ޛުލްޙިއްޖާ މަހުގެ ހަނދު ބެލުން އާދިއްތަ ދުވަހު

2026 ވަނަ އަހަރުގެ މޭ މަހުގެ 17 ވާ އާދިއްތަ ދުވަހުގެ އިރުއޮއްސޭ ވަގުތު، މިއަހަރުގެ ޛުލްޙިއްޖާ މަހުގެ ހަނދު ބެލުމަށް ސައުދީ އަރަބިއްޔާގެ ސުޕްރީމް ކޯޓުން އެ ގައުމުގެ އެންމެހާ މުސްލިމުންނަށް ގޮވާލައިފިއެވެ.

ހުކުރު ދުވަހު އެ ކޯޓުން ނެރުނު ބަޔާނެއްގައި ބުނެފައިވަނީ، ހަމަ ލޮލުން ނުވަތަ ދުރުމީ ބޭނުންކޮށްގެން ވިޔަސް ހަނދު ފެނިއްޖެ މީހަކު، އެންމެ ކައިރީގައި ހުރި ކޯޓަކަށް ގޮސް ހެކިބަސް ދިނުމަށެވެ. 

މި އެންގުން ނެރެފައިވަނީ 29 ޝައްވާލް 1447 (18 އޭޕްރީލް 2026) އަކީ ޝައްވާލް މަހުގެ ފަހު ދުވަސް ކަމަށާއި، 19 އޭޕްރީލް 2026 ވާ އާދިއްތަ ދުވަހަކީ ޛުލްޤަޢިދާ މަހުގެ ފުރަތަމަ ދުވަސް ކަމަށް ކަނޑައަޅައި އެ ގައުމުގެ ސުޕްރީމް ކޯޓުން މީގެ ކުރިން ނެރުނު ގަރާރަށް ރިއާޔަތްކޮށެވެ.

އެ ގަރާރަށް ބަލާއިރު، ސުޕްރީމް ކޯޓުގެ ކަލަންޑަރުގައިވާ ގޮތުން ޛުލްޤަޢިދާ މަހުގެ 29 ވަނަ ދުވަހަކީ އަދި އުއްމުލް ގުރާ ކަލަންޑަރުގެ ހިސާބުތަކުން 30 ވަނަ ދުވަހަކީ 17 މޭ ވާ އާދިއްތަ ދުވަސް ކަމަށްވާތީ، ޛުލްޙިއްޖާ މަހުގެ ހަނދު ބެލުމުގެ ރަސްމީ ތާރީޚަކީ އެއީ ކަމަށް ކޯޓުން ވަނީ ކަނޑައަޅާފައެވެ.

މީގެ އިތުރުން، ހަނދު ބެލުމުގެ ގާބިލުކަން ހުރި ފަރާތްތަކުން އެކި ސަރަހައްދުތަކުގައި އުފައްދާފައިވާ ހަނދު ބެލުމުގެ ކޮމިޓީތަކުގައި ބައިވެރިވުމަށް ވެސް ސުޕްރީމް ކޯޓުން ވަނީ ހިތްވަރު ދީފައެވެ. އަދި މިއީ މުޅި އިސްލާމީ އުންމަތަށް ފައިދާކުރާނެ ކަމެއްކަން ފާހަގަކޮށް، މިކަމުގައި އެންމެންގެ އެއްބާރުލުން ބޭނުންވާކަން އެ ކޯޓުން ފާހަގަކުރިއެވެ.

ޛުލްޙިއްޖާ މަސް ފެށޭ ތާރީޚަށް ބިނާކޮށް، ކޮންމެ އަހަރަކު ބާއްވާ ޙައްޖުގެ އަޅުކަމުގެ ދުވަސްތަކާއި، މުޅި އިސްލާމީ ދުނިޔޭގައި ފާހަގަކުރާ އަޟްޙާ އީދު ނުވަތަ ބޮޑު އީދު ދުވަސް ކަނޑައެޅޭނެއެވެ.