އެމެރިކާއާއެކު އިތުރު ބުރެއްގެ މަޝްވަރާތަކަށް އަދި އީރާނުން އެއްބަސްވެފައެއް ނުވޭ

އެމެރިކާއާއެކު އިތުރު ބުރެއްގެ މަޝްވަރާތަކަށް އަދި އީރާނުން އެއްބަސްވެފައި ނުވާ ކަމަށް އެ ގައުމުގެ ރަސްމީ ނޫސް އެޖެންސީ ތަސްނީމް ނިއުސް އެޖެންސީން ރިޕޯޓު ކޮށްފި އެވެ.

ކަމާބެހޭ އިދާރާތަކުން ތަސްނީމް ނިއުސް އެޖެންސީއަށް ލިބިފައިވާ މައުލޫމާތަށް ބަލާއިރު، އީރާނުން މި މަޝްވަރާތަކަށް އެއްބަސްވެފައި ނުވަނީ އެމެރިކާގެ ރައީސް ޑޮނަލްޑް ޓްރަމްޕް އީރާނުގެ ކަނޑުގެ ސަރަހައްދު ބަންދުކޮށް "ނޭވަލް ބްލޮކޭޑެއް" އިއުލާނު ކުރައްވާފައިވާތީއެވެ. މީގެ އިތުރުން، ފަހަކަށް އައިސް ދެގައުމުގެ ދެމެދުގައި ބަދަލުކުރެވުނު މެސެޖުތަކުގައި، މަޝްވަރާގެ މޭޒުގައި އެމެރިކާއިން އިންސާފުން ބޭރު ބޮޑެތި ޑިމާންޑުތަކެއް ކުރަމުންދާތީ، މަޝްވަރާތަކުގެ ދެވަނަ ބުރެއް ބޭއްވުމަށް އީރާނުން ވަނީ ދެކޮޅު ހަދާފައެވެ.

މަޝްވަރާތައް ކުރިއަށް ގެންދިއުމަށް އޮތް އެންމެ އަސާސީ ޝަރުތަކީ އެމެރިކާއިން ކުރަމުންދާ އިންސާފުން ބޭރު، މާބޮޑެތި ޑިމާންޑުތައް ހުއްޓާލުން ކަމަށް އީރާނުން ވަނީ ސާފުކޮށް ބުނެފައެވެ. އަދި އެ ނޫން ގޮތަކަށް، ނަތީޖާއެއް ނުނިކުންނަ، ދިގުލައިގެންދާ މަޝްވަރާތަކެއްގައި ވަގުތު ބޭކާރުކުރަން އީރާނުން ބޭނުން ނުވާކަންވެސް އެ ގައުމުން ވަނީ ހާމަކޮށްފައެވެ.

ތަސްނީމް ނިއުސް އެޖެންސީއަށް މައުލޫމާތު ލިބިފައިވާ ގޮތުގައި، އިސްލާމީ ޖުމްހޫރިއްޔާ އީރާނުގެ މި ނިންމުން މިހާރު ވަނީ ޕާކިސްތާން މެދުވެރިކޮށް އެމެރިކާގެ އޮފިޝަލުންނަށް އަންގާފައެވެ.