ކައުންސިލް އިންތިޚާބަށް ޖެހި "ކަޑަ" ތަކަށް މިވީ ކީއް؟

އެއްވެސް ކަމެއް ކުރެއްވުމުގެ މަގްސަދުގައި ނޫނީ ވައުދުވެ ވަޑައި ނުގަންނަވާނެ ކަމަށެވެ. ކަންކަން ކުރައްވަން ވައުދުވަނީ އެވައުދު ފުއްދޭނެ ކަމުގެ ފުރިހަމަ ޔަގީން ކަމާއި އެވައުދު ފުއްދުމަށް ބޭނުންވާނޭ ވަސީލަތްތަކާއި ފައިސާވެސް ހަމަޖެހި ނިމިގެން ކަމަށެވެ. އަދި ކުރަން ފަށްޓަވާ ކޮންމެ ކަމެއްވެސް މަޑު ޖެހުމެއްނެތި ބާރު ސްޕީޑުގައިކޮށް ނިންމާނެ ކަމަށް ތަކުރާރުކޮށް މުޢިއްޒު ގެންދަވަނީ ވިދާޅުވަމުންނެވެ. މިއީ ރިޔާސީ އިންތިޚާބަށް ނުކުންނަވައި ކުރެއްވި ކެންޕެއިނާއި ދެން އައި ހުރިހާ އިންތިޚާބެއްގެ ކެމްޕެއިންއާ ގުޅުވައިގެން ދައްކަވާފައިވާ ވާހަކަކަތަކުން ފާހަގަވާ މައިގަނޑެވެ.

މިވާހަކަތަކަށް އިތުރު ކުރައްވާ އަނެއް ވާހަކަފުޅަކީ އިންތިޚާބާ ދިމާކޮށް ކަޑަ ނުޖައްސަވާނެ ކަމަށް ވިދާޅުވާ ވިދާލުވުމެވެ. ރިޔާސީ އިންތިޚާބަށްފަހު ދެން މަޖިލިސް އިންތިޚާބުގައިވެސް އެންމެ ގިނައިން ވިދާޅުވި އެއްވާހަކަފުޅަކީ އެއީ އެވެ. އެވާހަކަފުޅާއެކު ރަށްރަށުގައި ބައެއް ކަންކަން ކުރައްވަން ފެށްޓެވިއެވެ. ކުރިން ކުރަމުން އައި ކަންކަންވެސް ކުރިއަށް ގެންދަވަން ފެށްޓެވިއެވެ. ޚާއްޞަކޮށް އައްޑޫ ސިޓީއާއި ތިނަދޫ ސިޓީފަދަ ބޮޑެތި ތަންތަނުގައި ބޮޑެތި ބިޔަ މަޝްރޫއުތަކުގެ އެއްބަސްވުންތަކުގައި ސޮއި ކުރައްވާ އެކަންކަމުގެ މަސައްކަތް ފެށްޓެވިކަން ރައްޔިތުންގެ ކުރިމަތީގައި ހާމަ ކުރެއްވިއެވެ. މަގު ހެދުމާއި އެއަރޕޯޓް އެޅުންފަދަ ބޮޑެތި ކަންކަމެވެ.

އިންތިޚާބު ނިމި މަޖިލީހުގެ ސުޕަރ މެޖޯރިޓީ ލިބުމާއެކު ފެށްޓެވި ކަންކަން ހުއްޓުނު ގޮތަށް އަދި އަދަށްވެސް ހުރީ ނުފެށިއެވެ. ނޫންނަމަ ފިނިހަކަ ދުވެލީގައެވެ. ބައެއް އެއްބަސްވުންތައް އުވިވެސް ދިޔައީއެވެ. އަމުދުން ހަވާލުކުރެވުނު ބަޔަކުވެސް މިހާރު އެނގެންވެސް ނެތީއެވެ. ރުކަށް އެރި މީހާގެ ނަދުރަށްވެ އޭރު ފޭސި ހުރިހާކަމެއްހެން އިންތިޚާބު ނިމުމާއެކު ނިމުނީއެވެ. ހަނދާންވެސް ނެތުނީއެވެ.

ނިމިދިޔަ ކައުންސިލް އިންތިޚާބާއި ފެންނަ ނުފެންނަ ވޯޓަށް ތާއީދު ހޯދުމަށްވެސް ފެށްޓެވީ ހަމަ އެވާހަކަފުޅުންނެވެ. ސީދާ މުތުލަގަށް ވިދާޅުވަމުން ގެންދެވިއެވެ. ތިމަން މަނިކުފާނު އިންތިޚާބާ ދިމާކޮށް ކަޑައެއް ނުޖައްސަވާނަމެވެ. މިފަހަރު ކުޑަކޮށް ތަފާތެވެ. ކެންޕޭނަށް ރަށްރަށަށް ވަޑައި ނުގަންނަވާނެ ކަމަށް ވިދާޅުވެ ހުންނެވީ މާލޭގައި މާލޭގައި ގިނަ ވާހަކަތަކެއް ދެއްކެވިއެވެ. ގިނަ ކަންކަން ކުރާކަން ދައްކަވަން ފެށްޓެވިއެވެ. އިންތިޚާބަށް ބޯމަތިވަމުން އައިއިރު ކޮންމެ ދުވަހަކު ދެއިރު ދެދަޅައަށް ކަމެއް ފެށްޓެވިއެވެ. ފްލެޓް އެޅުން ހަވާލުކުރަން ބޮޑެތި ޖަލްސާތަކެއް ބޭއްވިއެވެ. އެތަންތަން ތަނުގެ ބިންގާ އެޅުމަށް ހަމަ އެވަރުގެ ހަފްލާ ތަކެކެވެ. ހައިވޭގައި ޒުވާނުންނަށް ރޭސިދރން ޓްރެކެއް އަޅަން މަސައްކަތް ފެށިއެވެ. މިހެންގޮސް ކިޔާނެ ކަމެއް ނެތެވެ. ލައްކަ ކަންކަން ފެށްޓެވިއެވެ.

އިންތިޚާބު ނިމުނީއެވެ. ބޮޑުތަނުން ބަލިވީއެވެ. ރައްޔިތުން ބުނީ ނޫނެކޭއެވެ. އިސާހިތަކު ކަންވާން ފެށީވެސް އިހުވެސް ވީގޮތަށެވެ. ފެށި ކަންކަން ހުއްޓިއްޖެއެވެ. ބާރު ސްޕީޑުގައި ކުރިއަށްދާތަން ފެންނާނެ ކަމަށް ހީކުރެވުނަސް އެކަންވީ ކުށްހީއަކަށެވެ. މިފަހަރުވެސް އިންތިޚާބު ނިމުމާއެކު ނިމުނީއެވެ. ހަމަ އެންމެ މިސާލަކުން ފުއްދާލާފައި ނިންމާލާނަމެވެ. ޒުވާނުންނަށް އަޅަމުންދިޔަ ރޭސިން ޓްރެކެވެ. އިންތިޚާބު ތެރޭގައި ވަރަށް ބާރަށް މަސައްކަތް ދިޔައެވެ. އިންތިޚާބު ނިމުނުފަހުންވެސް ދެތިން ވެހިކަލެއް އޮތެވެ. މަދުވަމުން މަދުވަމުންގޮސް މިހާރަކު އެކައްޗެއްވެސް ނެތެވެ. އެބުނާ ރޭސިން ޓްރެކްގެ މަސައްކަތް މިވަގުތައް ނިމުނީއެވެ. ދެންވެސް އިތުރު އިންތިޚާބަކާ ދިމާކޮށް ނާންނާނެ ކަމެއް ނޭނގެއެވެ.

ކޮންމެއަކަސް އިންތިޚާބު ތަކާ ދިމާކޮށް ކަޑަ ނުޖައްސަވާނެ ކަމަށް ވިދާޅުވި މުއިއްޒު ގެންދަވަނީ ކޮންމެ އިންތިޚާބަކާ ދިމާކޮށްވެސް ލައްކަ ކަޑަ ޖައްސަވަމުންނެވެ. ނޭނގެނީ އެކަޑަތަކަށް ދެންވާ ގޮތެކެވެ. މިފަހަރުވެސް މިވީ އެފަދަ ގޮތެކެވެ.