ނޫން ކަމަށް ޗެއަރޕާސަން ކަމަށް ވާދަކުރައްވާ މީކާއިލް ނަސީމް ވިދާޅުވެ. މީކާއިލް ވިދާޅުވީ 2023 ވަނަ އަހަރުގެ ރިޔާސީ އިންތިޚާބު އެމްޑީޕީއަށް ގެއްލުނީ ޕާޓީގެ އާންމު މަސްލަހަތަށްވުރެ އަމިއްލަ މަންފާ އިސްކުރި ބަޔަކު ޕާޓީން ވަކިވެ ކުރި މަސައްކަތުން ކަމަށް.
"އިތުބާރު" ކެމްޕޭން ލޯންޗް ކުރުމުގެ ހަފްލާގައި ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވާހަކަ ދައްކަވަނީ | ޝިފާޒް(ސޮއްޓި)
ޗެއަރޕަރސަންގެ އިންތިޚާބުން ނުހޮވިއްޖެ ނަމަ ވަކި ބަޔަކު ބާކީ ކުރާނެ ކަމަށް ބުނާތީ އެމްޑީޕީގެ ޗެއަރޕާސަން ކަމަށް ވާދަކުރައްވާ މީކާއީލް ނަސީމް އެކަމާއި މެދު ކަންބޮޑުވުން ފާޅުކުރައްވައިފި އެވެ.
މީކާއިލް އެފަދައިން ވިދާޅުވީ އިތުބާރު ކެމްޕެއިންގެ ސައްލާގައި ވާހަކަދައްކަވަމުންނެވެ.
މީކާއިލް ވަނީ މީކާއިލް އަށް ތާއީދު ކުރާ ފަރާތްތައް ތިބެން ވާނީ ފަހަތު ސީޓުގައި ކަމަށް ދޭހަވާ މޭރުމަކުން އެމްޑީޕީގެ ގައުމީ މަޖިލީހުގައި އޭނާ އާއި ވާދަވެރި ފަރާތްތަކުން ދައްކާފައިވާ ވާހަކަތަކާއި ގުޅޭ ގޮތުން ކަންބޮޑުވުން ފާޅުކުރައްވާފަ އެވެ. ޕާޓީގެ އެތެރޭގެ އިންތިޚާބެއްގައި ވަކި ފަޅިއެއްގައި ތިބޭ މީހުން ބާކީކޮށް ފަހަތު ސަފަށް ލުމަކީ ޤަބޫލުކުރައްވާ ކަމެއް ނޫން ކަމަށް މީކާއިލް ވަނީ ވިދާޅުވެފަ އެވެ.
މީގެ އިތުރުން މީކާއިލް ވަނީ އެ މަނިކުފާނާއި އެކު ނުކުމެ ތިއްބެވީ ޕާޓީ މަގުމަތިކޮށްލުމުން ޕާޓީ ހިފަހައްޓަން މަސައްކަތް ކުރި ބޭފުޅުން ކަމަށާއި އެ ބޭފުޅުން ބާކީ ނުކުރެވޭނެ ކަމަށް ވެސް ވިދާޅުވެފަ އެވެ. މީކާއިލް ވަނީ އޭނާގެ ޗެއަރޕަރސަންކަމެއްގައި އެފަދަ ގޮތަކަށް އެއްވެސް ބަޔަކު ބާކީ ކުރުމަށް ފުރުސަތު ނުދެއްވާނެ ކަމަށް ވިދާޅުވެފަ އެވެ.
މީކާއިލް އިތުރަށް ވިދާޅުވީ އެމްޑީޕީ އަށް 2023ގެ އިންތިޚާބު ގެއްލުނީ އަމިއްލަ މަންފާ އަށް ބަޔަކު ޕާޓީގެ އާއްމު މަސްލަހަތާއި މެދު ނުވިސްނުމުގެ ސަބަބުން ކަމަށެވެ. އެގޮތުން އޭރު ޕްރައިމަރީ އިން ވީ ބަލި ޤަބޫލު ނުކުރެވިގެން ބަޔަކު، ޕާޓީ އިން ވަކިވެ، ސީދާ އެމްޑީޕީ އަށް އިންތިޚާބު ގެއްލުވާލުމަށް މަސައްކަތް ކުރި ކަމަށް މީކައިލް ވަނީ ވިދާޅުވެފަ އެވެ. އޭރު އެ މީހުން މަަސައްކަތް ކުރީ ޕާޓީ އަށް އިންތިޚާބު ގެއްލުވާލުމަށް ކަމަށް މީކާއިލް ވިދާޅުވި އެވެ.
"އެމްޑީޕީ އަށް 2023ގެ ރިޔާސީ އިންތިޚާބު ގެއްލުނީ އަޅުގަނޑުމެންގެ ތެރޭގައި ތިބި ބަޔަކު އެމްޑީޕީގެ ޕްރައިމަރީ އިން ބަލިވުމުން ބަލި ޤަބޫލު ނުކުރެވިގެން އަޅުގަނޑުމެންގެ ތެރެއިން ވަކިވެ ވަކި ޕާޓީ އެއް ހަދައި ރިޔާސީ ކެނޑިޑޭޓެއް ފީލްޑް ކުރި ހިސާބުން އަޅުގަނޑުމެންނަށް އިންތިޚާބު ގެއްލުނީ. އެކަން ކުރީ ސީދާ އެމްޑީޕީ އަށް އިންތިޚާބު ގެއްލުވާލުމަށް. އެ ބޭފުޅުން ދެ ވަނަ ބުރުގައި އެމްޑީޕީ އަށް ތާއީދު ކުރި ނަމަ ނުވަތަ، ވަކިކޮޅަކަށް ނުޖެހި ތިބި ނަމަ ވެސް އިންތިޚާބު އެމްޑީޕީ އަށް ނުގެއްލުނީސް."މީކާއިލް ވިދާޅުވި އެވެ.
ހަމައެހެންމެ އެމްޑީޕީގެ އިންތިޚާބީ މަޤާމުތަކުގައި ތިބި މީހުންނަށް މީކާއިލް ވަނީ ބިރު ނުގަނެ ހަށިފޮޅާލާފައި ނުކުމެ އެ މީހަކު ބޭނުންވާ ކެނޑިޑޭޓަކަށް އެ މީހަކު ތާއީދުކޮށްގެން ނުކުތުމަށް ގޮވާލައްވާފަ އެވެ.
