މެދު އިރުމަތި އޮތީ ހަނގުރާމަ އާއި ސުލްޙައާ ދެމެދު ނުރައްކާތެރި ފައްތަރެއްގައި: ކަލާސް

މެދު އިރުމަތީގެ މަސްރަހު މިހާރު އޮތީ ހަނގުރާމަ އާއި، ސުލްޙައާ ދެމެދު ނުރައްކާތެރި ފައްތަރެއްގައި ކަމަށް، ޔޫރަޕިއަން ޔޫނިއަންގެ ޚާރިޖީ ސިޔާސަތާ ބެހޭ އިސްވެރިޔާ ކާޖާ ކަލާސް ވިދާޅުވެއްޖެ އެވެ.

އެމެރިކާ އާއި އީރާންއާ ދެމެދު އުފެދިފައިވާ ނުތަނަވަސްކަމުގެ ސަބަބުން މެދު އިރުމަތީގެ މަސްރަހު ގޯސްވެފައިވާ އިރު، އެ ހަމަ ނުޖެހުންތައް އިތުރަށް ފުޅާވެގެން ދިއުމަކީ ބައިނަލްއަގުވާމީ މުޖުތަމު އަށް އޭގެ ނޭދެވޭ އަސަރު ކުރާނެ ކަމެއް ކަމަށް އޭނާ ފާހަގަ ކުރެއްވި އެވެ.

އީރާން އާއި އިޒްރޭލްއާ ދެމެދު އުފެދިފައިވާ ނުތަނަވަސްކަމާ ގުޅޭ ގޮތުން ވާހަކަ ދައްކަވަމުން ކަލާސް ވިދާޅުވީ، މި ހަނގުރާމަ ދިގުލައިގެން ދިއުމަކީ އެމެރިކާ އާއި އިޒްރޭލް އަށް އަދި ސަރަހައްދީ އެހެން ގައުމު ތަކަށް ވެސް ފައިދާ ހުރި ކަމެއް ނޫން ކަމަށެވެ. އޭނާ ވަނީ މަސްރަހު ފިނި ކުރުމަށްޓަކައި ހުރިހާ ފަރާތް ތަކަކުން ވެސް މަސައްކަތް ކުރަން ޖެހޭ ކަމަށް ގޮވާލައްވައިފަ އެވެ. 

ކަލާސްގެ މި ބަޔާނަކީ މެދު އިރުމަތީގައި ހިނގަމުންދާ ހަމަ ނުޖެހުންތައް ބޮޑު ހަނގުރާމަ އަކަށް ބަދަލު ވެދާނެ ކަމުގެ ބިރު އޮތް ދަނޑިވަޅެއްގައި ދެއްވި އިންޒާރެކެވެ. ޚާއްސަކޮށް އީރާންގެ ނިއުކްލިއާ މަރުކަޒު ތަކަށާއި، ތެޔޮ އުފައްދާ ތަން ތަނަށް އަމާޒުކޮށް ހަމަލާ ދީފާނެ ކަމުގެ ބިރު އޮތުމަކީ ވިލާތުގެ އިއްތިހާދުން ނުހަނު ކަންބޮޑުވާ ކަމެއްގެ ގޮތުގައި އޭނާ ސިފަ ކުރެއްވި އެވެ.

މީގެ އިތުރުން، ބައިނަލްއަގުވާމީ ގާނޫނު ތަކަށް އިހުތިރާމް ކުރުމަށާއި، އިތުރު ލޭ އޮހޮރުވުމަކަށް ފުރުސަތު ނުދިނުމަށް ވިލާތުގެ އިއްތިހާދުން ބާރު އަޅާނެ ކަމަށް ކަލާސް ވިދާޅުވި އެވެ. އޭނާ ވިދާޅުވި ގޮތުގައި މިހާރު އޮތް ނުރައްކާތެރި ހާލަތުން އަރައި ގަނެވޭނީ ހުރިހާ ފަރާތް ތަކަކުން ވެސް ކެތްތެރިކަން އިސްކޮށް، ސިޔާސީ ހައްލަކަށް މަސައްކަތް ކޮށްގެންނެވެ.

ކާޖާ ކަލާސް މި މަގާމާ ހަވާލުވެ ވަޑައި ގަތުމަށްފަހު އެންމެ އިސްކަމެއް ދެއްވާ އެއް ކަމަކީ، މެދު އިރުމަތީގެ ހަމަޖެހުން ގާއިމު ކުރުން ކަމަށް ރިޕޯޓުތައް ބުނެ އެވެ. ވިލާތުގެ އިއްތިހާދުން ދަނީ މި މައްސަލައިގައި އެމެރިކާ އާއި ސަރަހައްދީ އެހެން ބާރުތަކާ އެކު މަޝްވަރާ ކުރަމުންނެވެ.