ހިރިމަރަދޫ ކައުންސިލާއި އަތޮޅު ކައުންސިލްތައް ރަސްމީކޮށް އުވާލައިފި
މި ބަދަލާއެކު އައްޑޫ ސިޓީގެ އިދާރީ އޮނިގަނޑަށް ބަދަލުތަކެއް ގެނެސް، ހުޅުދޫ އަދި މީދޫގައި ވަކި ރަށު ކައުންސިލް އިދާރާތަކެއް އުފެއްދުމަށް ވަނީ ހަމަޖެހިފަ. ހިރިމަރަދޫ ކައުންސިލް އުވާލަނީ އެ ރަށުގެ ރައްޔިތުން ހަނިމާދޫއަށް ބަދަލުކުރުމަށް ނިންމާފައިވާތީ.
ހދ. ހިރިމަރަދޫ ކައުންސިލާ ރައީސް މުއިއްޒު 2024 ވަނަ އަހަރު ބޭއްވި ބައްދަލުވުމެއްގެ ތެރެއިން | ރައީސް އޮފީސް
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެނެވުނު ބަދަލުތަކާ ގުޅިގެން، ހދ. ހިރިމަރަދޫ ކައުންސިލާއި ރާއްޖޭގެ ހުރިހާ އަތޮޅު ކައުންސިލްތަކެއްގެ އިދާރާތައް 2026 މޭ 17 ވަނަ ދުވަހުން ފެށިގެން އުވާލައްވައިފި އެވެ.
ހޯމަ ދުވަހު ރައީސުލްޖުމްހޫރިއްޔާގެ އޮފީހުން ނެރުއްވި އިއުލާނުގައިވާ ގޮތުން، މި ބަދަލުތަކާއެކު އައްޑޫ ސިޓީގެ އިދާރީ އޮނިގަނޑަށް ވެސް ވަނީ ބޮޑެތި ބަދަލުތަކެއް ގެންނަވާފަ އެވެ.
މި ނިންމެވުމުގެ ދަށުން އައްޑޫ ސިޓީގެ މީދޫ އަދި ހުޅުދޫއަށް ވަކި ރަށު ކައުންސިލް އިދާރާތަކެއް ވަނީ އަލަށް އުފައްދަވާފަ އެވެ. ރައީސުލްޖުމްހޫރިއްޔާގެ ގަރާރު ނަންބަރު 2025/33 އާއި 2025/34 އަށް ރިއާޔަތްކުރައްވައި ނިންމެވި މި ނިންމެވުމާއެކު، "އައްޑޫ މީދޫ" އަދި "އައްޑޫ ހުޅުދޫ" ކައުންސިލްގެ އިދާރާ ވަނީ ރަސްމީކޮށް ގާއިމުކުރައްވާފަ އެވެ. މީގެ އިތުރުން ހިތަދޫ، މަރަދޫ، މަރަދޫފޭދޫ އަދި ފޭދޫ ހިމެނޭ ސަރަހައްދަކީ "އައްޑޫ ސިޓީ" ގެ ނަމުގައި ހިންގާ ވަކި އިދާރީ ރަށެއްގެ ގޮތުގައި ކަނޑައަޅުއްވައި، އައްޑޫ ސިޓީ ކައުންސިލްގެ އިދާރާ ވެސް ވަނީ އަލުން ތަރުތީބުކުރައްވާފަ އެވެ.
ސަރުކާރުގެ އިދާރާތަކުން ލިޔުއްވާ ރަސްމީ ސިޓީތަކުގައި ނަންބަރު ޖެއްސެވުމަށް ހަމަޖެހިފައިވާ އުސޫލަށް ވެސް މިހާރު ވަނީ ބަދަލު ގެންނަވާފަ އެވެ. އެގޮތުން "އައްޑުއަތޮޅު އައްޑޫ މީދޫ ކައުންސިލްގެ އިދާރާ" އަށް ފޮނުވާ ސިޓީތަކުގައި 1140 ބޭނުންކުރަން ޖެހޭއިރު، "އައްޑުއަތޮޅު އައްޑޫ ހުޅުދޫ ކައުންސިލްގެ އިދާރާ" އަށް ފޮނުވާ ސިޓީތަކުގައި ބޭނުންކުރަން ޖެހޭނީ 1141 އެވެ. މި ދެ އިދާރާގެ ނަން އިނގިރޭސި ބަހުން ބޭނުންކުރާނެ ރަސްމީ ގޮތް ވެސް ރައީސުލްޖުމްހޫރިއްޔާގެ އޮފީހުން ވަނީ އާންމުކުރައްވާފަ އެވެ.
ހދ. ހިރިމަރަދޫ ކައުންސިލް އުވާލަން ނިންމެވީ، އެ ރަށުގެ ރައްޔިތުން އެ އަތޮޅު ހަނިމާދޫ އަށް ބަދަލުކުރުމަށް ސަރުކާރުން ނިންމަވައި، ހިރިމަރަދޫއަކީ މީހުން ދިރިނޫޅޭ ރަށެއްގެ ގޮތުގައި ރައީސުލްޖުމްހޫރިއްޔާ ކަނޑައަޅުއްވާފައިވާތީ އެވެ. އެހެންކަމުން 2026 މޭ 17 އިން ފެށިގެން އެ ރަށުގެ ކައުންސިލާއި ކައުންސިލްގެ އިދާރާ ވެސް ރަސްމީކޮށް އުވޭނެ އެވެ.
މުޅި ރާއްޖޭގެ ހުރިހާ އަތޮޅު ކައުންސިލްތަކެއް އުވާލަން ނިންމެވީ ލާމަރުކަޒީ ގާނޫނަށް ގެނެވުނު 17 ވަނަ އިސްލާހާ ގުޅިގެންނެވެ. ގާނޫނުގައި ބަޔާންކޮށްފައިވާ ގޮތުން، މި ކައުންސިލްތައް އުވިގެންދާނީ އެންމެ އަވަހަށް ބާއްވާ ލޯކަލް ކައުންސިލްތަކުގެ އިންތިޚާބަށްފަހު، އަލަށް އިންތިޚާބުކުރެވޭ މެންބަރުން އެ މީހުންގެ މަގާމާ ހަވާލުވާ ދުވަހުން ފެށިގެންނެވެ. އެހެންކަމުން 2026 މޭ 17 އަކީ މި ބަދަލު ރަސްމީކޮށް އަމަލީ ސިފައަށް އަންނާނެ ތާރީޚު ކަމުގައި ރައީސުލްޖުމްހޫރިއްޔާ ވަނީ ކަނޑައަޅުއްވާފަ އެވެ.
