މި ސަރުކާރުގައި އަބްދުއްސަމަދު މެމޯރިއަލް ހޮސްޕިޓަލް ގެ ފެންވަރު ދަނީ ދަށަށް، މިހާތަނަށް އައު އެއްވެސް ޚިދުމަތެއް ތައާރަފެއް ނުކުރޭ: ކުރީގެ މެންބަރު ސަނީފް
ތިނަދޫ ސިޓީގެ ޑރ. އަބްދުއްސަމަދު މެމޯރިއަލް ހޮސްޕިޓަލް ޓާޝަރީ ފެންވަރަށް ތަރައްގީކުރުމަށް ކުރީ ސަރުކާރުން ފެށި މަސައްކަތްތައް ހުއްޓި، ޚިދުމަތުގެ ފެންވަރު ދަށަށްދާކަމަށް ބުނެ ކުރީގެ މެންބަރު ސަނީފް ވަނީ ކަންބޮޑުވުން ފާޅުކުރައްވާފައި. މި ސަރުކާރުން އަލަށް ފެށި ޚިދުމަތެއްގެ ގޮތުގައި ސީޓީ ސްކޭންގެ ވާހަކަ ދެއްކި ނަމަވެސް، އެއީ ކުރީ ސަރުކާރުގައި ތައާރަފްކޮށްފައިވާ ޚިދުމަތެއްކަން އޭނާ ފާހަގަކުރެއްވި. ސަނީފް ވިދާޅުވި ގޮތުގައި ހޮސްޕިޓަލުގެ ހާލަތު ރަނގަޅުކުރުމަށް މި ސަރުކާރުން ދައްކާ ވާހަކަތަކުގައި އިޚުލާސްތެރިކަމެއް ނެތުމުގެ ސަބަބުން ރައްޔިތުންނަށް ދަނީ ނިކަމެތިކަން ލިބެމުން.
ޑރ. އަބްދުއްސަމަދު މެމޯރިއަލް ހޮސްޕިޓަލުގެ އެކްސްޓެންޝަން އިމާރާތް. ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި މި ހޮސްޕިޓަލުގެ ފެންވަރު ރަނގަޅު ކުރުމަށްޓަކައި ގިނަ މަސައްކަތްތަކެއް ކޮށްފައިވޭ. | އެމްޓީސީސީ
ރައީސް ޑރ. މުހައްމަދު މުއިއްޒުގެ ސަރުކާރުގައި ތިނަދޫ ސިޓީގެ، ޑރ. އަބްދުއްސަމަދު މެމޯރިއަލް ހޮސްޕިޓަލް ގެ ފެންވަރު ދަނީ ދަށަށް ކަމަށާއި، މިހާތަނަށް އައު އެއްވެސް ޚިދުމަތެއް ތައާރަފް ނުކުރެވޭ ކަމަށް ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ ސަނީފް ވިދާޅުވެއްޖެ އެވެ.
ރާއްޖެޓީވީގެ ވައުދުނާމާ ޕްރޮގްރާމުގައި ސަނީފް ވިދާޅުވީ، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ތިނަދޫ ސިއްހީ ޚިދުމަތުގެ ފެންވަރު ރަނގަޅު ކުރުމަށް ގިނަ މަސައްކަތްތަކެއް ކޮށްފައިވާ ކަމަށާއި، އައު ޚިދުމަތްތައް ތައާރަފް ކުރި ކަމަށެވެ. އަދި ހޮސްޕިޓަލް ގެ ޖާގަ އިތުރުކޮށް، ޓާޝަރީ ފެންވަރަށް ހޮސްޕިޓަލް ތަރައްގީ ކުރުމުގެ މަސައްކަތް ކުރިއަށް ގެންދިޔަ ކަމަށް އޭނާ ވިދާޅުވި އެވެ.
ނަމަވެސް ސަރުކާރު ބަދަލުވެގެން ދިއުމާއެކު ހޮސްޕިޓަލް ގެ މަސައްކަތްތައް އޮތީ ހުއްޓިފައި ކަމަށާއި، އައު ޚިދުމަތެއް ވެސް ތައާރަފް ނުކުރެވޭ ކަމަށް ސަނީފް ވިދާޅުވި އެވެ. އަދި ވިދާޅުވީ މިހާރު ޑރ. އަބްދުއްސަމަދު މެމޯރިއަލް ހޮސްޕިޓަލް ގެ ފެންވަރު ދަނީ ދުވަހަކަށްވުރެ ދުވަހެއް ދަށަށް ކަމަށެވެ.
ޑރ. އަބްދުއްސަމަދު މެމޯރިއަލް ހޮސްޕިޓަލް ގައި މިސަރުކާރުން ފެށި ކަމަށް ބުނާ ސީޓީ ސްކޭންގެ ޚިދުމަތަށް އިޝާރާތް ކުރައްވައި ސަނީފް ވިދާޅުވީ މި ޚިދުމަތް ކުރީ ސަރުކާރުގައި ފެށި ކަމަށާއި، މިއީ އައު ޚިދުމަތެއް ނޫން ކަމަށެވެ. ނަމަވެސް ދިމާވި މައްސަލައަކާ ގުޅިގެން ޚިދުމަތް ދުވަސްކޮޅަކަށް މެދުކެނޑުނު ކަމަށް އޭނާ ވިދާޅުވި އެވެ.
ކުރީ ސަރުކާރުގަ ތިނަދޫގައި ހޮސްޕިޓަލްއާ ގުޅިގެން ދެ އިމާރާތް ދެ ފަރާތުގައި ހެދި ޒާމާނީ ވަސީލަތްތައް އެތަންތަނަށް ހަމަކޮށްދެވުނު. ދެން ބާ ހޮސްޕިޓްގެ މަސައްކަތް ކުރަން ޖެހިފައި އޮއްވާ އެސަރުކާރު ނިމިގެން ދިޔައީ. އެއާއެކު މިސަރުކާރު އައީ. މި ސަރުކާރު އައިސްފައި ހޮސްޕިޓަލް ގެ ހާލަތު ދުވަހުން ދުވަހަށް ދިޔައީ ދަށަށް. އެހެންނަމަވެސް އެބޭފުޅުން މިދިޔަ އަހަރުގެ ތެރޭގައިހެން އަޅުގަނޑަށް ހީވަނީ މިއަހަރުގެ ކުރީކޮޅުހެން އަޅުގަނޑަށް ހީވަނީ ސީޓީ ސްކޭން ތައާރަފް ކުރި ވާހަކަ އެބޭފުޅުން ފާހަގަކުރި. ރިކޯޑަށްޓަކައި އަޅުގަނޑު ދަންނަވާލަން. އެފޮޓޯތައް ތިނަދޫގައި ސީޓީ ސްކޭން ހަދަން ފުރަތަމަ އެސީޓީ ސްކޭން މެޝިނެއް ގެންގޮސްގެން އެ އިފްތިތާހު ކުރިއިރުގައި މިދިޔަ ސަރުކާރުގައި އަޅުގަނޑަކީ އެކަމުގައި ބައިވެރިވި މީހެއް.ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ ސަނީފް
ސަނީފް ވިދާޅުވީ ޑރ. އަބްދުއްސަމަދު މެމޯރިއަލް ހޮސްޕިޓަލް ގެ ފެންވަރު ރަނގަޅު ކުރާ ކަމަށް ބުނެ ސަރުކާރުން ދައްކަމުންދާ ވާހަކަތަކުގައި އެއްވެސް ކަހަލަ އިހުލާސްތެރި ކަމެއް ނެތް ކަމަށެވެ. މިސަރުކާރަށް ދެ އަހަރަށްވުރެ ގިނަ ދުވަސްގެން ވެގެންދާއިރު، ރަނގަޅު ސިއްހީ ޚިދުމަތް ނުލިބި ރައްޔިތުންނަށް ލިބެމުން ދަނީ ވަރަށް ބޮޑު ނިކަމެތި ކަމެއް ކަމަށް އޭނާ ވިދާޅުވި އެވެ.
