އެމެރިކާ އިން އުސޫލު ތަކުގައި ނުހިފާއްޓާ ކަމަށް ބުނެ، އީރާންގެ ފާޑު ކިޔުން

އީރާންއާ ދެކޮޅަށް ކުރަމުން އަންނަ ހަނގުރާމަ ހުއްޓާލުމަށް ކުރަމުންދާ މަސައްކަތް ތަކުގައި ބައިވެރިވާ އެމެރިކާގެ މަންދޫބުންނަކީ އަޚުލާގީ މިންގަނޑެއް ނެތް، އަދި އުސޫލު ތަކެއްގައި ހިފަހައްޓާ ބައެއް ނޫން ކަމަށް ބުނެ އީރާންގެ އިސް އޮފިޝަލަކު އެމެރިކާ އަށް ވަރަށް ބޮޑަށް ފާޑު ވިދާޅުވެއްޖެ އެވެ.

އަލް ޖަޒީރާ އަށް މައުލޫމާތު ދެއްވަމުން އީރާންގެ ސަރުކާރުގެ އިސް މަސްދަރަކުން ވިދާޅުވީ، އެމެރިކާގެ މަޝްވަރާ ކުރާ ޓީމަކީ އެއްވެސް ސާބިތު ކަމެއް ނެތް، އަމިއްލަ އެދުމާއިގެން އުޅޭ ބައެއް ކަމަށެވެ. އަދި އެމެރިކާގެ މަންދޫބުން ކަންކަމުގައި ނިންމުންތައް ނިންމަނީ ވަކި ހަމައެއް ލަމައެއް ނެތި، ހިތަށް އެރި ގޮތަކަށް ކަމަށް ވެސް އޭނާ ތުހުމަތު ކުރެއްވި އެވެ.

އީރާންގެ އޮފިޝަލު އިތުރަށް ފާހަގަ ކުރެއްވި ގޮތުގައި، ސުލްހައިގެ ވާހަކަ ތަކުގައި އެމެރިކާ އިން ހުށަހަޅާ ކަންކަން ވަރަށް އަވަސް އަވަހަށް ބަދަލު ކުރެ އެވެ. މިގޮތަށް ކަންތައް ކުރާ ބަޔަކާ އެކު ކުރިއަށްދާ މަޝްވަރާ ތަކެއްގައި، އެއްވެސް ކަމެއް ނިމުމަކަށް އައިސްފައިވާ ކަމަށް، ނުވަތަ "ފައިނަލް" ވެފައިވާ ކަމަށް ބުނެވެން ނެތް ކަމަށް އޭނާ ވިދާޅުވި އެވެ.

މި މޭރުމުން ވާހަކަ ދައްކަވަމުން އޭނާ ވިދާޅުވީ، އެމެރިކާގެ މަންދޫބުންގެ ފަރާތުން ފެންނަނީ އިތުބާރު ހިފޭ ފަދަ ސިޔާސީ ނުވަތަ އަޚުލާގީ އުސޫލު ތަކެއް ނޫން ކަމަށެވެ. އަދި މަޝްވަރާގެ މޭޒު މަތީގައި އެމެރިކާ އިން ގެންގުޅޭ އުސޫލު ތަކުގެ ސަބަބުން، ހަނގުރާމަ ހުއްޓާލުމަށް ކުރެވޭ މަސައްކަތް ތަކަށް ހުރަސް އެޅެމުންދާ ކަމުގެ އިޝާރާތެއް އޭނާ ވަނީ ކުރައްވާފައި އެވެ.

މި މައުލޫމާތުތައް އާންމުވެފައި މިވަނީ އީރާންގެ ހަނގުރާމަ ހުއްޓާލުމަށް ބައިނަލްއަގުވާމީ މުޖުތަމައުން ބާރު އަޅަމުންދާ ދަނޑިވަޅެއް ގައެވެ. ނަމަވެސް މަޝްވަރާ ތަކުގައި ބައިވެރިވާ މުހިންމު ފަރާތް ތަކުގެ މެދުގައި އުފެދިފައިވާ މިފަދަ ޚިޔާލު ތަފާތުވުން ތަކުގެ ސަބަބުން، ދާއިމީ ސުލްހަ އަކަށް ދިއުމަށް ކުރާ އުންމީދު ތަކަށް ވަނީ ހިޔަނި އެޅިފައި އެވެ.

އީރާންގެ ފަރާތުން މިފަދަ ބަހުގެ ހަމަ ލާތަކެއް އެމެރިކާ އަށް އަމާޒު ކޮށްފައިވާ އިރު، މީގެ ކުރިން ވެސް އެމެރިކާ އިން އިޒްރޭލް އަށް ތާއީދުކޮށް މަޝްވަރާ ތަކުގެ މިސްރާބު ބަދަލު ކުރާ ކަމުގެ ޝަކުވާ އެކި ފަރާތް ތަކުން ވަނީ އުފުލާފައި އެވެ.