ކުވެއިތަށް އަމާޒުވި މިސައިލް, ޑްރޯން ހަމަލާތައް ހުއްޓުވައިފި

ކުވެއިތުގެ ވައިގެ ދިފާއީ ނިޒާމުން، އެ ގައުމަށް އަމާޒުވި ނުރައްކާތެރި މިސައިލްތަކާއި ޑްރޯން ހަމަލާތަކެއް ހުއްޓުވާފައިވާ ކަމަށް އެ ގައުމުގެ އަސްކަރިއްޔާއިން ބުރާސްފަތި ދުވަހު ބުނެފިއެވެ. ނަމަވެސް މި ހަމަލާތައް އައީ ކޮން ދިމާލަކުން ކަމެއް އަސްކަރިއްޔާއިން ހާމަކޮށްފައެއް ނުވެއެވެ.

އަސްކަރިއްޔާއިން ބުނި ގޮތުގައި، ގައުމުގެ އެކި ސަރަހައްދުތަކަށް ގޮވުމުގެ އަޑު އިވިފައިވަނީ ވައިގެ ދިފާއީ ނިޒާމުން އެ ހަމަލާތައް ހުއްޓުވުމުގެ ތެރޭގައެވެ. އަދި ކަމާބެހޭ އިދާރާތަކުން ނެރޭ ސަލާމަތީ އިރުޝާދުތަކަށް އަމަލުކުރުމަށް އާންމު ރައްޔިތުންނަށް އަސްކަރިއްޔާއިން ވަނީ އިލްތިމާސްކޮށްފައެވެ.

ކުވެއިތުން މި ބަޔާން ނެރެފައިވަނީ، ހޮރްމޫޒް ކަނޑުއޮޅިން ދަތުރުކުރާ އެމެރިކާގެ އަސްކަރީ ފައުޖުތަކަށާއި ވިޔަފާރި އުޅަނދުތަކަށް ނުރައްކާ ކުރަމުންދިޔަ އީރާނުގެ ޑްރޯން އޮޕަރޭޝަނަކަށް އަމާޒުކޮށް، ބުރާސްފަތި ދުވަހުގެ ކުރީކޮޅު އެމެރިކާއިން ހަމަލާތަކެއް ދީފައިވާ ދަނޑިވަޅެއްގައެވެ.

އެމެރިކާއިން ހަމަލާދިންކަން އީރާނުން ކަށަވަރުކޮށްދީފައިވާއިރު، އީރާނުން ބުނީ ބަންދަރު އައްބާސް އެއާޕޯޓް ކައިރިއަށް އެމެރިކާއިން ދިން ހަމަލާއަކާ ގުޅިގެން، ފަތިހު 4:50 (ޖީއެމްޓީން 01:20) ހާއިރު އެމެރިކާގެ އެއާ ބޭހަކަށް ހަމަލާދީފައިވާނެ ކަމަށެވެ. ނަމަވެސް އެއީ ކޮން ގައުމެއްގައި އޮތް ބޭހެއް ކަމެއް އީރާނުން ހާމައެއް ނުކުރެއެވެ.

އެމެރިކާގެ އަސްކަރީ މަރުކަޒެއް ގާއިމުކޮށްފައިވާ ކުވެއިތުން ބުނެފައިވަނީ، އެ ގައުމަށް ކުރިމަތިވި ނުރައްކާތަކަކީ އީރާނުން ދިން ހަމަލާތަކެއް ކަމަށް ސީދާ ބުނެފައެއް ނުވެއެވެ.

އެމެރިކާއާއި އިޒްރޭލުން އީރާނާ ދެކޮޅަށް ކުރި ހަނގުރާމައިގެ ތެރޭގައި، ކުވެއިތު ހިމެނޭހެން ގަލްފުގެ ގައުމުތަކަށް މިސައިލާއި ޑްރޯން ހަމަލާތައް ކުރިމަތިވެފައިވެއެވެ. މިދިޔަ އޭޕްރީލް މަހު ސުލްހައިގެ އެއްބަސްވުމަކަށް އައުމާއެކު ހަމަނުޖެހުންތައް ކުޑަވެފައިވީ ނަމަވެސް، އޭގެ ފަހުންވެސް އިރާގު މަގުން ސައުދީ އަރަބިއްޔާއާއި ކުވެއިތު ފަދަ ގަލްފުގެ ގައުމުތަކަށް އަމާޒުކޮށް ޑްރޯން ހަމަލާތައް ފޮނުވާފައިވެއެވެ.