ޚަރަދު ކުޑަކުރުމުގެ ބަހަނާއަށްފަހު އަނެއްކާވެސް އަތޮޅު އޮފީސް

މީހުން ރައީސް މުއިއްޒަށް މުޚާތަބު ކުރާ ބައެއް އެހެން ނަންނަން ހުރެއެވެ. ޚާއްޞަކޮށް ދޮގު ހަދާ މީހުންނަށް އަރަބިން ކިޔާ އުޅޭ ނަމަކީ އޭގެ އެއް ނަމެވެ. މިހާރު އެއީ ސަރުކާރަށް ތާއީދު ކުރާ މީހުންނަށް ހުތުރު ބަހަކަށް ވާތީ އެކަމަށް އިހުތިރާމް ކުރާނަމަވެ. އަނެއް ބަޔަކު ބޭނުންކުރާ ނަން ހަމަ އެއްގޮތަކަށްވެސް ބޭނުމެއް ނުކުރާނަމެވެ. އެކަމަކުވެސް ކީހާ ޅެން ފަރިއްސަށް ވާ ކަމާއި ވިދާޅުވާ ގޮތާ ދިމާ އިދިކޮޅަށް ކަންކުރައްވާ ވާހަކަ ބުނާކަށް ޖެހިލުންވުމުގެ އެއްވެސް ބޭނުމެއްނެތެވެ.

އިދާރީ ދާއިރާތައް ލާމަރުކަޒީ އުސޫލުން ހިންގަން ފެށީ އައްޔަން ކުރާ އަތޮޅު ވެރީންނާއި ރަށު ކަތީބުން ނު ބައިތިއްބާން ވެގެންނެވެ. ރައްޔިތުންގެ ކަންކަން ކުރުމަށް ރައްޔިތުން އިންތިޚާބު ކުރާ މީހުން ހޮވުމަށެވެ. ރަށްރަށާއި އަތޮޅުތައް ހިންގާނޭ މީހުން ރައްޔިތުންދޭ ވޯޓަކުން އިންތިޚާބު ކުރުމަށެވެ. ސިޓީ ކައުންސިލްތަކުގެ އިތުރުން ރަށު ކައުންސިލްތައް އަދި އަތޮޅު ކައުންސިލްތައް އުފެއްދީ އެކަމަށެވެ. ޤާނޫން އަސާސީގައި ލިޔުނު ލާމަރުކަޒީ އުސޫލުން ރާއްޖެ ހިންގުމަށެވެ.

މިހާރު އަމަލު ކުރަމުންދާ ފެހި ގާނޫން އަސާސީ ވުޖޫދުވިފަހުން އަމަލު ކުރަމުން އައީ އެހަމައިގެ މަތިންނެވެ. އެކަމަކު ރައީސް މުއިއްޒުގެ ދުރު ވިސްނުންފުޅުގެ ރާޑަރަށް ގެންނެވި އެއްކަމަކީ އަތޮޅު ކައުންސލްތަކުގެ ބޭނުމެއް ނެތްކަމެވެ. ކުރަނީ އެއްކަމެއްކަމަށް ވިދާޅުވެ އެކައުންސިލްތަކަކީ ބޭނުން ބައެއް ނޫން ކަމަށެވެ. ބޭނުމަކީ ވަރަށް ރަނގަޅު ބޭނުމެކެވެ. ނަމުން ވަރަށް ފައިދާބޮޑު ބޭނުމެކެވެ. ހިންގުމުގެ ޚަރަދު ކުޑަކުރުމުގެ ބޭނުމުގައެވެ. ކުރެވޭ އިސްރާފް ކުޑަކުރުމަށެވެ. ބޭކާރު ޚަރަދު ނުކުރުމަށެވެ.

ރައީސް މުއިއްޒުގެ އެބަސްފުޅު ކިތަންމެހާ ވެސް ރީއްޗެވެ. އެކަމަކު އެކަން މިވީ ހިކުމަތްތެރިކަމާއެކު ޖެއްސެވި ވަރުގަދަ މަޅިއަކަށެވެ. ވިދާޅުވި ވާހަކަފުޅު ވެގެން އެދިޔައީ ކަނޑުގައި އަޅާލި ރޮނގަކަށެވެ. އުވާލި ކައުންސިލްތަކުގެ ބަދަލުގައި އެހެއްދެވީ އިހު ހިންގަމުން އައިފަދަ އަތޮޅު އޮފީސް ތަކެކެވެ. ސީދާ ރައީސުލް ޖުމްހޫރިއްޔާއަށް ބާރު ފޯރުވޭފަދަ ގޮތަށެވެ. އެލްޖީއޭގެ އޮފީހެއްގެ ގޮތުގައެވެ. މާލެއިން އަތޮޅުތަކުގެ ކަންކަން ކުރާނެ ގޮތް އެންގުމަށް ކުރީގެ ގޮތައް އަތޮޅު އޮފީހެވެ. މިހާރު މަދީ ރައީސުލް ޖުމްހޫރިއްޔާ އައްޔަންކޮށް ފަތްކޮޅު ދީފައި ފޮނުވާ އަތޮޅުވެރިއެކެވެ. ޚަރަދު ކުޑަކުރުމުގެ ބަހަނާ، އަމާޒުފަތްގަނޑަކަށް ހައްދަވައިގެން އެހެއްދެވީ އިހުއޮތް އަތޮޅު އޮފީހެވެ.

ޚަރަދު ބޮޑުވެގެން އަތޮޅު ކައުންސިލްތައް އުވާލައި ހެދި އަތޮޅު އޮފީސްތަކުގައިވެސް ކުރިންތިބިވަރަށް މުވައްޒަފުން ބައިތިއްބައެވެ. ހިންގާނެ ވެރިންލައެވެ. އޮފީހަށް ކުރާން ޖެހޭ އެންމެހާ ޚަރަދުތައް ކުރުމަށް ވަނީ ނިންމާފައެވެ. އެތަންތަނުގެ އެންމެ އިސްވެރިންނަށް ލެވޭ ސިޔާސީ މީހުންގެ މުސާރަ ހަމަ ގައިމުވެސް އަތޮޅު ކައުންސިލަރުންގެ މުސާރައަށްވުރެ ކުޑަވުމަކީ ނާދިރުކަމެކެވެ.

އިހުއޮތް ކަތީބާއި އަތޮޅުވެރިންގެ ނިޒާމް އުވާލައި ގެނައި ލާމަރުކަޒީ ނިޒާމް ގަޑުބަޑުކޮށް މުޅި ނިޒާމް ފުނޑާލަމުންދާތީ އާއްމު ރައްޔިތުންދަނީ ސަރުކާރަށް ފާޑު ކިޔަމުންނެވެ. ޚާއްޞަކޮށް ގާނޫނީ ބޭފުޅުން ވިދާޅުވާ ގޮތުންނަމަ އެއީ ކުރެވޭނެ ކަމެއް ނޫނެވެ. ގާނޫން އަސާސީއަކުން އެކަމަކަށް ތަނެއް ނުދެއެވެ.

ސުޕްރީމް ކޯޓުގެ ކުރީގެ ފަނޑިޔާރު ހުސްނުއް ސުއޫދު ވިދާޅުވީ މި ބަދަލާއެކު ގާނޫނުއަސާސީގެ 8 ވަނަ ބާބާއި ގަސްތުގައި ޚިލާފުވެފައިވާ ކަމަށެވެ. އެގޮތުން ގާނޫނުއަސާސީގައި އޮތް ގޮތުން އިދާރީ ދާއިރާއެއް ހިންގަންޖެހޭނީ އަތޮޅުގެ ރައްޔިތުން އިންތިޚާބު ކުރާ މެންބަރުން ކަމަށް ވިދާޅުވެ ސުއޫދު ވަނީ ގާނޫނުއަސާސީއާ ޚިލާފުވީ މީހުން ގެ މައްޗަށް ދައުވާ ކުރަންޖެހޭ ކަމަށް ވެސް ވިދާޅުވެފަ އެވެ.

ކޮންމެއަކަސް ކައުންސިލްތަކުގެ ބާރު ކުޑަކުރުމާއި ބާރުތައް ރައީސުލް ޖުމްހޫރިއްޔާގެ އަތަށް ނެގުމަށް ރައީސް މުއިއްޒު ކުރައްވާ ކަންކަމުގެ ތެރެއަށް އަނެއްކާވެސް އިތުރުވެގެން މިދިޔައި އިތުރު ބޮޅެކެވެ. މަޖިލީހުގެ ސުޕަރ މެޖޯރިޓީ ބޭނުން ކުރައްވައިގެން، ލާމަރުކަޒީ ނިޒާމް ފުނޑާލެއްވުމުގެ މަސައްކަތުގައި އަނެއްކާވެސް އެ ގިރާކުރެއްވީ އިތުރު ހަރުފަތެކެވެ. މިވަރުންދާނަމަ އަތޮޅުވެރިންނާއި ކަތީބުން އައްޔަންކޮށް ރައީސުލް ޖުމްހޫރިއްޔާ ދެއްވާ ފަތްކޮޅު ދެއްވުމަކީ ކައިރި ކަމެކެވެ. މިއީ ރައްޔިތުން މިކަމާ ތެދުވާން ޖެހޭ ކަމެކެވެ.