އިރާން: އަސްކަރީ ހަނގުރާމައިން ބަލިވި ދުޝްމަނުން "ސޮފްޓް ވޯ" ގެ ޒަރީއާއިން ހަމަޖެހުން ނަގާލަން މަސައްކަތް ކުރަނީ
27 މެއި 2026 | ބުދަ 16:04އަސްކަރީ މައިދާނުގައި ނާކާމިޔާބުވުމުން، އިގްތިސާދީ ފިއްތުންތަކާއި ސައިބަރ ހަމަލާތައް މެދުވެރިކޮށް އިރާނުގެ ހަމަޖެހުން ނަގާލުމަށް ދުޝްމަނުން މަސައްކަތް ކުރަމުންދާ ކަމަށް އެ ގައުމުގެ އިންޓެލިޖެންސް މިނިސްޓްރީން ބުނެފި. އެ މިނިސްޓްރީން ނެރުނު ބަޔާނެއްގައި ބުނެފައިވަނީ، ބޭރުގެ މީޑިއާތަކާއި ޓެރަރިސްޓް ގްރޫޕްތައް ބޭނުންކޮށްގެން ގައުމީ އެއްބައިވަންތަކަން ބަލިކަށިކޮށް ފިތުނަ އުފެއްދުމަށް ރާވަމުންދާ ކަމަށް. ނަމަވެސް، ގައުމުގެ ސަލާމަތީ ބާރުތަކުން ދަނީ މިފަދަ ނުރައްކާތަކާއި ޓެރަރިޒަމްގެ އަމަލުތައް ހުއްޓުވައި ރައްދު ހަމަލާތައް ދެމުން.
ތެހެރާންގައި ބަހައްޓާފައި ހުރި އެމެރިކާއާއި އިޒްރޭލާ ދެކޮޅު ކުރެހުމެއްގެ ކައިރިން މީހުން ހިނގާފައި ދަނީ: 26 މޭ 2026 ގައި ކުރަހާފައިވާ މި މިއުރަލްއިން ފެންނަނީ މަތިންދާބޯޓު އުފުލާ މަނަވަރަކަށް މިސައިލް ހަމަލާތަކެއް އަމާޒުވާ މަންޒަރު. | ގެޓީ އިމޭޖަސް
އަސްކަރީ ހަމަލާތަކުގެ ޒަރީއާއިން ކަނޑައަޅާފައިވާ މަގްސަދުތައް ހާސިލުކުރުމުގައި ދުޝްމަނުން ނާކާމިޔާބުވުމާ ގުޅިގެން، އިގްތިސާދީ ފިއްތުންތަކާއި، ސައިބަރ ހަމަލާތަކާއި، ޓެރަރިޒަމް އަދި ނަފްސާނީ ހަނގުރާމައިގެ ޒަރީއާއިން އިސްލާމީ ޖުމްހޫރިއްޔާގެ ހަމަޖެހުން ނަގާލުމަށް ކުރާ މަސައްކަތްތައް މިހާރު ވަނީ އިތުރުކޮށްފައި ކަމަށް އިރާނުގެ އިންޓެލިޖެންސް މިނިސްޓްރީން ބުނެފިއެވެ.
ބުދަ ދުވަހު އެ މިނިސްޓްރީން ނެރުނު ބަޔާނެއްގައި ބުނެފައިވަނީ، ހަނގުރާމައިގެ މައިދާނުގައި ލިބުނު ނާކާމިޔާބީގެ ބަދަލު ހިފުމުގެ ގޮތުން، އިދިކޮޅު ބާރުތަކުން މިހާރު މަސައްކަތް ކުރަމުންދަނީ އިރާނާ ދެކޮޅަށް "ސިއްރު އިންޓެލިޖެންސް ހަނގުރާމައެއް" ވަރުގަދަކުރުމަށް ކަމަށެވެ.
"އަސްކަރީ ހަނގުރާމައިން ބަލިވި ދުޝްމަނުން މިހާރު މަސައްކަތް ކުރަމުންދަނީ 'ސޮފްޓް ވޯ' ނުވަތަ ފިކުރީ ހަނގުރާމައިގެ ތެރެއިން ކާމިޔާބީތަކެއް ހޯދުމަށް،" އެ ބަޔާނުގައި ބުނެފައިވެއެވެ.
މީގެ އިތުރުން އެ ބަޔާނުގައި ބުނެފައިވަނީ، ދާދި ފަހުން ހިނގި ހަނގުރާމައިގެ ތެރޭގައި އިރާނުގެ ސަރުކާރު ވައްޓާލުމަށާއި ގައުމު ބައިބައިކޮށްލުމަށް ދުޝްމަނުން ފާޅުގައި މަސައްކަތް ކުރި ނަމަވެސް، އަސްކަރީ ހަމަލާތަކުގެ ޒަރީއާއިން އެ މަގްސަދުތައް ހާސިލުކުރުމުގައި އެ ފަރާތްތައް ނާކާމިޔާބުވެފައިވާ ކަމަށެވެ.
އެމެރިކާއާއި އިޒްރޭލުން އިރާނާ ދެކޮޅަށް އުދުވާނީ ހަނގުރާމައެއް ފެށީ ފެބްރުއަރީ މަހުގެ 28 ވަނަ ދުވަހުއެވެ. މި ހަމަލާތަކުގައި އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީ ވަނީ ޝަހީދުކޮށްލާފަ އެވެ.
އިރާނުން ވަނީ އެ ހަމަލާތަކުގެ ބަދަލު ވަގުތުން ހިފާފައެވެ. އެގޮތުން އިޒްރޭލުން ހިފާފައިވާ ފަލަސްތީނުގެ ބިންތަކަށާއި، ސަރަހައްދީ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށާއި މަސްލަހަތު އޮތް ތަންތަނަށް ގިނަ އަދަދެއްގެ މިސައިލާއި ޑްރޯން ހަމަލާތަކެއް އިރާނުން ދީފައިވެއެވެ.
އިންޓެލިޖެންސް މިނިސްޓްރީން ބުނި ގޮތުގައި، ދުޝްމަނުން މިހާރު ބޮޑަށް އަމާޒު ހިފާފައިވަނީ ގައުމުގެ ބާރު ކަނޑުވާލުމަށްޓަކައި "ސޮފްޓް، ކޮގްނިޓިވް އަދި ހައިބްރިޑް" ހަނގުރާމައިގެ ރޭވުންތަކަށެވެ.
ދުޝްމަނުން އިސްކަންދޭ ކަންތައްތަކުގެ ތެރޭގައި، އިގްތިސާދީ ފިއްތުންތައް ވަރުގަދަކުރުމާއި، ތަކެތީގެ އަގުބޮޑުވުމާއި މުދާ މަދުވުމުގެ ނާޖާއިޒު ފައިދާ ނަގައިގެން، "ދުޝްމަނުންގެ އެޖެންޓުންނާއި ބޭރު ގައުމުތަކުގައި ތިބެގެން ފާރިސީ ބަހުން ޚަބަރު ފަތުރާ ކުލީ މީޑިއާތައް" މެދުވެރިކޮށް އާންމުންގެ މެދުގައި ހަމަނުޖެހުން އުފެއްދުން ހިމެނޭ ކަމަށް އެ ބަޔާނުގައި ފާހަގަކޮށްފައިވެއެވެ.
މީގެ އިތުރުން، އިރާނުގެ އެކި ނަސްލުތަކާއި ގާނޫނީ ގޮތުން ބަލައިގެންފައިވާ ދީންތަކުގެ މެދުގައި އޮތް ގައުމީ އެއްބައިވަންތަކަން ބަލިކަށިކުރުމަށްޓަކައި، ނަސްލީ އަދި ދީނީ ފިތުނަ އުފެއްދުމަށް ކުރާ މަސައްކަތްތަކާ މެދުވެރިކޮށް ވެސް އެ މިނިސްޓްރީން ވަނީ އިންޒާރު ދީފައެވެ.
އެ ބަޔާނުގައި ބުނެފައިވަނީ "ޒަޔަނިސްޓުންގެ އެހީތެރިކަން ލިބޭ ޓެރަރިސްޓް ގްރޫޕްތައް" ބޭނުންކޮށްގެން، އިރާނުގެ ހުޅަނގު އުތުރާއި އިރުދެކުނު ބޯޑަރު ސަރަހައްދުތަކުގައި ހަމަލާތައް ދިނުމަށާއި ގައުމުގެ ތަންތަނަށް ގެއްލުން ދިނުމުގެ އޮޕަރޭޝަންތައް ހިންގަމުންދާ ކަމަށެވެ.
މިފަދަ ގްރޫޕްތަކުން ދާދި ފަހުން ހިނގި ހަނގުރާމައިގެ ތެރޭގައި އެއްގަމު މަގުން ވަރުގަދަ ހަމަލާތަކެއް ދޭން ރޭވި ނަމަވެސް، އިންޓެލިޖެންސް އޮޕަރޭޝަންތަކުން އެމީހުން ތިބި ތަންތަން ދެނެގަނެ، އިރާނުގެ ސަލާމަތީ ބާރުތަކުން ވަނީ އެ ހަމަލާތައް ނާކާމިޔާބުކޮށްލާފައެވެ.
މީގެ އިތުރުން، މީހުން މެރުމުގެ ރޭވުންތަކާއި، ތަންތަނަށް ގެއްލުން ދިނުމުގެ އަމަލުތަކާއި، ހަތިޔާރު ވަގަށް އެތެރެކުރުމާއި، ސައިބަރ ހަމަލާތަކުގެ އިތުރުން، ސްޓާލިންކް ފަދަ މުއާސަލާތީ ވަސީލަތްތައް ގަވާއިދާ ޚިލާފަށް އެތެރެކުރުމަކީ ގައުމީ ސަލާމަތަށް އޮތް ބޮޑު ނުރައްކަލެއްގެ ގޮތުގައި އެ ބަޔާނުގައި ފާހަގަކޮށްފައިވެއެވެ.
އިރާނުގެ އިންޓެލިޖެންސް މިނިސްޓްރީން ވަނީ ބީބީސީ ޕާޝިއަން، ވޮއިސް އޮފް އެމެރިކާ އަދި އިރާން އިންޓަނޭޝަނަލް ފަދަ ބޭރުގެ ފާރިސީ މީޑިއާތަކުން އިރާނާ ދެކޮޅަށް ހިންގާ އުދުވާނީ އަމަލުތަކަށް ތާއީދުކުރާތީ އެކަން ހަރުކަށި އިބާރާތުން ކުށްވެރިކޮށްފައެވެ.
