ޒުލްހިއްޖާ މަހުގެ ފުރަތަމަ 10 ދުވަހު ހެޔޮ އަމަލުތައް އިތުރުކުރުމަށް ސައުދީ އަރަބިއްޔާގެ މުފްތީ ގޮވާލައްވައިފި
ޒުލްހިއްޖާ މަހުގެ ފުރަތަމަ ދިހަ ދުވަހަކީ މާތްﷲގެ ހަޟްރަތުގައި ލޯބިވެތިވެގެންވާ ދުވަސްތަކެއް ކަމުން، ފަރުޟު އަޅުކަންތަކަށް ފަރުވާތެރިވެ ފާފަތަކުން ދުރުހެލިވުމަށް ސައުދީގެ ގްރޭންޑް މުފްތީ އިލްތިމާސްކުރެއްވި. ހައްޖުގެ އަޅުކަމުގައި ބައިވެރިނުވާ މީހުން އަރަފާތް ދުވަހު ރޯދަހިފުމުގެ މުހިންމުކަން ފާހަގަކުރައްވައި، އެއީ އިސްވެދިޔަ އަހަރާއި ކުރިއަށް އޮތް އަހަރުގެ ފާފަ ފުހެވިގެންދާނެ ކަމެއްކަން މުފްތީ ބަޔާންކުރެއްވި.
ޝައިޚް ސާލިޙް އަލް ފައުޒާން | ސައުދީ ގެޒެޓް
ޒުލްހިއްޖާ މަހުގެ ފުރަތަމަ 10 ދުވަހު ހެޔޮ އަމަލުތައް އިތުރުކުރުމަށް ސައުދީ އަރަބިއްޔާގެ މުފްތީ ގޮވާލައްވައިފި އެވެ.
ޒުލްހިއްޖާ މަހުގެ ބަރަކާތްތެރި ފުރަތަމަ 10 ދުވަހުގެ ތެރޭގައި ނަމާދުކުރުމާއި، ސަދަގާތް ދިނުމާއި، ރޯދަހިފުމުގެ އިތުރުން ﷲ ހަނދުމަކުރުން (ޛިކުރުކުރުން) ފަދަ ހެޔޮ އަމަލުތަކާއި އަޅުކަންތައް އިތުރުކުރުމަށް ސައުދީ އަރަބިއްޔާގެ ގްރޭންޑް މުފްތީ އަދި ކައުންސިލް އޮފް ސީނިއާ ސްކޮލާސްގެ ރައީސް ފަޟީލަތުއްޝައިޚް ސާލިޙް އަލް ފައުޒާން މުސްލިމުންނަށް ވަނީ އިލްތިމާސްކުރައްވާފަ އެވެ.
މި ދުވަސްތަކުގައި ކުރާ ހެޔޮ އަމަލުތަކަކީ އެހެން އެއްވެސް ދުވަސްވަރެއްގައި ކުރާ އަމަލުތަކަށްވުރެ މާތްﷲގެ ހަޟްރަތުގައި ލޯބިވެތިވެގެންވާ އަމަލުތަކެއްކަން ބަޔާންކުރައްވާފައިވާ ރަސޫލާގެ ސުންނަތުގެ މައްޗަށް ޝައިޚް އަލް ފައުޒާން އަލިއަޅުއްވާލެއްވިއެވެ. "މި ދުވަސްތަކަކީ މާތްﷲ އެކަލާނގެ އަޅުތަކުންނަށް ދެއްވާފައިވާ ބަރަކާތްތެރި މޫސުމެއް ކަމުން، ފަރުޟު އަޅުކަންތަކަށް ފަރުވާތެރިވެ، ފާފަތަކުން ދުރުހެލިވާ ހާލު، ހެޔޮ އަމަލުތައް އިތުރުކުރުމަށް މުސްލިމުން ގަދައަޅައި މަސައްކަތް ކުރަންޖެހޭ،" ޝައިޚް ވިދާޅުވިއެވެ.
ހައްޖުގެ އަޅުކަމުގައި ބައިވެރިނުވާ މީހުން އަރަފާތް ދުވަހު ރޯދަހިފުމުގެ މަތިވެރިކަމާ ގުޅޭގޮތުން ވާހަކަދައްކަވަމުން، އެ ދުވަހުގެ ރޯދައަކީ އިސްވެދިޔަ އަހަރާއި ކުރިއަށް އޮތް އަހަރުގެ ފާފަ ފުހެވިގެންދާނެ ކަމެއްކަން މުފްތީ ފާހަގަކުރެއްވިއެވެ. މީގެ އިތުރުން، އުޟްހިޔާ ކަތިލަން ގަސްތުކުރާ މީހުން، ޒުލްހިއްޖާ މަސް ފެށިގެން އުޟްހިޔާ ކަތިލައި ނިމެންދެން އިސްތަށި ކެނޑުމާއި، ނިޔަފަތި ކެނޑުމާއި އަދި ހަންގަނޑުން ބައެއް އުނިކުރުމުން ދުރުހެލިވުމަށް މުފްތީ ހަނދާންކޮށްދެއްވިއެވެ.
