ކެތްތެރިންގެ އަޖުރަކީ އެއްވެސް ހިސާބަކާއިނުލާ ﷲ ދެއްވާ އެއްޗެއް، ކެތްތެރިވާން ޖެހޭ: ހައްޖު ހުތުބާ
ހައްޖު ދުވަހުގެ ހުތުބާގައި ވަނީ އަނިޔާ ލިބެމުންދާ މުސްލިމުންނަށް ކެތްތެރިކަން ދެއްވުން އެދި ދުއާކޮށްފަ. ހުތުބާގައި ވަނީ ﷲ އަށް ޝުކުރުވެރިވެ ކެތްތެރިކަން އިސްކުރުމަށް ނަސޭހަތްތެރިވެފަ.
މަސްޖިދުއް ނަބަވީގެ އިމާމް، ފަޟީލަތުއްޝައިޚް ޑރ. ޢަލީ އަލް ޙުޛައިފީ، 2026 މެއި 26 ވާ އަންގާރަ ދުވަހު މައްކާގެ މަސްޖިދުއް ނަމިރާގައި ޙައްޖު ޚުޔުބާ އިއްވަވަނީ | ސޯޝަލް މީޑިއާ
ކެތްތެރިންގެ އަޖުރަކީ އެއްވެސް ހިސާބަކާއިނުލާ ﷲ ދެއްވާ އެއްޗެއް ކަމަށާއި ކެތްތެރިވާން ޖެހޭ ކަމަށް ޙައްޖު ހުތުބާގައި ބުނެފި އެވެ.
އަރަފާތް ބިމަށް ޖަމާވެފައިވާ 1.5 މިލިއަނަށް ވުރެ ގިނަ ހައްޖުވެރިންނާ މުޚާތަބު ކުރައްވައި މިއަހަރުގެ ހައްޖު ޚުތުބާ ދެއްވީ ފަޟީލަތުއްޝައިޚް އަލީ އަލް ހުޒައިފީއެވެ. ހުތުބާގެ ތަރުޖަމާ ރާއްޖެޓީވީ މެދުވެރިކޮށް ވަނީ ގެނެސްދީފަ އެވެ. ޚުތުބާއަށްފަހު ހައްޖުވެރިން ވަނީ މެންދުރު ނަމާދާއި އަސްރު ނަމާދު ގަސްރުކޮށް ޖަމްޢުކޮށްފައެވެ.
މީގެ އިތުރުން، މުޙައްމަދު صلى الله عليه وسلم އަކީ މާތްﷲ ފޮނުއްވި އެންމެ ފަހުގެ ރަސޫލާކަން ހަނދާންކޮށްދެއްވައި، ދޮގުހެދުމާއި، ދޭތެރެޖެއްސުމާއި، ދީނުގެ ތެރެއަށް އަލަށް އުފައްދާ ކަންތައްތަކުން (ބިދުޢަތަކުން) ދުރުހެލިވުމަށް ޝައިޚް ނަސޭހަތްތެރިވެވަޑައިގެންނެވިއެވެ. އަދި ހައްޖުގެ މަތިވެރި އަޅުކަމަކީ މުޅި ދުނިޔޭގެ މުސްލިމުންގެ މެދުގައި އޮންނަ އެއްބައިވަންތަކަމާއި އުޚުއްވަތްތެރިކަން ރަމްޒުކޮށްދޭ އަޅުކަމެއްކަން އެމަނިކުފާނު ފާހަގަކުރެއްވިއެވެ.
ހައްޖުގެ އަޅުކަމުގެ ތެރޭގައި އަދަބު އަޚްލާޤު ހިފެހެއްޓުމަށާއި، ސިޔާސީ ހަރަކާތްތަކާއި ޖަދަލުކުރުންތަކުން ދުރުހެލިވުމަށް ޝައިޚް ހުޒައިފީ އިރުޝާދު ދެއްވިއެވެ. އެމަނިކުފާނު ވިދާޅުވީ ހައްޖުގެ ތެރޭގައި އުރެދުންތެރި އަމަލުތަކާއި، ޒުވާބުކުރުމާއި، ސިޔާސީ ޝިއާރުތައް އުފުލުން ފަދަ ކަންކަމަށް ޖާގައެއް ނެތް ކަމަށެވެ. އަދި ހައްޖުގެ ކަންކަން އިންތިޒާމުކުރާ ފަރާތްތަކުގެ އިރުޝާދުތަކަށް ފުރިހަމައަށް ބޯލަނބައި، ހަމަނުޖެހުންތަކުން ދުރުހެލިވެ ފުރާނަތައް ސަލާމަތްކުރުމަށް ސަމާލުކަން ދިނުމަށްވެސް ގޮވާލެއްވިއެވެ.
ހުތުބާގައި ވަނީ މާތްﷲ އަށް ބިރުވެވުމާއި، ޤިޔާމަތް ދުވަހަށް ތައްޔާރުވުމުގެ މުހިންމު ކަމަށް އަލިއަޅުވާލާފަ އެވެ. ގިޔާމަތް ދުވަހަށް ތައްޔާރުވާން ކުރެވޭނެ އެންމެ މުހިންމުކަމަކީ ފާފަތަކާއި ދުރުހެލިވުން ކަަމަށް ހުތުބާގައި ބަޔާންކޮށްފައިވެ އެވެ. މީގެ އިތުރުން ތަގުވާވެރިވެ މާތްﷲ ނަހީކުރައްވާފައިވާ ކަންކަމާއި ދުރުވުމަށް ހުތުބާގައި ވަނީ ނަސޭހަތްތެރިވެފަ އެވެ.
ހަމައެހެންމެ ހުތުބާގައި ވަނީ ޝިރުކުން ރައްކާތެރިވުމުގެ މުހިންމު ކަމަށް އަލިއަޅުވާލާފަ އެވެ. ތަގުވާވެރިވުމަކީ ﷲ އެންގެވި މަގުން ކަންކަން ކުރުމާއި ނަހީކުރެއްވި ކަންކަމުން ދުރުވުން ކަމަށް ވާއިރު ތަގުވާވެރިވުމަކީ އީމާންކަމުގެ ރުކުންތައް ފުރިހަމަކޮށްދިނުން ކަމަށް ހުތުބާގައި ބަޔާންކޮށްފައިވެ އެވެ.
އީމާޏްކަމުގެ އަހުލުވެރިންގެ ޝިޢާރަކީ ތައުޙީދު ކަމަށް ވެސް ހުތުބާގައި ބުނެފައިވެ އެވެ. އިސްލާމްދީނުގެ ރުހުންތައް ވެސް ބިނާވެގެން ވަނީ ތައުހީދުގެ މަތީގައި ކަން ހުތުބާގައި ވަނީ ފާހަގަކުރައްވާފަ އެވެ.
މި ހުތުބާގައި ވަނީ ﷲ އަށް ޝުކުރުވެރިވެ ކެތްތެރިކަން އިސްކުރުމަށް ނަސޭހަތްތެރިވެފަ އެވެ. ކަންކަމުގައި ކެތްތެރިވުމަކީ އެއީ ކޮންމެހެން ކުރަން ޖެހޭ ކަމެއް ކަމަށް ހުތުބާގައި ބަޔާންކޮށްފައިވެ އެވެ. ކެތްތެރިންނަށް އެއުރެންގެ ދަރުމަ ދެއްވާހުށިކަން ކަށަވަރީ ހިސާބެއްނެތި ކަމަށް ހުތުބާގައި ބުނެފައިވެ އެވެ.
ހައްޖު ދުވަހުގެ ހުތުބާގައި އިތުރަށް ބުނެފައި ވަނީ ﷲ ނޫން އެހެން ފަރާތްތަކަށް އަޅުކަންކުރުމުން ﷲގެ ގެކޮޅު ޠާހިރުކުރެއްވުމަކީ އަންގަވާފައިވާ ކަމެއް ކަމަށެވެ. އަދި ސިޔާސީ ހުރިހާ ފިކުރަކުން އެ ގެކޮޅާއި އެ މާތް ބިން ޠާހިރުކުރަންވާނެކަން ހުތުބާގައި ވަނީ ފާހަގަކޮށްފަ އެވެ.
ހައްޖު ދުވަހުގެ ހުތުބާގައި ވަނީ އަނިޔާ ލިބެމުންދާ މުސްލިމުންނަށް ކެތްތެރިކަން ދެއްވުން އެދި ދުއާކޮށްފަ އެވެ.
ޚުތުބާ ނިންމަވާލެއްވީ މުޅި އިސްލާމީ އުންމަތުގެ ހާލަތު ރަނގަޅުކޮށްދެއްވުމަށާއި، ހައްޖުވެރިންގެ އަޅުކަން ގަބޫލުކުރައްވައި، އެމީހުންގެ ފާފަތައް ފުއްސަވައި، ސަލާމަތްތެރިކަމާއެކު އެނބުރި ގައުމަށް ދިއުމުގެ ތައުފީޤު ދެއްވުން އެދި ކުރެއްވި ޚާއްޞަ ދުޢާއަކުންނެވެ.
