ޓްރަމްޕްގެ އިންޒާރަށް ފަހު، އެމެރިކާ އިން އީރާން އަށް ހަމަލާ ދީފި

އީރާންއާ ދެކޮޅަށް ކުރަމުން އަންނަ މަސައްކަތް ނިންމާލާނެ ކަމަށް ވިދާޅުވެ އެމެެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވާފައި ވަނިކޮށް، އެމެރިކާ އިން އީރާން އަށް ހަމަލާ ތަކެއް ދީފި އެވެ. 

އީރާންގެ މީޑިއާ ތަކުން ރިޕޯޓު ކޮށްފައިވާ ގޮތުގައި، ބުރާސްފަތި ދުވަހުގެ ވަރަށް ހެނދުނު ބަނދަރު ޢައްބާސް ސަރަހައްދުގައި ބާރު ގަދަ ތިން ގޮވުމެއްގެ އަޑު ވަނީ އިވިފަ އެވެ. މިއީ ހަފުތާގެ ކުރީކޮޅު އެމެރިކާ އިން ދިން ހަމަލާ ތަކަށް ފަހު ދިން ހަމަލާ ތަކެކެވެ. މި ހަމަލާ ތަކުން ސުލްހައިގެ އެއްބަސްވުމަކަށް އައުމަށް ކުރަމުން އަންނަ ޑިޕްލޮމެޓިކް މަސައްކަތް ތަކުގެ ނާޒުކު ހާލަތު ފާހަގަވެ އެވެ.

އެމެރިކާގެ އިސް އޮފިޝަލަކި އޭއެފްޕީ އަށް މައުލޫމާތު ދެމުން ބުނީ،  އެމެރިކާގެ މެދުތެރޭ ކޮމާންޑް ފޯސްތަކުން ބުރާސްފަތި ދުވަހު ހޮރްމޫޒް ކަނޑު އޮޅީގެ ވަށައިގެން ނުރައްކާ ކުރި އީރާންގެ ޑްރޯން ތަކެއް ވައްޓާލާފައިވަ ކަމަށެވެ. އޭނާ އިތުރަށް ބުނެފައި ވަނީ، އެމެރިކާގެ ބާރު ތަކުން ބަނދަރު އައްބާސްގައި ހުރި އީރާންގެ ކޮންޓްރޯލް ސްޓޭޝަން އަކަށް ވެސް ހަމަލާ ދީފައިވާ ކަމަށެވެ. އޭރު އެ ސްޓޭޝަން އިން ފަސް ވަނަ ޑްރޯންއެއް ފޮނުވާލަން ތައްޔާރު ވަމުން ދިޔަ ކަމަށް ބުނެފައިވެ އެވެ. 

އަންގާރަ ދުވަހުގެ ރޭ ދިން ހަމަލާ ތަކަށް ފަހު ވެސް، ބުދަ ދުވަހު އީރާން އިން ބުނެފައި ވަނީ އަލުން ހަނގުރާމަ އަށް ދިޔުމުގެ ފުރުސަތު ކުޑަ ކަމަށެވެ. ނަމަވެސް، އީރާންގެ ސިފައިން އޮތީ ފުރިހަމަ އަށް ތައްޔާރަށް ކަމަށް ބުނެފައިވެ އެވެ. 

ބުދަ ދުވަހު ޓްރަމްޕް ވިދާޅުވެފައި ވަނީ، އީރާން އިން ބޭނުން ވަނީ ވީ އެންމެ އަވަހަށް އެއްބަސްވުމެއް ޤާއިމު ކުރަން ކަމަށެވެ. އެއްބަސްވުން ޤާއިމު ކުރުމަށް އީރާން އިން ހުށަހަޅާ އެއްބަސްވުމާ މެދު އެމެރިކާ ހިތްހަމަ ނުޖެހޭ ކަމަށް ވެސް ޓްރަމްޕް ވިދާޅުވި އެވެ. އެކަން ފާހަގަ ކުރައްވައި ޓްރަމްޕް ވިދާޅުވީ، އެމެރިކާ އިން ބޭނުންވާ ކަންކަން ހާސިލު ނުވާ ނަމަ "މަސައްކަތް ނިންމާލާނެ" ކަމަށެވެ. 

އެއްބަސްވުމުގެ މުހިންމު ބައެއްގެ ގޮތުގައި ހޮރްމޫޒް ކަނޑު އޮޅިން މުޅިން ހުޅުވާލުން ހިމެނޭއިރު، އީރާން އިން ބުނަމުން ދަނީ އެ ކަނޑޮ އޮޅީގެ ފުރިހަމަ ކޮންޓްރޯލް އޮންނާނީ އެ ޤައުމުގެ އަތް މަތީގައި ކަމަށެވެ. އީރާން އިން ހޮރްމޫޒް ކަނޑު އޮޅިން ދަތުރު ކުރުމަށް ދަތި ކޮށްފައިވާތީ، ދުނިޔޭގެ ތެލުގެ ބާޒާރަށް ވަނީ އެކަމުގެ އަސަރު ކޮށްފަ އެވެ.