ޝަހުޒާނާއި ލީވާން އެއްވެސް ޝަރުތަކާ ނުލައި ވަގުތުން މިނިވަންކުރުމަށް އެމްޑީޕީއިން ގޮވާލައިފި
އަދަދު އެމްވީގެ ދެ ނޫސްވެރިން ޖަލަށްލި މައްސަލައިގައި ކަންބޮޑުވުން ފާޅުކޮށް، އެއީ ނޫސްވެރިކަމުގެ މިނިވަންކަމަށް ދިން ހަމަލާއެއްގެ ގޮތުގައި އެމްޑީޕީން ވަނީ ސިފަކޮށްފަ. ގާނޫނީ ވަކީލެއްގެ އެހީތެރިކަމާ ނުލައި ހިންގި މި އިޖުރާއަތްތަކަކީ ނޫސްވެރިންގެ އަޑު ކަނޑުވާލުމަށް ހިންގި އަމަލެއް ކަމަށް ބުނެ، އެ ދެ ނޫސްވެރިން ވަގުތުން މިނިވަންކުރުމަށް އެ ޕާޓީން ގޮވާލި. މީގެއިތުރުން، ރާއްޖޭގެ ޑިމޮކްރެޓިކް ނިޒާމު ހިމާޔަތްކުރުމަށް ބައިނަލްއަގުވާމީ ފަރާތްތަކުގެ އެހީތެރިކަމަށް ވެސް އެމްޑީޕީން ވަނީ އެދިފަ.
އަދަދު ނޫހުގެ ނޫސްވެރިޔާ މުހައްމަދު ޝަހުޒާން އަދި ލީވާން | ރާއްޖެ އެމްވީ
އަދަދު އެމްވީގެ ނޫސްވެރިން ކަމަށްވާ މުޙައްމަދު ޝަހުޒާން އާއި ލީވާން އަލީ ނާޞިރު ޖަލަށްލީ މައްސަލަ ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އިން އެންމެ ހަރުކަށި އިބާރާތުން ކުށްވެރިކޮށް، އެ ދެ ނޫސްވެރިން އެއްވެސް ޝަރުތަކާ ނުލައި ވަގުތުން މިނިވަންކުރުމަށް ގޮވާލައިފި އެވެ.
މީގެ ތެރެއިން އެއް ނޫސްވެރިއަކު ޖަލަށްލާފައިވަނީ ކޯޓު އަމުރަކާ ގުޅޭގޮތުން ރިޕޯޓު ކުރުމުންނެވެ. އަދި އަނެއް ނޫސްވެރިޔާ ޖަލަށްލާފައިވަނީ ސުވާލެއް ކުރުމާ ގުޅިގެންނެވެ. މިއީ އެއްވެސް ހާލެއްގައި ޖިނާއީ ކުށްތަކެއް ނޫން ކަމަށް އެމްޑީޕީއިން ބުނެ އެވެ. އަދި މިއީ މިނިވަން ނޫސްވެރިކަމުގެ އަސާސީ ޒިންމާތަކެއް ކަމަށްވާއިރު، އެ ނޫސްވެރިންގެ މައްޗަށް ދައުވާކުރުމަކީ ރާއްޖޭގެ މިނިވަން ނޫސްވެރިކަމަށް ގަސްދުގައި ދެމުންދާ ސީދާ ހަމަލާއެއް ކަމަށް އެމްޑީޕީ އިން ބުނެ އެވެ.
މި ދެ ނޫސްވެރިންނަށް ވެސް ގާނޫނީ ވަކީލެއްގެ އެހީތެރިކަން ހޯދުމުގެ ފުރުސަތު ނުދީ، ދިފާއުވުމަށް އެކަށީގެންވާ ވަގުތު ދީފައިނުވާތީ އެމްޑީޕީން ވަނީ އެކަމާ މެދު ނުހަނު ކަންބޮޑުވުން ފާޅުކޮށްފަ އެވެ. މިއީ އިންސާފުވެރި ޝަރީއަތެއް ލިބުމުގެ ހައްގަށް އަރައިގަނެ، ގާނޫނީ އިޖުރާއަތްތަކަށް ކުޑައިމީސްކުރުމުގެ އަމަލެކެވެ. މި ހައްޔަރުކުރުންތަކަކީ ރައީސް މުއިއްޒުގެ އަމަލުފުޅުތަކާ މެދު ކުރެވޭ ސުވާލުތައް ހުއްޓުވައި، ނޫސްވެރިންގެ އަޑު ކަނޑުވާލުމަށް ދައުލަތުގެ ބާރުގެ ބޭނުންކޮށްގެން ހިންގާ ސިލްސިލާ އަމަލުތަކުގެ ބައެއް ކަމަށްވެސް އެ ޕާޓީން ފާހަގަކުރެ އެވެ.
ރާއްޖޭގެ ޑިމޮކްރެޓިކް ނިޒާމު ހީނަރުވަމުންދާ މައްސަލައިގައި ދިވެހި ސަރުކާރާ އެކު ކުއްލި ގޮތަކަށް މަޝްވަރާކޮށް، ސަރުކާރަށް ސާފު މެސެޖެއް ދިނުމަށް ބައިނަލްއަގުވާމީ ބައިވެރިންނަށް އެމްޑީޕީން ވަނީ ގޮވާލާފަ އެވެ. އަދި މުޙައްމަދު ޝަހުޒާން އާއި ލީވާން އަލީ ނާޞިރު ވަގުތުން މިނިވަންކުރުމަށާއި، މިނިވަން ނޫސްވެރިކަން ހިމާޔަތްކުރުމަށް ގާނޫނުއަސާސީން ކަށަވަރުކޮށްދީފައިވާ ހައްގުތައް ނެގެހެއްޓުމަށް ކަމާބެހޭ ފަރާތްތަކަށް އެ ޕާޓީން ވަނީ އިލްތިމާސްކޮށްފަ އެވެ.
