ޓްރަމްޕް ބައިވެރިވެވަޑައިގެންނެވި ހަފްލާ އެއްގައި ހިނގި ބަޑިޖެހުމުގެ ހާދިސާ އާ ބެހޭ ގޮތުން މިހާތަނަށް އެނގޭ ކަންކަން
ވައިޓް ހައުސް ކޮރެސްޕޮންޑެންޓްސް ޑިނަރ ކުރިއަށްދިޔަ ހޮޓަލުގައި ހަތިޔާރު އެޅި މީހަކު ހަމަލާދޭން އުޅުމާ ގުޅިގެން، އެމެރިކާގެ ރައީސް ޑޮނަލްޑް ޓްރަމްޕާއި ސަރުކާރުގެ އިސްވެރިން އެ ތަނުން ރައްކާތެރިކަމާއެކު އެހެން ތަނަކަށް ވަނީ ބަދަލުކޮށްފައި. މި ހާދިސާގައި ސީކްރެޓް ސާވިސްގެ އެޖެންޓަކަށް އަމާޒުކޮށް ބަޑިޖެހި ނަމަވެސް، ބުލެޓް-ޕްރޫފް ވެސްޓުގެ ސަބަބުން އޭނާއަށް އަނިޔާއެއް ނުވެ ސަލާމަތްވެފައިވާއިރު، ހަމަލާދިން ކެލިފޯނިއާގެ ފިރިހެނަކު މިހާރު ވަނީ ހައްޔަރުކޮށްފައި. މި ހާދިސާއާ ގުޅިގެން ހަފުލާ މެދުކަނޑާލާފައިވާއިރު، ރައީސް ޓްރަމްޕް ވަނީ މި ހަފްލާ އެހެން ތާރީޚެއްގައި މާ ކުލަގަދަކޮށް ބާއްވާނެ ކަމަށް ވިދާޅުވެފައި.
އެމެރިކާގެ ވޮޝިންގޓަން ޑީސީގައި 2026 ވަނަ އަހަރުގެ އޭޕްރީލް މަހުގެ 25 ވީ ހޮނިހިރު ދުވަހު ބޭއްވި "ވައިޓް ހައުސް ކޮރެސްޕޮންޑެންޓްސް އެސޯސިއޭޝަން" ގެ ރޭގަނޑުގެ ޖާފަތުގެ ތެރެއަށް، ބަޑިއެއް ހިފައިގެން ހުރި މީހަކު ވަންނަން އުޅުމާ ގުޅިގެން، އެމެރިކާގެ ރައީސް ޑޮނަލްޑް ޓްރަމްޕާއި ފަސްޓް ލޭޑީ މެލަނިއާ ޓްރަމްޕް ސީކްރެޓް ސާވިސްގެ އެޖެންޓުންގެ ބެލުމުގެ ދަށުން ކުއްލި ގޮތަކަށް އެ ތަނުން ބޭރަށް ނެރެ، ސަލާމަތީ ކަންކަން ބަލަހައްޓަމުންދިޔަ ފަރާތްތަކުން މިހާރު ވަނީ މި ހާދިސާއާ ގުޅުން ހުރި ކަމަށް ތުހުމަތުކުރެވޭ މީހަކު ހައްޔަރުކޮށް، ފުލުހުންގެ ބެލުމުގެ ދަށަށް ގެންގޮސްފައި. | ރޮއިޓާސް
ހޮނިހިރު ދުވަހުގެ ރޭ ބޭއްވި ވައިޓް ހައުސް ކޮރެސްޕޮންޑެންޓްސް ޑިނަރ ކުރިއަށްދިޔަ ސަރަހައްދުގައި ބަޑީގެ ހަމަލާތަކެއް ދިނުމާ ގުޅިގެން، އެމެރިކާގެ ރައީސް ޑޮނަލްޑް ޓްރަމްޕާއި ފަސްޓް ލޭޑީ މެލަނިއާ ޓްރަމްޕް އެ ތަނުން ރައްކާތެރިކަމާއެކު އެހެން ތަނަކަށް ވަނީ ބަދަލު ކޮށްފަ އެވެ.
މި "ބަޑިޖެހުމުގެ ހާދިސާ" ގައި އެއްވެސް މީހަކަށް އަނިޔާއެއް ވެފައިނުވާކަން އެމެރިކާގެ ސީކްރެޓް ސާވިސްއިން ކަށަވަރުކޮށްދީފައިވާއިރު، މި މައްސަލައިގައި މިހާރު ވަނީ އެކަކު ހައްޔަރުކޮށްފައެވެ.
ވައިޓް ހައުސްގައި ހުންނަވައި ދެއްވި ބަޔާނެއްގައި ރައީސް ޓްރަމްޕް ވިދާޅުވީ، މިފަދަ ކަމެއް ހިނގުމަކީ އަބަދުވެސް ލިބޭ ވަރަށް ބޮޑު ސިހުމެއް ކަމަށެވެ.
މި ހާދިސާ ހިނގިތާ މާގިނައިރުތަކެއް ނުވަނީސް ޓްރަމްޕްގެ ސޯޝަލް މީޑިއާ ޕްލެޓްފޯމް ކަމަށްވާ "ޓްރުތް ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، ބަޑިޖެހި މީހާ މިހާރު ހައްޔަރުކޮށްފައިވާ ކަމަށާއި، ހަފުލާ ކުރިއަށް ގެންދިއުމަށް އެމަނިކުފާނު ލަފާދެއްވި ނަމަވެސް، އަމަލުކުރައްވާނީ ސަލާމަތީ ބާރުތަކުގެ އިރުޝާދުގެ މަތިން ކަމަށެވެ.
އޭގެ ފަހުން ކުރެއްވި ދެވަނަ ޕޯސްޓެއްގައި ޓްރަމްޕް ވިދާޅުވީ، އެމަނިކުފާނާއި ފަސްޓް ލޭޑީ އެ ތަނުން ވަޑައިގަތުމަށް ސަލާމަތީ ބާރުތަކުން އެދިފައިވާ ކަމަށެވެ.
ހާދިސާ ހިނގިތާ ގަޑިއެއްހާއިރު ފަހުން ވައިޓް ހައުސްގައި ވާހަކަދައްކަވަމުން ރައީސް ވިދާޅުވީ، ވޮޝިންޓަން ހިލްޓަން ހޮޓަލުގެ ސަލާމަތީ ކަންކަން ބަލަހައްޓަމުންދިޔަ އޮފިސަރުންނަށް "ބާރުގަދަ" ހަތިޔާރަކާއެކު ހަމަލާދޭން އުޅުނު މީހަކު ހައްޔަރުކޮށްފައިވާ ކަމަށެވެ.
ހަމަލާދޭން އުޅުނު މިހާ ސަލާމަތީ ފާސްކުރާ ތަނަކަށް ހަމަލާދޭ މަންޒަރު ފެންނަ ވީޑިއޯއަކާއި އޭނާ ހައްޔަރުކޮށްފައި ހުރި ފޮޓޯއެއް ޓްރުތް ސޯޝަލްގައި ހިއްސާކޮށްފައިވާނެ ކަމަށް ވިދާޅުވެ، ނޫސްވެރިންނަށް އެކަން ފާހަގަކުރައްވަމުން ޓްރަމްޕް ވަނީ އެއީ "ވަރަށް ބަލިކަށި ސިކުނޑިއެއްގެ ވެރިއެއް" ކަމަށް ސިފަކުރައްވާފައެވެ.
މި ހާދިސާގައި ސީކްރެޓް ސާވިސްގެ އެޖެންޓެއްގެ ގަޔަށް ވަރަށް ކައިރިން ބަޑިޖެހި ނަމަވެސް، އޭނާ ސަލާމަތްވީ ލައިގެން ހުރި ބުލެޓް-ޕްރޫފް ވެސްޓުގެ ސަބަބުން ކަމަށް ޓްރަމްޕް ވިދާޅުވިއެވެ.
"އަޅުގަނޑު ދެންމެ އެ އޮފިސަރާ ވާހަކަދެއްކިން، އޭނާގެ ހާލު ވަރަށް ރަނގަޅު،" ރައީސް ވިދާޅުވިއެވެ.
"އޭނާ ހުރީ ވަރަށް ސާބިތުކަމާއެކު. އަޅުގަނޑުމެން އޭނާދެކެ ލޯބިވާ ކަމަށާއި އިހުތިރާމްކުރާ ކަމަށް ބުނިން. އޭނާއަކީ އަމިއްލަ ނަފްސަށް ވަރަށް ބޮޑަށް އިތުބާރުކުރާ ފަޚުރުވެރި މީހެއް."
ބަޑިޖެހުމުގެ ހާދިސާއަށްފަހު، އެ ހަފުލާގައި ތިބި އެންމެންގެ މެދުގައި އޮތީ "ވަރަށް ބޮޑު އެއްބައިވަންތަކަމާއި ލޯބި" ކަމަށް ރައީސް ސިފަކުރެއްވިއެވެ.
ތުހުމަތުކުރެވޭ މީހާ ހައްޔަރުކުރުމާ ގުޅިގެން ހަފުލާ އަލުން ކުރިއަށް ގެންދަން ބޭނުންފުޅުވި ނަމަވެސް، ސަލާމަތީ އުސޫލުތައް ހުރިގޮތުން އެކަން އެގޮތަށް ނުކުރެވުނުކަން ޓްރަމްޕް ފާހަގަކުރެއްވިއެވެ.
މި ހަފުލާ ފަހުގެ ތާރީޚެއްގައި ބާއްވާނެ ކަމަށާއި، އެ ހަފުލާ ވެގެންދާނީ ކުރިއަށްވުރެ "މާ ފުރިހަމަ އަދި މާ ކުލަގަދަ" ހަފުލާއަކަށް ކަމަށް ޓްރަމްޕް ވިދާޅުވިއެވެ.
މީގެ ކުރިން އެމަނިކުފާނު އަވަހާރަކޮށްލަން ދިން ދެ ހަމަލާއެއްގެ ހަނދާންވެސް ރައީސް އާކުރެއްވިއެވެ. އެއީ ޕެންސިލްވޭނިއާގެ ބަޓްލަރގައި ބޭއްވި ރެލީއެއްގައި ދިން ހަމަލާއާއި، ފްލޮރިޑާގެ ޕާމް ބީޗްގައި ގޮލްފް ކުޅުއްވަން ހުންނަވަނިކޮށް ދިން ހަމަލާއެވެ.
މިފަދަ ކަންކަމަކީ އަބަދުވެސް ލިބޭ ސިހުމެއް ކަމަށް ތަކުރާރުކުރައްވަމުން، މި ހާދިސާގެ ސަބަބުން ފަސްޓް ލޭޑީއަށް ނަފްސާނީ ގޮތުން ވަރަށް ބޮޑު އަސަރެއް ކޮށްފައިވާ ކަމަށް ޓްރަމްޕް ވިދާޅުވިއެވެ.
މީގެ އިތުރުން، މި ހާދިސާގެ ޚަބަރުތައް ގެނެސްދިނުމުގައި މީޑިއާތަކުން ގެންގުޅުނު "ޒިންމާދާރު" އުސޫލުތަކަށްޓަކައި ރައީސް ވަނީ މީޑިއާތަކަށް ޝުކުރު އަދާކުރައްވާފައެވެ.
މީޑިއާއާ ވާހަކަދެއްކެވުމުގެ ކުޑަވަގުތުކޮޅެއް ކުރިން، ޓްރަމްޕް ވަނީ ބަޑިޖެހި ކަމަށް ތުހުމަތުކުރެވޭ މީހާގެ ފޮޓޯތަކާއި ވީޑިއޯއެއް ހިއްސާކުރައްވާފައެވެ.
ގާތުން ނަގާފައިވާ އެ ފޮޓޯއިން ފެންނަނީ، ގަމީސް ނުލައި ހުރި މީހަކު ބިމުގައި ބާއްވައި، ފަހަތަށް ބިޑި އަޅުވާފައި އޮއްވައެވެ. އޭނާގެ ވަށައިގެން ސީކްރެޓް ސާވިސްގެ އެޖެންޓުން ތިއްބެވެ.
ކޮލިޓީ ދަށް އެ ވީޑިއޯ ކްލިޕުން ފެންނަނީ، މީހަކު ސަލާމަތީ އޮފިސަރުންގެ ކައިރިން ދުވެފައި ދާން އުޅުމުން، އޮފިސަރުން އެނބުރި އޭނާގެ ފަހަތުން ދުވާ މަންޒަރެވެ.
ހޮނިހިރު ދުވަހުގެ ރޭ މީޑިއާއާ ވާހަކަދައްކަވަމުން ރައީސް ކަށަވަރުކޮށްދެއްވި ގޮތުގައި، އެ ފޮޓޯތަކާއި ވީޑިއޯ އާންމުކުރުމަށް އިރުޝާދު ދެއްވީ ސީދާ އެމަނިކުފާނެވެ.
ސީބީއެސްއިން ރިޕޯޓްކުރާ ގޮތުގައި، މި ހަމަލާ ދިން ކަމަށް ތުހުމަތުކުރެވެނީ ކެލިފޯނިއާގެ ޓޮރެންސްއަށް ނިސްބަތްވާ އުމުރުން 31 އަހަރުގެ ކޯލް ޓޯމަސް އެލަން ނަމަކަށް ކިޔާ މީހަކަށެވެ.
ޓްރަމްޕް ވިދާޅުވި ގޮތުގައި އެފްބީއައި އާއި ސީކްރެޓް ސާވިސްއިން ދަނީ ކެލިފޯނިއާގައި ހުރި އެ މީހާގެ އެޑްރެހެއް ބަލައި ފާސްކުރަމުންނެވެ.
ވޮޝިންޓަން ޑީސީގެ އިންޓަރިމް ޕޮލިސް ޗީފް ޖެފްރީ ކެރޯލް ވިދާޅުވީ، ހައްޔަރުކުރި މީހާއަކީ އެ ހަފުލާ ބޭއްވި ހޮޓަލުގައި މަޑުކޮށްގެން ހުރި މީހެއް ކަމަށެވެ. އަދި އިތުރު އެއްވެސް މީހަކަށް ނުރައްކަލެއް އޮތް ކަމަށް ގަބޫލުކުރާނެ ސަބަބެއް ނެތް ކަމަށްވެސް އޭނާ ވިދާޅުވިއެވެ.
ބަޑީގެ ހަމަލާތަކެއް ބަދަލުކުރެވުނުކަން ސަލާމަތީ ބާރުތަކުން ކަށަވަރުކޮށްދިން ނަމަވެސް، އިތުރު ތަފްސީލެއް ހާމައެއް ނުކުރެ އެވެ. ފުލުހުން ބުނީ ސަލާމަތީ އޮފިސަރުންނާއި އެ މީހާއާ ދެމެދު ބަޑީގެ ހަމަލާތަކެއް ބަދަލުކުރެވުނު ކަމަށެވެ.
ކެރޯލް ވިދާޅުވި ގޮތުގައި ހައްޔަރުކުރި މީހާގެ އަތުން ޝޮޓްގަންއަކާއި، ފިސްތޯލައެއްގެ އިތުރުން ގިނަ އަދަދެއްގެ ވަޅި ފެނިފައިވެއެވެ.
ވޮޝިންޓަންގެ ޔޫއެސް އެޓަރނީ ޖީނީން ޕިރޯ ވިދާޅުވީ، އަނިޔާވެރި އަމަލެއް ހިންގުމުގައި ހަތިޔާރު ބޭނުންކުރުމާއި، ނުރައްކާތެރި ހަތިޔާރެއް ބޭނުންކޮށްގެން ފެޑަރަލް އޮފިސަރުންނަށް ހަމަލާދިނުމުގެ ދެ ދައުވާއެއް އެ މީހާގެ މައްޗަށް އުފުލާފައިވާ ކަމަށެވެ.
އޭނާގެ މައްޗަށް ރަސްމީކޮށް ދައުވާ އުފުލާނީ ހޯމަ ދުވަހު ކަމަށްވެސް ޕިރޯ ވިދާޅުވިއެވެ.
މި ހަމަލާ ދޭން މެދުވެރިވި ސަބަބު އަދިވެސް ސާފުނުވާއިރު، އާދިއްތަ ދުވަހު މިކަމާ ގުޅޭ އިތުރު މައުލޫމާތު ހާމަކުރެވޭނެ ކަމަށް އުންމީދުކުރައްވާ ކަމަށް ޓްރަމްޕް ވިދާޅުވިއެވެ.
އަހަރަކު އެއްފަހަރު ބާއްވާ ވައިޓް ހައުސް ކޮރެސްޕޮންޑެންޓްސް ޑިނަރ ވޮޝިންޓަން ހިލްޓަން ހޮޓަލުގައި ކުރިއަށްދަނިކޮށް، ބަޑީގެ އަޑު އިވުނީ ރައީސް އެ ތަނުގައި ތަގުރީރު ކުރައްވަން ހަމަޖެހިފައި ވަނިކޮށް، ހޯލާ ކައިރި ސަރަހައްދަކުންނެވެ.
އެ ހަފުލާގައި ތިބި ބީބީސީގެ ބައެއް ނޫސްވެރިން ރިޕޯޓްކުރި ގޮތުގައި، ބަޑީގެ އަޑާއެކު މުޅި ސަރަހައްދުގައި ބޮޑު ހާސްކަމެއް އުފެދުނެވެ.
ސީކްރެޓް ސާވިސްގެ އެޖެންޓުން ރައީސާއި ފަސްޓް ލޭޑީ އެ ތަނުން ބޭރަށް ގެންދިޔަ މަންޒަރު ފެނިފައިވާއިރު، ހެލްތު ސެކްރެޓަރީ ރޮބަޓް އެފް ކެނެޑީ ޖޫނިއާ އާއި ޑިފެންސް ސެކްރެޓަރީ ޕީޓް ހެގްސެތު ހިމެނޭހެން ސަރުކާރުގެ އިސްވެރިންވެސް އެ ބޭފުޅުންގެ ސަލާމަތީ ފާރަވެރިން ވަނީ ރައްކާތެރިކަމާއެކު އެ ތަނުން ގެންގޮސްފަ އެވެ.
ހަފުލާގެ އެހެން ބައިވެރިން ހޯލު ތެރޭގައި ތިބީ ބޭރަށް ނުނިކުމެވޭ ގޮތަށް ބަންދުކޮށްފައެވެ. އެ ވަގުތު ހޯލުގައި ތިބި ގިނަ އަދަދެއްގެ ނޫސްވެރިން ދިޔައީ އެ މީހަކު ނިސްބަތްވާ މީޑިއާ އިދާރާތަކަށް އެ ޚަބަރު ފޯރުކޮށްދިނުމަށް މަސައްކަތް ކުރަމުންނެވެ.
ވައިޓް ހައުސް ކޮރެސްޕޮންޑެންޓްސް ޑިނަރ އަކީ 1921 ވަނަ އަހަރުން ފެށިގެން އެމެރިކާގެ ނޫސްވެރިން ބާއްވަމުން އަންނަ ސަގާފީ ހަރަކާތެކެވެ. އާންމުގޮތެއްގައި މި ހަފުލާގައި އެ އިރެއްގައި ހުންނަވާ ރައީސަކު ބައިވެރިވެވަޑައިގަންނަވައެވެ.
މިއީ ޓްރަމްޕް ރައީސްކަމުގެ މަގާމުގައި ހުންނަވައިގެން މި ހަފުލާގައި ބައިވެރިވެވަޑައިގެންނެވި ފުރަތަމަ ފަހަރެވެ. އެމަނިކުފާނު އެންމެ ފަހުން މި ހަފުލާގައި ބައިވެރިވެވަޑައިގަތީ 2011 ވަނަ އަހަރުއެވެ.
