ޔޫއޭއީގެ ނިއުކްލިއާ ޕްލާންޓަށް ދިން ޑްރޯން ހަމަލާ އދ އިން ކުށްވެރި ކޮށްފި
އދ. ގެ ސަލާމަތީ މަޖިލީހުގައި ހިމެނޭ 15 މެންބަރު ގައުމުގެ އިއްތިފާގުން ނެރުނު ބަޔާނެއްގައި ބުނެފައި ވަނީ، މިއީ ބައިނަލްއަގުވާމީ ގާނޫނުތަކާ ކަނޑަ އެޅިގެން ޚިލާފަށް ދީފައިވާ ހަމަލާއެއް ކަމަށް. އަދި މި އަމަލަކީ އާންމު ރައްޔިތުންގެ ފުރާނަ އަށާއި، އުމްރާނީ ވަސީލަތް ތަކުގެ އިތުރުން، ތިމާވެއްޓަށް ވެސް އޭގެ ނުރައްކާ އިންތިހާ އަށް އޮތް ކަމެއްގެ ގޮތުގައި ސަލާމަތީ މަޖިލީހުން ވަނީ ސިފަ ކޮށްފައި.
އެކުވެރި ދައުލަތްތައް (އދ) ގެ ސަލާމަތީ މަޖިލީހުގެ ބައްދަލުވުމެއްގެ ތެރެއިން. | ގެޓީ އިމޭޖަސް
ޔުނައިޓެޑު އަރަބް އެމިރޭޓްސް (ޔޫއޭއީ) ގެ ބަރަކާ ނިއުކްލިއާ ޕަވާ ޕްލާންޓް އަށް އަމާޒުކޮށް މެއި މަހުގެ 17 ވަނަ ދުވަހު ދިން ޑްރޯން ހަމަލާ، އެކުވެރި ދައުލަތްތައް (އދ) ގެ ސަލާމަތީ މަޖިލީހުން އެންމެ ހަރުކަށި އިބާރާތުން ކުށްވެރި ކޮށްފި އެވެ.
އދ. ގެ ސަލާމަތީ މަޖިލީހުގައި ހިމެނޭ 15 މެންބަރު ގައުމުގެ އިއްތިފާގުން ނެރުނު ބަޔާނެއްގައި ބުނެފައި ވަނީ، މިއީ ބައިނަލްއަގުވާމީ ގާނޫނުތަކާ ކަނޑަ އެޅިގެން ޚިލާފަށް ދީފައިވާ ހަމަލާއެއް ކަމަށެވެ. އަދި މި އަމަލަކީ އާންމު ރައްޔިތުންގެ ފުރާނަ އަށާއި، އުމްރާނީ ވަސީލަތް ތަކުގެ އިތުރުން، ތިމާވެއްޓަށް ވެސް އޭގެ ނުރައްކާ އިންތިހާ އަށް އޮތް ކަމެއްގެ ގޮތުގައި ސަލާމަތީ މަޖިލީހުން ވަނީ ސިފަ ކޮށްފައި އެވެ.
މީގެ އިތުރުން، މަސްރަހު ނުތަނަވަސްވެ، ނުރައްކާތެރި ދަރަޖަ އަކަށް ކަންކަން އިތުރު ވަމުންދާތީ އެކަމާ މެދު ފުންކޮށް ކަންބޮޑުވުން ފާޅުކުރާ ކަމަށް އެ ބަޔާނުގައިވެ އެވެ. އަދި ޔޫއޭއީގެ އާންމު ރައްޔިތުންނަށާއި އާންމު ޚިދުމަތްތައް ދޭ ތަންތަނަށް އަމާޒުކޮށް ދެމުންދާ ހަމަލާތައް ވަގުތުން އަދި ދާއިމީކޮށް ހުއްޓާލުމަށް ވެސް ސަލާމަތީ މަޖިލީހުން ވަނީ ގޮވާލާފައި އެވެ.
ޔޫއޭއީގެ ކަމާ ބެހޭ އިދާރާ ތަކުން މައުލޫމާތު ދޭ ގޮތުގައި، އަލް ދަފްރާ ސަރަހައްދުގައި ހުންނަ މި ޕްލާންޓުގެ އެތެރޭގެ ސަރަހައްދުން ބޭރުގައި ހުރި ޖަނަރޭޓަރަކަށް ޑްރޯން ހަމަލާ އެރުމާ ގުޅިގެން އަލިފާނުގެ ހާދިސާއެއް ހިނގާފައިވެ އެވެ. ނަމަވެސް، ނަސީބު ރަނގަޅު ކަމުން މި ހާދިސާގެ ސަބަބުން ނިއުކްލިއާ ރޭޑިއޭޝަންގެ ރައްކާތެރި ކަމުގެ މިންގަނޑު ތަކަށް އެއްވެސް ބަދަލެއް ނުވަތަ ނުރައްކަލެއް ކުރިމަތި ވެފައި ނުވެ އެވެ.
މި ހަމަލާއާ ގުޅިގެން ޔޫއޭއީގެ ފޮރިން މިނިސްޓްރީ އިން ވަނީ އިރާގުގެ ސަރުކާރަށް ގޮވާލުމެއް ގޮވާލާފައި އެވެ. އެގޮތުން އިރާގުގެ ފަސްގަނޑު ބޭނުން ކޮށްގެން ޔޫއޭއީއާ ދެކޮޅަށް ހިންގާ މިފަދަ ދުޝްމަނު އަމަލުތައް ހުއްޓުވުމަށް އެ ގައުމުން ވަނީ ބާރު އަޅާފައި އެވެ.
މަސްދަރު: އަލް ޖަޒީރާ
