އަލުން ހަނގުރާމަ ފެށުމުގެ ޤާބިލުކަން ހުރި ކަމަށް ބުނެ، އެމެރިކާ އިން އިންޒާރު ދީފި

އީރާން އާއެކު ސުލްހައިގެ އެއްބަސްވުމަކަށް އައުމަށް ކުރަމުންދާ މަސައްކަތް ތަކުގައި އަދިވެސް ކޮޅެއް ފެންނަން ނެތްއިރު، އަލުން ހަނގުރާމަ އަކަށް ދިޔުމުގެ ފުރިހަމަ ގާބިލުކަން އެމެރިކާ އަށް ލިބިގެންވާ ކަމުގެ އިންޒާރު އެމެރިކާ ސަރުކާރުން ހޮނިހިރު ދުވަހު ދީފި އެވެ.

އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ ކޮންމެ ސުލްހައިގެ އެއްބަސްވުމެއްގައި ވެސް އޭނާ ކަނޑަ އަޅުއްވާފައިވާ ރެޑް ލައިން ތަކަށް އީރާން އިން އިހުތިރާމް ކުރަން ޖެހޭނެ ކަމަށެވެ. މީގެ ތެރޭގައި އީރާން އަށް ދުވަހަކު ވެސް ނިއުކްލިއަރ ހަތިޔާރު އުފެއްދުމުގެ ފުރުސަތު ނުދިނުން ހިމެނެ އެވެ.

މި މަޝްވަރާތަކާ ގުޅޭ ގޮތުން ވައިޓް ހައުސް އިން މީގެ ކުރިން އިޝާރާތް ކޮށްފައި ވަނީ ފުރަތަމަ މަރުހަލާގެ އެއްބަސްވުމަކާ ހަމައަށް ދިޔުމަށް ޓްރަމްޕް ހުންނެވީ ވަރަށް ގާތުގައި ކަމަށެވެ. ނަމަވެސް މެދު އިރުމަތީގެ ހަމަ ނުޖެހުންތައް ނިމުމަކަށް ގެނައުމަށް އެއްބަސްވުމަކަށް އާދެވިފައިވާ ކަމަށް ދެކެވޭ ވާހަކަތައް އީރާން އިން ވަނީ ދޮގު ކޮށްފައި އެވެ. މި ހަމަނުޖެހުން ތަކުގެ ސަބަބުން ދުނިޔޭގެ އިގްތިސާދަށް ވަނީ ބޮޑެތި ލޮޅުން ތަކެއް އަރާފައި އެވެ.

އޭއެފްޕީ ނިއުސް އެޖެންސީ އަށް މައުލޫމާތު ދިން އެމެރިކާގެ މަސްދަރު ތަކުން ބުނި ގޮތުގައި، އެއްބަސްވުން އޮތީ ރައީސް ޓްރަމްޕްގެ ސޮއިގެ އިންތިޒާރުގައި އެވެ. ނަމަވެސް ހުކުރު ދުވަހު ވައިޓް ހައުސްގެ ސިޗުއޭޝަން ރޫމްގައި ދެ ގަޑިއިރަށް ކުރިއަށް ދިޔަ ބައްދަލުވުމަށް ފަހު ވެސް ޓްރަމްޕް ވަކި ގޮތެއް ނިންމަވާފައި ނުވެ އެވެ.

މި ދަނޑިވަޅުގައި ސިންގަޕޫރުގައި ބޭއްވި އޭޝިއާގެ ދިފާއީ ސަމިޓެއްގައި ބައިވެރިވެ ވަޑައިގަންނަވަމުން ޕެންޓަގަންގެ ވެރިޔާ ޕީޓް ހެގްސެތު ހޮނިހިރު ދުވަހު ވިދާޅުވީ، އެމެރިކާ އިން ބޭނުންވެއްޖެ ނަމަ އަލުން ހަނގުރާމަ ފެށުމުގެ ގާބިލުކަން އެބަ އޮތް ކަމަށެވެ. ހެގްސެތު ވިދާޅުވީ އެމެރިކާގެ ހަތިޔާރުގެ ގުދަންތައް އެކަމަށް ފުރިހަމަ އަށް ތައްޔާރު ވެފައިވާ ކަމަށާއި، ދުނިޔޭގެ އެކި ސަރަހައްދު ތަކުގައި އެމެރިކާގެ އަސްކަރީ ބާރުތައް ބެލެންސް ކޮށްފައިވާ ގޮތުން ކޮންމެ ވަގުތަކު ވެސް ހަމަލާ ދެވިދާނެ ކަމަށެވެ.

މި ވާހަކަތަކަށް ބާރުދެމުން އެމެރިކާގެ ސެންޓްރަލް ކޮމާންޑް (ސެންޓްކޮމް) އިން އެކްސްގައި ބުނެފައި ވަނީ އެމެރިކާގެ ސިފައިން މުޅި ސަރަހައްދުގައި ފާރަވެރިކަމާ އެކު ތިބި ކަމަށެވެ. ޕާކިސްތާން އިން މެދުވެރިއެއްގެ ދައުރު އަދާ ކޮށްގެން ކުރިއަށް ގެންދާ މި މަޝްވަރާ ތަކަށް ބުރޫ އެރީ، މި ހަފުތާގައި އީރާންގެ ދެކުނު ބަނދަރެއް ކަމަށްވާ ބަންދަރު އައްބާސް އަށް އެމެރިކާ އިން ދިން ހަމަލާތަކާއި، އޭގެ ރައްދުގައި އީރާން އިން ދިން ހަމަލާތަކާ ގުޅިގެންނެވެ.

މި ހަމަނުޖެހުން ތަކުގެ ތެރެއިން ވެސް ލުބުނާންގެ ހަނގުރާމަ ހުއްޓާލުމަށް ކުރާ މަޝްވަރާތައް ދަނީ ކުރިއަށެވެ. އީރާން އިން ބާރު އަޅަމުން ދަނީ ކޮންމެ ސުލްހައިގެ އެއްބަސްވުމެއްގައި ވެސް ލުބުނާންގެ މައްސަލަ ހިމެނުމަށެވެ. ހަމަ އެވަގުތު އިޒްރޭލްގެ ބޮޑުވަޒީރު ބެންޖަމިން ނަތަންޔާހޫ ވަނީ އިޒްރޭލް ސިފައިން ލުބުނާންގެ އެތެރެއަށް އިތުރަށް ވަދެފައިވާކަން އިއުލާން ކުރައްވާފައި އެވެ.

ޓްރަމްޕްގެ ސޯޝަލް މީޑިއާ ޕޯސްޓެއްގައި ވިދާޅުވި ގޮތުގައި، އީރާން އިން ދުވަހަކު ވެސް ނިއުކްލިއަރ ހަތިޔާރު ނުއުފެއްދުމުގެ އިތުރުން، ބަންދު ކޮށްފައިވާ ހޮރްމޫޒް ކަނޑުއޮޅި އަލުން ހުޅުވާލުމަކީ އޭނާ އެންމެ ބޮޑު އިސްކަމެއް ދެއްވާ ކަންތަކެވެ. ވައިޓް ހައުސްގެ އޮފިޝަލަކު ވިދާޅުވީ، ޓްރަމްޕް އެއްބަސްވުމެއްގައި ސޮއި ކުރައްވާނީ އެއީ އެމެރިކާ އަށް އެންމެ ފައިދާ ހުރި އަދި އޭނާގެ ޝަރުތުތައް ފުރިހަމަވާ އެއްބަސްވުމަކަށް ވާނަމަ އެކަނި ކަމަށެވެ.