މި ސަރުކާރުން ގާނޫނަށް ގެނެސްފައިވާ ބަދަލުތައް ބާތިލްކޮށް، އުފައްދާފައިވާ ބޭކާރު ކުންފުނިތައް އުވާލަން ޖެހޭ: ފައިސަލް
ކުރީގެ ނައިބު ރައީސް ފައިސަލް ވިދާޅުވީ ސަރުކާރުގެ އިގްތިސާދީ ސިޔާސަތުތަކަށް ބަދަލުތަކެއް ގެންނަންޖެހޭ ކަމަށާއި، އާންމު ވިޔަފާރިތަކުގެ ތެރެއަށް ސަރުކާރުން ވަނުމުގެ ބަދަލުގައި އަމިއްލަ ފަރާތްތަކަށް ފުރުސަތު ދޭންޖެހޭ ކަމަށް. ގައުމުގެ ހާލަތު ރަނގަޅު ކުރުމަށްޓަކައި ވިޔަފާރިވެރިންގެ މަޝްވަރާ ހޯދުމަށާއި، ފައިދާނުވާ ކުންފުނިތައް އުވާލައި ކަންކަން ދަންނަ މީހުންނާ މަސައްކަތްތައް ހަވާލުކުރުމަށް އެމަނިކުފާނު ގޮވާލެއްވި. އަދި އަސާސީ ޚިދުމަތްތައް ހޯދުމުގައި ރައްޔިތުންނަށް ހުރި ދަތިތައް ހައްލުކުރުމަށް ސަރުކާރުން އިސްކަންދޭންޖެހޭ ކަމަށްވެސް ފައިސަލް ފާހަގަކުރެއްވި.
ރާއްޖެޓީވީގެ ފަލަސުރުހީ ޕްރޮގްރާމްގައި ކުރީގެ ނައިބު ރައީސް ފައިސަލް ނަސީމް ވާހަކަ ދައްކަވަނީ. | ރާއްޖެއެމްވީ
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ގާނޫނު އަސާސީއަށް ގެނެސްފައިވާ ބަދަލުތައް ބާތިލްކޮށް، އުފައްދާފައިވާ ބޭކާރު ކުންފުނިތައް އުވާލަން ޖެހޭ ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ފައިސަލް ވިދާޅުވީ ރައީސް މުއިއްޒުގެ ސަރުކާރަށް ރައްޔިތުންގެ އިތުބާރު ނެތްކަން މިހާރު ހާމަވެފައިވާ ކަމަށާއި، ގާނޫނު އަސާސީގެ އިތުރުން އެހެނިހެން ކަންކަމަށް މިސަރުކާރުން ގެނެސްފައިވާ ބަދަލުތައް ރައްޔިތުން ބަލައި ނުގަންނަ ކަމަށެވެ.
ސަރުކާރުގެ އިގްތިސާދީ އެޖެންޑާ ބަދަލު ކުރަންޖެހޭކަން ފާހަގަކުރައްވައި ފައިސަލް ވިދާޅުވީ މިހާރު ގެންނަ ބަދަލުތައް ހުއްޓާލައި، ރައްޔިތުންނަށް ފައިދާ ކުރާނެ ބަދަލުތައް ގެންނަން ޖެހޭ ކަމަށެވެ. އަދި ވިދާޅުވީ ސަރުކާރުގެ ކުންފުނިތަކާއި، މިނިސްޓްރީތަކުގެ މެންޑިޑޭޓްތައް އެއްނުކޮށް އެ ބައެއްގެ މަސައްކަތް ކުރުމަށް ފުރުސަތު ދޭން ޖެހޭ ކަމަށާއި، މަސައްކަތް ކުރަން ދަންނަ މީހުންނާ ކަންކަން ހަވާލު ކުރަން ޖެހޭ ކަމަށެވެ. މިގޮތަށް ކުރިއަށް އޮތްތަނުގައި ސަރުކާރުން އަމަލު ނުކުރާނަމަ ގައުމުގެ ހާލަތު އިތުރަށް ގޯސްވާނެ ކަމަށް އެމަނިކުފާނު ވިދާޅުވި އެވެ.
މީގެ އިތުރުން ފައިސަލް ވިދާޅުވީ ސަރުކާރުން ވިޔަފާރިވެރިންނާ ބައްދަލު ކުރަން ޖެހޭ ކަމަށާއި، އެމީހުންގެ ބައިވެރިވުމާއެކު މިހާރު ގައުމަށް ދަތިވެފައިވާ ބޮޑެތި މައްސަލަތަކަށް ހައްލު ހޯދަން ޖެހޭ ކަމަށެވެ. ވިޔަފާރިވެރިންނަކީ ގައުމުގެ އިގްތިސާދަށް ފައިސާ ގެންނަ ބަޔަަކަށްވާއިރު، މައްސަލަތައް ހައްލު ކުރުމުގައި އެމީހުންގެ ދައުރު ވަރަށް ބޮޑުކަން ފައިސަލް ފާހަގަކުރެއްވި އެވެ.
ފައިސަލް ވިދާޅުވީ ސަރުކާރުން ރައްޔިތުންގެ ވިޔަފާރީގެ ތެރެއަށް ވަދެގެން ނުވާނެ ކަމަށާއި، ވިޔަފާރިތައް ކުރިއެރުވުމުގެ ފުރުސަތު ރައްޔިތުންނަށް ދޭން ޖެހޭ ކަމަށެވެ. ނަމަވެސް މިސަރުކާރުގެ ފަރާތުން ފެންނަމުންދަނީ އެމަންޒަރު ނޫން ކަމަށާއި، ގައުމުގެ ކަންކަން ރަނގަޅު ކުރަން ބޭނުންވާ ކަމަށްވާނަމަ އެ ސިޔާސަތު ބަދަލު ކުރަން ޖެހޭ ކަމަށް އެމަނިކުފާނު ވިދާޅުވި އެވެ. އަދި ވިދާޅުވީ މިހާރު ވެސް ވަރަށް ގިނަ ކުންފުނިތައް ސަރުކާރުން އުފައްދާފައިވާ ކަމަށާއި، ފައިދާ ނުވާ ބޭކާރު ކުންފުނިތައް އުވާލަން ޖެހޭ ކަމަށެވެ.
ދިވެހި ވިޔަފާރިވެރިން، ދިވެހީން ކުރިއެރުވުމަށް މަސައްކަތް ކުރާ ކަމަށްވަންޏާ އަޅުގަނޑުމެން ފުރުސަތުތައް ދޭން އެބަ ޖެހޭ ތެދެއްތޯ. ދިވެހި ކުންފުނިތަކަށް. އަޅުގަނޑުމެންނަށް މިފެންނަނީ ސަރުކާރުގެ ކުންފުނިތަކުގައި ހުރިހާ މަސައްކަތްތަކެއް މިއޮތީ. ފަޅު ހިއްކަން ވިޔަސް ގޮނޑުދޮށް ހިމާޔަތް ކުރަން ވިޔަސް، ބަނދަރު ހެދުމުގެ ކަންތަކަށް ވިޔަސް، ޕޫލް އެޅުން، ހޮސްޕިޓަލް އެޅުން، މަގު ހެދުން، ވަކި ކަމެއް ނޫން. އެމްއޭސީއެލް ނޫނީ ރޯޑް ޑިވަލޮޕްމަންޓް، އެމްޓީސީސީ. އެގޮތަކަށް ގައުމު ކުރި ނާރާނެ.ކުރީގެ ނައިބު ރައީސް ފައިސަލް ނަސީމް
ފައިސަލް ވިދާޅުވީ މިހާރު މިގައުމުގައި އަސާސީ ކާބޯތަކެއްޗާއި، ބޭސް ލިބުމުގައި ވަރަށް ދަތިވެ، ރައްޔިތުންގެ ދިރިއުޅުން އުދަނގޫ ވެފައިވާ ކަމަށެވެ. މި ހާލަތު ބަދަލު ކުރަން ޖެހޭ ކަމަށާއި، ރަނގަޅު ގޮތުގައި ވެރިކަން ދެމެހެއްޓުމަށް ރައްޔިތުންގެ ރުހުން ބޭނުންވާ ކަމަށް ފައިސަލް ވިދާޅުވި އެވެ.
