ހުއްދަ ނެތި ހައްޖުވުމަށް ވަގަށް ބަޔަކު މައްކާއަށް ވައްދަން އުޅުނު ބަޔަކާއި، އޮޅުވާލައިގެން ފޭކު ހައްޖު ހުއްދަ ވިއްކި މީހަކު ސައުދީ ސަލާމަތީ ބާރުތަކުން ހައްޔަރުކޮށްފި
މި މައްސަލަތަކުގައި ހިމެނޭ މީހުންނާ މެދު ގާނޫނީ ފިޔަވަޅު އަޅައި ޕްރޮސެކިއުޝަނަށް ފޮނުވާފައިވާއިރު، ހައްޖުގެ ގަވާއިދުތަކަށް ފުރިހަމައަށް ބޯލެނބުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައެވެ. އަދި ގަވާއިދާ ޚިލާފު އެއްވެސް އަމަލެއް ފެނިއްޖެ ނަމަ ލަސްނުކޮށް ރިޕޯޓްކުރުމަށް ވެސް ސައުދީ ފުލުހުން ވަނީ އެދިފައި.
ސައުދީ އަރަބިއްޔާގެ މުގައްދަސް ރަށެއް ކަމަށްވާ މިނާގައި، "ޖަމްރާތު" އަށް އެރުމަށްޓަކައި، އުމުރުން ދުވަސްވީ މުސްލިމް ހާޖީއަކަށް ސައުދީ ފުލުހަކު އެހީތެރިވަނީ. | ގެޓީ އިމޭޖަސް
ސައުދީ އަރަބިއްޔާގެ ހައްޖާ ބެހޭ ގަވާއިދުތަކާ ޚިލާފުވި ތަފާތު ތިން ހާދިސާއެއްގައި، އެ ގައުމުގެ ތިން ރައްޔިތަކާއި އެ ގައުމުގައި ދިރިއުޅޭ ބޭރު ގައުމުތަކުގެ 19 މީހަކު ހައްޔަރުކޮށްފިއެވެ.
ހައްޖު ސެކިއުރިޓީ ފޯސްއިން ވަނީ ހައްޖު ހުއްދަ ނެތް ޕާކިސްތާނުގެ 17 މީހަކު، ފަރުބަދަތަކުގެ މެދުގައި ހުންނަ ނުހެދި ހުންނަ މަގުތަކާއި ވާދީތަކުގެ ތެރެއިން މައްކާއަށް ވައްދަން އުޅުނު ސައުދީ ދެ ރައްޔިތަކު ހައްޔަރުކޮށްފައެވެ. މި މީހުން މަސައްކަތް ކުރީ ހައްޖު ހުއްދަ ނެތި މައްކާއަށް ވަދެ އެ ތަނުގައި މަޑުކުރުމަށެވެ. ކަމާބެހޭ ފަރާތްތަކުން މިހާރު ވަނީ އެ މީހުން އަތުލައިގަނެ، ގާނޫނީ ފިޔަވަޅު އަޅާފައެވެ.
މީގެ އިތުރުން މައްކާ ސަރަހައްދުގެ ފުލުހުން ވަނީ، މީސްމީޑިއާ މެދުވެރިކޮށް މައްކާއަށް ވަނުމަށް ބޭނުންވާ ފޭކު ހުއްދަތަކެއް ވިއްކާ ކަމަށް ބުނެ އޮޅުވާލައިގެން އިޝްތިހާރު ކުރި ސައުދީ ރައްޔިތަކު ހައްޔަރުކޮށްފައެވެ. އޭނާއާ މެދު އަޅަންޖެހޭ ގާނޫނީ ފިޔަވަޅުތައް އެޅުމަށްފަހު، މިހާރު ވަނީ ޕަބްލިކް ޕްރޮސެކިއުޝަނަށް މައްސަލަ ފޮނުވާފައެވެ.
ހަމައެއާއެކު، ހައްޖު ސެކިއުރިޓީ ފޯސްއިން ވަނީ ހައްޖު ހުއްދަ ނެތް ޔަމަނުގެ ރައްޔިތަކު ގޮވައިގެން މައްކާއަށް ވަދެ، އެ ތަނުގައި މަޑުކުރަން އުޅުނު ޔަމަނުގެ އެހެން ރައްޔިތަކު ވެސް ހައްޔަރުކޮށްފައެވެ. އޭނާ ވެސް ވަނީ ގާނޫނީ އިޖުރާއަތްތައް ފުރިހަމަކުރުމަށްފަހު ޕަބްލިކް ޕްރޮސެކިއުޝަނަށް ހަވާލުކޮށްފައެވެ.
ސައުދީ އަރަބިއްޔާގެ ޖެނެރަލް ޑައިރެކްޓްރޭޓް އޮފް ޕަބްލިކް ސެކިއުރިޓީން ވަނީ ހުރިހާ އެންމެން ވެސް ހައްޖުގެ ގަވާއިދުތަކާއި އިރުޝާދުތަކަށް ފުރިހަމައަށް ބޯލެނބުމަށް ގޮވާލާފައެވެ.
