ސަރުކާރުން މި އީދަށް ނެރުނު "ދޮގު" މާލިތައް

މި ސަރުކާރުގެ ޚަރަދުކުޑަކުރުމަށް ނިންމި ނިންމުން، ވަރަށް "ސްޓްރިކްޓްލީ" ތަންފީޒު ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ވަރަށް އަޑުހަރު ކޮށް ވިދާޅުވެފަ އެވެ. އެއް ފަހަރެއް، ދެފަހަރެއް ނޫނެވެ. އެތައް ފަހަރެއްގެ މަތިން ރައީސް އެހެން ވިދާޅުވި އެވެ. މިހާރުވެސް ދަނީ ޚަރަދު ކުޑަކުރެއްވުމަށް ގިނަ މަސައްކަތްތަކެއް ކުރައްވާ ކަމަށް ވިދާޅުވަމުންނެވެ. 

އަޖައިބުވާ ކަމަކީ އެ ޚަރަދު ކުޑަކުރައްވައިގެން ވާ ފައިދާ އެއް ރައްޔިތުންނަށް ނުފެނުމެވެ. ސަރުކާރުގެ ޚަރަދުތައް ކުރާ ގޮތުގެ ތަފްސީލެއް ނޭނގެ އެވެ. ގައުމަށް ހެޔޮ ބަދަލެއް ނާދެ އެވެ. އެބުނާ ފިޔަވަޅުތަކާއެކު މީހުން މަދުކުރާ ކަމަށް ވެސް އަޑު އިވެއެވެ. ނަމަވެސް ވަރުވަރުން މީހުންނަށް ބޮޑެތި މަގާމުތައް ދޭ މަންޒަރު ފެންނައިރު، ޕީއެންސީގެ ފަރާތުން ވާދަކޮށް އިންތިޚާބުތަކުން ނާކާމިޔާބުވާ ފަރާތްތަކަށް ވެސް ދަނީ ބޮޑެތި މަގާމުތައް ދެމުންނެވެ. 

ތަކެތީގެ އަގު ދުވަހެއް ދުވަހަކަށް ބޮޑުވަމުން ދާއިރު ސަރުކާރުން ވަނީ ޚަރަދު ކުޑަކުރަން ގިނަ ފިޔަވަޅުތަކެއް އަޅާފައި ކަމަށް ބުނާ ބުނުމާ ކުރަމުންދާ އަމަލުތަކާ ދިމާނުވާކަން ހަމައެކަނި މި އީދަށް ބަލާލިއަސް ފެނިގެން ދެ އެވެ.  އަޟްޙާ ޢީދުގެ ބަރަކާތްތެރި މުނާސަބަތަކީ މުޅި އިސްލާމީ އުންމަތަށާއި، ވަކިން ޚާއްޞަކޮށް ދިވެހި އެންމެހާ ރައްޔިތުންނަށް އުފާވެރިކަމާއި، ހިތްހަމަޖެހުން އަދި އެކުވެރިކަން ގެނެސްދޭ ދުވަސްތަކެކެވެ. ރާއްޖޭގެ ހުރިހާ ކަންކޮޅުތަކެއްގައި ތިބި ރައްޔިތުން އެއްވެ، ޢާއިލާތަކާއެކު އުފާވެރި މާޙައުލެއްގައި ބައްދަލުވެ، ޢީދުގެ ސަގާފީ އަދި ޒަމާނީ އެކި ކުޅިވަރުތަކުގައި ބައިވެރިވުމަކީ ކޮންމެ މީހަކަށްމެ ލިބެންޖެހޭނެ ހައްގެކެވެ.

މިފަދަ ބޮޑެތި މުނާސަބަތުތަކުގައި ކުޑަކުދިންނާއި ބޮޑެތި މީހުން ހިނިތުންވުމާއެކު އުފާފާޅުކުރުމަކީ މުޖުތަމަޢުގެ ބަދަހިކަމަށް ކޮންމެހެން ބޭނުންތެރި ކަމަކަށް ވާތީ، ޢީދު ފާހަގަކުރުމަށް ހިންގޭ ހަރަކާތްތަކާއި ރައްޔިތުންގެ އުފާވެރިކަމާ މެދު އެއްވެސް މައްސަލައެއް ނެތެވެ. މައްސަލައަކީ މި ސަރުކާރުން ދައްކާ ވާހަކައާ އަމަލާ ދިމާ ނުވުމެވެ.  ރާއްޖޭގެ ތިން ރަށެއްގައި އެކަނި ޤައުމީ ފެންވަރުގައި ޢީދު ފާހަގަކުރަން ނިންމައި، ކައުންސިލްތަކުން ޕްރޮޕޯސަލް ހުށަހަޅަން ހުޅުވާލި ދަނޑިވަޅުގައި ވެސް ސަރުކާރުން ބާރުއެޅީ ޚަރަދު ކުޑަކުރުމަށެވެ. އެކަމަކު ގްރޭޓާ މާލެ ސަރަހައްދުގައި ހިންގާ ބޭކާރު ބޮޑެތި ޚަރަދުތަކުން ސަރުކާރުގެ ބަހާއި އަމަލާ ދިމާނުވާކަން ސާފުވެ އެވެ.

މިގޮތުން އެންމެ ފާހަގަކޮށްލެވޭ އެއް ކަމަކީ، ގްރޭޓާ މާލެ ސަރަހައްދުގައި ދިވެހިރާއްޖޭގެ ޤައުމީ ދިފާޢީ ބާރުން ވިލަރެސްކޮށްގެން، ފުލުހުންނާއި ސަރުކާރުގެ ބޮޑު 10 އެސްއޯއީ ބައިވެރިވެގެން ބާއްވާ "ޢީދު ހަވީރު 1447" ގެ ހަރަކާތްތަކެވެ. މާލެ، ހުޅުމާލެ އަދި ވިލިމާލޭގައި ތިން ހަތަރު ދުވަހަށް ބަހާލައިގެން ކުރިއަށްގެންދާ މި ހަރަކާތްތަކަށް ބޮޑެތި ބަޖެޓުތައް ހުސްކުރަމުންދާއިރު، މިއީ މިފަދަ އިޤްތިޞާދީ ދަތި ދަނޑިވަޅެއްގައި ކޮން ފަދަ ބޮޑު އިސްރާފެއްތޯ ސުވާލު އުފެދެ އެވެ. ޚަރަދު ކުޑަކުރާ ކަމަށް ބުނެ ރައްޔިތުން މޮޔަހެއްދަމުން، ދައުލަތުގެ މުއައްސަސާތަކާއި ކުންފުނިތަކުގެ ވަސީލަތްތައް މިފަދަ ކަންކަމަށް އޮއްސާލުމަކީ ހަގީގަތް ފޮރުވަން ކުރާ ކަމެކެވެ.

ޢީދު ހަވީރުގައި ބައިވެރިވާ އެސްއޯއީތަކުގެ ތެރޭގައި ސްޓެލްކޯއާއި، އެމްޑަބްލިޔުއެސްއީއާއި، ވެމްކޯއާއި، އެމްޕީއެލްއާއި، އެމްޓީސީސީއާއި، އެމްއޭސީއެލްއާއި، މިފްކޯއާއި، އާރުޑީސީއާއި، އެޗްޑީސީ އަދި އެފްޑީސީ ހިމެނެ އެވެ. މިއީ ރައްޔިތުންނަށް އަސާސީ ޚިދުމަތްތައް ފޯރުކޮށްދިނުމަށާއި، ދަރަނިތަކުން ސަލާމަތްވުމަށް ބުރަ މަސައްކަތްތަކެއް ކުރަންޖެހިފައިވާ ކުންފުނިތަކެކެވެ. މީގެން ގިނަ ކުންފުނި ތަކަކީ ގެއްލުމުގައި ހިންގާ ކުންފުނިތައް ކަން ވެސް ފާހަގަ ކުރެވެ އެވެ.

މާލޭގެ ސަލްޓަން ޕާކާއި ޖުމްހޫރީ މައިދާނުގައި ވޯޓަރ ފައުންޓެއިންތަކާއި ފޯމް ބާތު ޕޫލްތައް ހަދައި، ހުޅުމާލޭގެ ސެންޓްރަލް ޕާކާއި ހިޔާ ޕާކުގައި ވޯޓަރ ސްލައިޑްތަކާއި ރެޕަލިންގް ފަދަ ކަންކަން ކުރަން ކުންފުނިތަކުގެ ފައިސާ ބޭނުންކުރުމަކީ އެއްވެސް ހަމައެއް އޮތް ކަމެއް ނޫނެވެ. އަދި ވިލިމާލޭގެ ފުޓްބޯޅަ ދަނޑުގައި ހަތަރު ދުވަސް ވަންދެން ބާއްވާ ހަރަކާތްތަކަށް ހިނގާނެ ޚަރަދުތަކަކީ ކުންފުނިތަކުގެ މާލީ ހާލަތަށް ބަލާއިރު ބޮޑު ބުރައެކެވެ.

މީގެ އިތުރުން، ސިފައިންގެ ޔުނިފޯމްތަކާއި އޮޕަރޭޝަންތަކުގައި ބޭނުންކުރާ އެކި ކަހަލަ ހަތިޔާރުތަކާއި އެއްގަމާއި ކަނޑުމަތީގެ އުޅަނދުތައް ދައްކާލައިގެން އީދު ހަވީރުތައް ފޯރިގައްދަން އުޅުމަކީ އަސްކަރިއްޔާގެ ހައިބަތާއި މަގްސަދާ ވެސް ނުބައްދަލު ކަމެކެވެ. ގައުމީ ފެންވަރުގައި ޢީދު ފާހަގަކުރަން ރަށްރަށުން އެދުނީމާ، ޚަރަދު ކުޑަކުރުމުގެ ބަހަނާ ދައްކައި އެންމެ ތިން ރަށް ހޮވައި، މާލެ ސަރަހައްދުގައި މިހާ ބޮޑު އިސްރާފެއް ކުރުމުން ސަރުކާރުގެ ނިޔަތް ސާފުވެ އެވެ. މިއީ މާލެ ސަރަހައްދުގެ ސިޔާސީ މަންފާއަށްޓަކައި، ގައުމުގެ މާލީ ހާލަތާ މެދު ރައްޔިތުންގެ މެދުގައި އޮތް ކަންބޮޑުވުންތައް ފޮރުވަން ސަރުކާރުން ރާވައިގެން ހިންގާ ހީލަތްތެރި އަމަލެކެވެ.

ގަބޫލުކުރަމެވެ. އީދު ފާހަގަ ކުރަންޖެހެ އެވެ. މިކަން ކުރުމަށްޓަކައި އެންމެނަށް ހަމަހަމަ ފުރުސަތު ވެސް ދޭން ޖެހެ އެވެ. ނަމަވެސް، ސަރުކާރުން އިޤްތިޞާދީ އިސްލާޙީ ފިޔަވަޅުތަކުގެ ނަމުގައި މޮޅެތި ވާހަކަ ދައްކާއިރު މިފަދަ ހަގީގަތްތަކީ ވެސް ވިސްނާލުން މުހިއްމު ކަންކަމެެވެ.  މި ސަރުކާރުން ކޮންމެ ކަމެއް މި ކުރަނީ އޭގެއި ކޮންމެވެސް ގޮތަކުން ދޮގުތަކެއް ހިމަނައިގެންނެވެ. އީދެއް އަޔަސް، އެހެން ދުވަހެއް އަޔަސް، ރައްޔިތުންނަށް ކަމެއް ވިޔަސް ހައްތަހާ ވެސް ދޮގެވެ. އީދުގައި ނެރޭ މާލީގެ ބަދަލުގައި މި ސަރުކާރުން އީދަށް ވެސް "ނެރުނީ" ދޮގު ފަތިވަރެކެވެ.