ވެރިކަމަށް އައުމަށް ބޭނުންކުރި ހަރުގަނޑު އެއްލާލުމަށްފަހު، މިހާރު އަނެއްކާވެސް އެ ހަރުގަނޑު ގެނެސް ޖެއްސީތަ؟
9 މެއި 2026 | ހޮނިހިރު 11:16ސިޔާސީ ކުރިއެރުން ހޯދުމަށް އެހީތެރިވި ފަރާތްތަކަށް އިހާނެތިކޮށް ހިތުމަކީ ދާއިމީ ކާމިޔާބީއެއް ލިބޭނެ ކަމެއް ނޫންކަން މި ސަރުކާރުގެ އަމަލުތަކުން ހާމަވޭ. ކުރިން އެކަހެރިކުރި އިސް ބޭފުޅުންނާއި، ފާޑުކިޔުން އަމާޒުކުރި ފަރާތްތަކުގެ އެހީތެރިކަމަށް ސަރުކާރުން މިހާރު އެދެމުންދަނީ ކުރިމަތިވެފައިވާ ގޮންޖެހުންތަކުން ސަލާމަތްވުމަށް ގޮތްހުސްވެގެން ކަމަށް ގިނަ ބަޔަކު ދަނީ ބުނަމުން.
ވެރިކަމަށް އައުމަށް ބޭނުންކުރި ހަރުގަނޑު އެއްލާލުމަށްފަހު، މިހާރު އަނެއްކާވެސް އެ ހަރުގަނޑު ގެނެސް ޖެއްސި މަންޒަރު، ރައީސް މުއިއްޒުގެ މިސަރުކާރުގެ ތެރެއިން ދަނީ ފެންނަމުން. | ރާއްޖެއެމްވީ ގްރެފިކްސް
ކޮންމެ އިންސާނަކީ ވެސް ދިރިއުޅުމުގެ މައިދާނުގައި ކުރިއަށްދާން ބޭނުންވާނެ މީހެކެވެ. ކުރިއަށް ދިއުމަށްޓަކައި އެކި މީހުން އެކި އުކުޅުތައް ބޭނުންކުރާއިރު، ބައެއް މީހުން އަމިއްލަ މަސައްކަތުން ކުރިއަށްދެ އެވެ. އަނެއް ބަޔަކު ބޭނުންކުރަނީ 'ގުޅުންތަކުގެ ހަރުގަނޑު' ނުވަތަ އެކުވެރިކަމުގެ ސިޑިއެވެ.
ކާމިޔާބީގެ ހަރުފަތްތައް ގިރާކުރުމުގައި ރަހުމަތްތެރިކަމާއި ގުޅުންތަކުގެ ބޭނުން ހިފުމަކީ އޭގެ އަމިއްލަ ޒާތުގައި މައްސަލައެއް ނޫނެވެ. ނަމަވެސް، ގިނަ ފަހަރަށް ފެންނަނީ މައްޗަށް އެރުމަށްފަހު، އެ އެރުމަށް އެހީތެރިވި ހަރުގަނޑު އެއްލާލާ މަންޒަރެވެ. މިގޮތަށް ކަންތައް ކުރުމުން، އަނބުރާ ތިރިއަށް ފައިބަން ޖެހޭ ވަގުތު ބޭނުންކުރާނެ ވަސީލަތެއް ނޯވެ އެވެ. ނަތީޖާއަކަށް ވަނީ ވަރަށް ބާރަށް ބިމަށް ވެއްޓި، ބޮޑެތި ގެއްލުންތަކާއި އަނިޔާއާ ކުރިމަތިލާން ޖެހުމެވެ.
ކަންމިހެން އޮތްއިރު، ސިޔާސީ މައިދާނުގައި ފެންނަ އެންމެ ހިތާމަވެރި އެއް މަންޒަރަކީ، ތިމާގެ އަމިއްލަ ކުރިއެރުމަށް އެހެން މީހުންގެ ބޮލަށް ފައިން އަރައިގެން މައްޗަށް ދާން އުޅުމެވެ. އެހެން މީހަކު ހަލާކުކޮށްލައިގެން ނުވަތަ ނިކަމެތިކޮށްލައިގެން ހޯދާ ކާމިޔާބީއަކީ ދެމިގެންދާނެ އެއްޗެއް ނޫނެވެ. މިފަދަ މީހުންނަކީ 'އީޑީސް މަދިރި' ނުވަތަ 'ގުއިވަޅު މެހި' ފަދަ ބައެއްގެ ގޮތުގައި ސިފަކުރެވެ އެވެ. އެއީ އެހެން މީހުންގެ ލޭ ބޮއެގެން ނުވަތަ ނަޖިސް ފަތުރައިގެން އުޅޭ ބައެއްގެ ގޮތުގަ އެވެ. އެފަދަ މީހުންނަކީ ގައުމަށް ވެސް ބޭކާރު ބައެއް ނުންތޯ އެވެ.
ސިޔާސީ މައިދާނުން މިފަދަ ތަފާތު މަންޒަރުތައް ފެންނަމުންދާއިރު، ރައީސް މުއިއްޒުގެ ސަރުކާރު މިހާރު އޮތީ ގޮތް ހުސްވެފައިވާ ދަރަޖައެއްގައޭ ބުނެވިދާނެ އެވެ. އެއީ ވެރިކަމަށް އައުމަށް ބޭނުންކުރި ހަރުގަނޑު އެއްލާލުމަށް ފަހު، މިހާރު އަނެއްކާ ވެސް އެ ހަރުގަނޑު ގެނެސް ވިއްދާލި މަންޒަރު މިވަނީ ފެނިފަ އެވެ.
ރައީސް މުއިއްޒު ވެރިކަމަށް ގެނައުމަށް އެންމެ ބޮޑަށް މަސައްކަތް ކުރެއްވި، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ، 2024 ވަނަ އަހަރުގެ ފަހުކޮޅު ވަރަށް ބޮޑަށް އެކަހެރި ކުރެއްވި އެވެ. ނަމަވެސް 2026 ވަނަ އަހަރުގެ އޭޕްރީލް މަހުގެ ފަހު ކޮޅުން ފެށިގެން ސަރުކާރުގެ ދިފާއުގައި އަބްދުއްރަހީމް ނުކުމެވަޑައިގެން މިސަރުކާރު ވަރަށް ބޮޑަށް ދިފާއު ކުރައްވާ މަންޒަރު މިދަނީ ފެންނަމުންނެވެ.
މީގެ އިތުރުން އިކޮނޮމިކް މިނިސްޓަރު ގެ ބަސްމަގާއި ރާގު ވެސް މިވަނީ މުޅީން ބަދަލުވެފަ އެވެ.
މިކަމުގެ އެންމެ އަލިގަދަ ހެއްކަކީ އިކޮނޮމިކް މިނިސްޓަރު ސައީދު، ކުރީގެ ރައީސް އަބްދުﷲ ޔާމީނަށް ފިނިފެން މަލުން ތައުރީފް ކުރެއްވުމަށް ފަހު، ރައީސް މުއިއްޒުގެ ސަރުކާރާ ދެކޮޅުވި ހިސާބުން އެކި ޕްލެޓްފޯމްތަކުގައި ޔާމީނަށް ފާޑުވިދާޅުވަމުން ގެންދެވި އެވެ. އެ ދުވަހު ރައީސް މުއިއްޒު ވެރިކަމަށް ވަޑައިގެންނެވުމަށް ބޭނުންކުރެއްވި ފިޔާތޮށި ކުލައިގެ ހުސް ގޮނޑިކޮޅު މަތީން އެބޭފުޅުން ހަނދާނެއް ނެތް ކަހަލަ އެވެ. އަދި ކުއްލިއަކަށް ރާގު ބަދަލު ކުރެއްވުމަކީ 'އަތް ވެއްޓޭނީ ކަކުލަށް' ކަމުގެ ހެއްކެއްނުންތޯ އެވެ.
އެހެންކަމުން ސަރުކާރަށް ކުރިމަތިވެފައިވާ ގޮންޖެހުންތަކުން ސަލާމަތްވުމަށް، ޔާމީން ދެކެ ވަރަށް ލޯބިވާ ކަމަށް ވިދާޅުވެ، ތައުރީފު މައްޗަށް ތައުރީފް ކުރެއްވުމުން އެކަމާމެދު ހައިރާންވާން ނުޖެހެ އެވެ. ސިޔާސީ މައިދާނުގައި ކުރިއަށް ދިއުމަށް އިޚްލާސްތެރިކަމަކީ ކޮންމެހެން ބޭނުންތެރި ސިފައަކަށްވާއިރު، މައްޗަށް އެރުމަށް ބޭނުންކުރި ހަރުގަނޑު ވައްޓާލައި، އެހީތެރިވި މީހުންނަށް އިހާނެތިކޮށް ހިތުމަކީ ދާއިމީ ކާމިޔާބީއެއް ލިބޭނެ ކަމެއް ނޫންކަން މިވަނީ ފެނިފަ އެވެ. އަދި ރައީސް މުއިއްޒުގެ ސަރުކާރުން މިއަދު ތަޖުރިބާ ކުރަމުން އެދަނީ، އިޚްލާސްތެރިކަމެއް ނެތި ކުރިއަށްދާން އުޅުމުން ކުރިމަތިވާނެ ހިތްދަތި ނަތީޖާއާ ކަމާމެދު ޝައްކަތް ނެތެވެ!
