ތިނަދޫ ސިޓީގެ މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއުގެ ތެރެއިން ތިން ވަނަ ފޭސްގެ މަސައްކަތްތައް ހުއްޓިއްޖެ
ތިނަދޫ ސިޓީގެ މަގުތައް ހެދުމުގެ ތިންވަނަ ފޭސްގެ މަސައްކަތް މި ސަރުކާރުގައި ހުއްޓިފައިވާތީ، އެ ދާއިރާގެ ކުރީގެ މެންބަރު އަބްދުﷲ ސަނީފް ވަނީ ކަންބޮޑުވުން ފާޅުކުރައްވާފައި. އާރުޑީސީއާ ހަވާލުކޮށްގެން ކުރިއަށްގެންދާ 341 މިލިއަން ރުފިޔާގެ މި މަޝްރޫއުގެ ދަށުން 19 ކިލޯމީޓަރުގެ މަގު ހެދުމަށް ހަމަޖެހިފައިވީ ނަމަވެސް، މިހާތަނަށް އެއްވެސް މަގެއްގެ މަސައްކަތް ނިމިފައިނުވާކަން އޭނާ ފާހަގަކުރެއްވި.
ތިނަދޫ ސިޓީ، އެސިޓީގެ މަގުތައް ޒަމާނީ ފެންވަރަށް ތަރައްގީ ކުރުމުގެ ފޭސް-1 އަދި 2 ގެ މަސައްކަތްތައް ވަނީ ނިންމާލާފައި. | އާރްޑީސީ
ރައީސް ޑރ. މުހައްމަދު މުއިއްޒުގެ ސަރުކާރާއެކު ތިނަދޫ ސިޓީގެ މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއުގެ ތެރެއިން ތިން ވަނަ ފޭސްގެ މަސައްކަތްތައް ހުއްޓިއްޖެ އެވެ.
ރާއްޖެޓީވީގެ ވައުދުނާމާ ޕްރޮގްރާމުގައި ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ ސަނީފް ވަނީ މިސަރުކާރުގައި އެ ސިޓީގެ ތަރައްގީ ހުއްޓިފައިވާތީ އެކަމުގެ ކަންބޮޑުވުންފާޅު ކުރައްވާފަ އެވެ.
ސަނީފް ވިދާޅުވީ ކުރީގެ ރައީސް އަބްދުﷲ ޔާމީންގެ ވެރިކަމުން ފެށިގެން ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމާ ހަމައަށް ތިނަދޫ އަށް ރައްޔިތުން ބޭނުންވި ގޮތަށް ތަރައްގީ ލިބިފައިވާ ކަމަށެވެ. އަދި ރައީސް މުއިއްޒު ވެސް އެސިޓީގެ ތަރައްގީއަށް ގިނަ ވައުދުތަކެއް ވެވަޑައިގެންނެވި ކަމަށް އޭނާ ވިދާޅުވި އެވެ.
ތިނަދޫގެ މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއަށް އިޝާރާތް ކުރައްވައި ސަނީފް ވިދާޅުވީ މިސަރުކާރާއެކު ތިން ވަނަ ފޭސްގެ މަގުތައް ތަރައްގީ ކުރުމުގެ މަސައްކަތް ފެށި ކަމަށެވެ. ނަމަވެސް މިހާތަނަށް އެއްވެސް މަގެއް ނިންމާނުލެވޭ ކަމަށާއި، މަޝްރޫއު ހުއްޓިފައިވާ ކަމަށް ސަނީފް ވިދާޅުވި އެވެ.
ދާދިފަހުން ތިނަދޫ މަގުތަކުގެ 3 ވަނަ ފޭސް އާދެ ތިނަދޫ މަގުތަކަކީ ޒަމާނުއްސުރެ އެކި ވެރިކަންތަކުގެ ތެރެއިން ތިނަދޫގެ މަސައްކަތްތަކަކީ ބޮޑު ރަށެއް ވީމަ ކުރަމުންދާ މަސައްކަތެއް. އޭގެ ތެރޭގައި ޔާމީން ތިނަދޫ މަގުތަކުގައި ތާރު އެޅުމުގެ މަސައްކަތް ފުރަތަމަ ފައްޓާ ހަމަ ގިނަ އަދަދެއްގެ މަގުތަކެއް ހަދާފައި ހުރި. އޭގެފަހުން އިބްރާހިމް މުހައްމަދު ސޯލިހުގެ ވެރިކަމުގައި ހަމަ ވަރަށް އެއްވަރަށް މަގުތަކެއް އަނެއްކާ ވެސް ތާރުއަޅައި ދެ ވަނަ ފޭސްއެއްގެ ގޮތުގައި އެމަސައްކަތް ކުރިއަށް ގެންގޮސްފައި އޮތީ. އެއާ ގުޅިގެން މިފަހަރު 3 ވަނަ ފޭސްއާ ގުޅިގެން އަޅުގަނޑު ހީކުރީ ތިނަދޫގައި ބާކީ ހުރި މަގުކޮޅު ނިންމާލާނެ ކަމަށް. އަނެއްކޮޅުން ހިއްކިފައި އޮތް ސަރަހައްދު ކުރީގައި ހިއްކާފައި އޮތް ސަރަހައްދުގައި މަގުތައް ހެދުމުގެ ޕްލޭން އޮތީމައާއެކު އެކަން ވެސް ވެގެންދާނެ ކަމަށް. އެހެންނަމަވެސް އެކަން ވެސް ހަގީގަތުގައި ބުނަންޏާ އަޅުގަނޑަށް ހީވަނީ ޖަމަލު ފޮޑިއަށްހެން ދަނީ.ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ ސަނީފް
ތިނަދޫ ސިޓީގެ މަގުތައް ޒަމާނީ ފެންވަރަށް ތަރައްގީކުރުމުގެ މަޝްރޫގެ ފޭސް ތިނެއްގެ މަސައްކަތް ރޯޑް ޑިވެލޮޕްމަންޓް ކޯޕްރޭޝަން (އާރުޑީސީ)އާ ހަވާލުކޮށްފައިވަނީ 25 ފެބްރުވަރީ 2026 ގަ އެވެ.
ކޮންސްޓްރަކްޝަން މިނިސްޓްރީން ބުނީ، މި މަޝްރޫއުގެ ދަށުން އެ ސިޓީގެ 19 ކިލޯމީޓަރުގެ 50 މަގުގެ މަސައްކަތް ކުރިޔަށް ގެންދާނެ ކަމަށާއި، ފެން ހިންދާ ނިޒާމު ގާއިމުކޮށް، ރޯޑް މާކިން އަދި ސައިން ބޯޑު ހަރުކުރުމުގެ އިތުރުން ދުވާރުތައް ހަދާނެ ކަމަށެވެ.
މުޅި މި މަޝްރޫއު ނިންމަން، ތިން އަހަރެއްހާ ދުވަސް ނަގާއިރު، މިމަޝްރޫއަށް 341 މިލިޔަން ރުފިޔާ ހަރަދުވާނެ ކަމަށް މިނިސްޓްރީން ބުނެ އެވެ.
