ޔޫއޭއީއަށް ދިން މިސައިލް ހަމަލާ ހުއްޓުވައިފި ކަމަށް އެ ގައުމުން ބުނެފި
ހޮރްމޫޒް ކަނޑުއޮޅިން ދަތުރުކުރި އެމެރިކާގެ މަނަވަރުތަކަކަށް އީރާނުން ދިން ހަމަލާތަކެއް އެމެރިކާގެ އަސްކަރިއްޔާއިން ނާކާމިޔާބުކޮށްލައި، އަމިއްލަ ދިފާއުގައި އީރާނުގެ އަމާޒުތަކަށް ރައްދު ހަމަލާދީފި ކަމަށް އެމެރިކާ އިން ބުނޭ. މި ކުރިމަތިލުންތަކާ ގުޅިގެން ދެ ގައުމުގެ ދެމެދުގައި އޮތް ނާޒުކު ހަނގުރާމަ ހުއްޓާލުމުގެ އެއްބަސްވުމަށް ބޮޑެތި ގޮންޖެހުންތަކެއް ކުރިމަތިވެފައިވީ ނަމަވެސް، އެ އެއްބަސްވުން އަދިވެސް ދެމިއޮތް ކަމަށް ރައީސް ޓްރަމްޕް ވަނީ ވިދާޅުވެފައި. މި ހަމަލާތަކުގައި އެމެރިކާގެ އެއްވެސް މަނަވަރަކަށް ގެއްލުމެއް ލިބިފައި ނުވާ ކަމަށާއި، މަސްރަހު އިތުރަށް ގޯސްކުރަން ބޭނުންނުވާ ކަމަށް އެމެރިކާއިން ވަނީ ހާމަކޮށްފައި.
އެކުވެރި އަރަބި އިމާރާތުގެ އަބޫދާބީގައި ހުންނަ އެމިރޭޓްސް ޓަވަރުގެ އޮބްޒަވޭޝަން ޑެކުން 23 ޑިސެމްބަރު 2018 ގައި އެ ސިޓީ ފެންނަ މަންޒަރެއް. | ރޮއިޓާސް
އީރާނާއެކު ވެފައިވާ ހަނގުރާމަ ހުއްޓާލުމުގެ އެއްބަސްވުމަށް އަނެއްކާވެސް ގޮންޖެހުންތަކެއް ކުރިމަތިވެފައިވާ ދަނޑިވަޅެއްގައި، ހުކުރު ދުވަހުގެ ފަތިހުގެ ވަގުތެއްގައި އެކުވެރި އަރަބި އިމާރާތަށް އަމާޒުކޮށް ދިން މިސައިލް އަދި ޑްރޯން ހަމަލާތަކެއް އެ ގައުމުގެ އެއާ ޑިފެންސް ސިސްޓަމްތަކުން ހުއްޓުވަމުންދާ ކަމަށް ޔޫއޭއީގެ މިނިސްޓްރީ އޮފް ޑިފެންސުން އިއުލާނުކޮށްފިއެވެ.
ވައިގެ މަގުން ދިން މި ހަމަލާތައް ކާމިޔާބުކަމާއެކު ހުއްޓުވުމުގެ ތެރޭގައި ބިމަށް ވެއްޓިފައިވާ އެއްވެސް ކަހަލަ ކުނިބުންޏާއި ނުވަތަ ބައިތަކަކާ ކައިރިނުވުމަށާއި، އޭގައި އަތްނުލުމަށާއި އަދި ފޮޓޯ ނުނެގުމަށް އެ ގައުމުގެ ދިފާއީ ވުޒާރާއިން ރައްޔިތުންނަށް އިރުޝާދު ދީފައިވެއެވެ.
މި ހާދިސާގެ އެތައް ގަޑިއިރެއް ކުރިން، ބުރާސްފަތި ދުވަހުގެ ރޭ ހޯރްމޫޒް ކަނޑުއޮޅިން ދަތުރުކުރަމުންދިޔަ އެމެރިކާގެ ކަނޑުގެ ސިފައިންގެ ތިން މަނަވަރަކަށް އީރާނުން ދިން ހަމަލާތަކެއް ހުއްޓުވާފައިވާ ކަމަށާއި، އެމެރިކާގެ ސިފައިންނަށް ހަމަލާދިނުމުގައި ބޭނުންކުރި އީރާނުގެ އަސްކަރީ މަރުކަޒުތަކަށް ރައްދު ހަމަލާދީފައިވާ ކަމަށް އެމެރިކާގެ އަސްކަރިއްޔާއިން ވަނީ ބުނެފައެވެ.
އެމެރިކާގެ ސެންޓްރަލް ކޮމާންޑުން ސޯޝަލް މީޑިއާގައި އާންމުކުރި ބަޔާނެއްގައި ބުނެފައިވަނީ، އެއްވެސް އުދުވާނަކާ ނުލައި އީރާނުން ދިން ހަމަލާތައް އެމެރިކާގެ ސިފައިން ހުއްޓުވާފައިވާ ކަމަށާއި، އަދި އަމިއްލަ ދިފާއުގައި އީރާނުގެ އަމާޒުތަކަށް ހަމަލާދީފައިވާ ކަމަށެވެ.
އެމެރިކާގެ އަސްކަރިއްޔާއިން ހާމަކުރި ގޮތުގައި އީރާނުގެ ހަމަލާތަކުގައި އެމެރިކާގެ އެއްވެސް މަނަވަރަކަށް ގެއްލުމެއް ލިބިފައެއް ނުވެއެވެ. އަދި މަސްރަހު އިތުރަށް ގޯސްކުރަން އެމެރިކާއިން ބޭނުންނުވާ ކަމަށާއި، ނަމަވެސް އެމެރިކާގެ ސިފައިންގެ ސަލާމަތާއި ރައްކާތެރިކަން ކަށަވަރުކުރުމަށް އަބަދުވެސް ތައްޔާރީ ހާލަތުގައި އޮތް ކަމަށް އެމެރިކާއިން ބުނެފައިވެއެވެ.
ވޮޝިންގްޓަންގައި ނޫސްވެރިންނާ ވާހަކަދައްކަވަމުން ރައީސް ޑޮނަލްޑް ޓްރަމްޕް ވިދާޅުވީ، ހަމަލާ ބަދަލުކުރުންތައް ހިނގަމުންދިޔަ ނަމަވެސް، ހަނގުރާމަ ހުއްޓާލުމުގެ އެއްބަސްވުން އަދިވެސް ދެމިއޮތް ކަމަށެވެ.
އެމެރިކާއާއި އީރާނާ ދެމެދު ވެފައިވާ މި ނާޒުކު އެއްބަސްވުމަށް ބޮޑެތި ގޮންޖެހުންތަކެއް ކުރިމަތިވެފައިވީ ނަމަވެސް، އޭޕްރިލް މަހުގެ 8 ވަނަ ދުވަހުން ފެށިގެން މި އެއްބަސްވުމަށް އަންނަނީ އަމަލުކުރަމުންނެވެ. ފެބްރުއަރީ 28 ވަނަ ދުވަހު އެމެރިކާއާއި އިސްރާއީލުން އީރާނަށް ދޭން ފެށި ހަމަލާތަކާއެކު ފެށުނު މި ހަނގުރާމަ ނިމުމަކަށް ގެނައުމަށްޓަކައި، މިދިޔަ މަހު ޕާކިސްތާނުން މެދުވެރިއެއްގެ ދައުރު އަދާކޮށްގެން ދެ ގައުމުގެ ދެމެދުގައި ބޭއްވި ސީދާ މަޝްވަރާތަކުން އެއްވެސް ނަތީޖާއެއް ނުކުމެފައެއް ނުވެއެވެ.
