ޤައުމުގެ އަސްކަރިއްޔާގެ ޙާލަތު ސިފައިންގެ އެންމެ މަތީ ވެރިޔާއަށް ނޭނގުން: ބޮޑު ޖޯކެއްނޫންތޯ؟

"ރައީސްގެ ލަފާފުޅާ އިރުޝާދުގެ ދަށުން" މިއީ މި ސަރުކާރު ވެރިކަމަށް އައި ފަހުން އެންމެ ގިނައިން ސަރުކާރުގެ ވަޒީރުންނާއި، ކުންފުނިތަކުގެ ވެރިންނާއި، ދައުލަތުގެ މަޤާމުތަކުގައި ތިއްބަވާ ބޭފުޅުން ވިދާޅުވާ އެއް ބަހަކަށްވާނެއެވެ. ސަރުކާރުގެ ނޫސްވެރިންގެ ބައްދަލުވުމެއްގައި މި ބަސް އަޑުނީވި ދިއުމަކީ ނާދިރުކަމެކޭ ބުންޏަސް ދޮގަކަށް ނުވާނެއެވެ. ރައީސްގެ ލަފާފުޅާއި އިރުޝާދުގެ ދަށުން މެނުވީ ވަޒީރުންނާއި މުއައްސަސާތަކަށް އުއްޑުން އޮންނަ ނާށި ބަންޑުންވެސް ޖަހާލެވޭކަމަކަށް ނުވެއެވެ.

ކަންއެހެން ހުއްޓާ ސަރުކާރުގެ ތަރުޖަމާނު މި ދެއްކެވި ވާހަކަފުޅަކާއެކު، ދިވެހި ރައްޔިތުންނަށް އިވިގެން މިދިޔައީ ކަންބޮޑުވާން ޖެހޭ ވަރުގެ ވާހަކަތަކެކެވެ. ހޮނިހިރު ދުވަހު އޮތް ނޫސްވެރިންގެ ބައްދަލުވުމުގައި ތަރުޖަމާނު ވިދާޅުވެފައިވަނީ ޑައިވަރުން ހޯދުމަށް ކުރަމުންގެންދިޔަ މަސައްކަތުގެ އަދާހަމަ އެ ސަރަޙައްދަށް ވަޑައިގެން ރައީސް ޑރ. މުޙައްމަދު މުއިއްޒު އޮޅުންފިލުއްވިއިރު، ސިފައިންގެ އެފަދަ ޤާބިލުކަމެއް ނެތްކަން އެތަނުގައި ތިއްބެވި ސިފައިންގެ ބޭފުޅުން ރައީސާ ހިއްސާ ކުރައްވާފައި ނުވާކަމަށެވެ. އަދި ކުރެއްވިނަމަ އެކަންކަން ފެސިލިޓޭޓް ކޮށްދެއްވީސްކަމަށް މުންދު ވިދާޅުވިއެވެ.

އެހެންނަމަވެސް ރައީސަކީ ސިފައިންގެ އެންމެ މަތީ ވެރިޔާކަމަށްވާއިރު، ސިފައިންގެ ޤާބިލުކަމާއި މުހިއްމު ސިޔާސަތުތަކާ ގުޅޭ ކަންކަން ރައީސަށް އެނގިވަޑައި ނުގަންނަވަންވީ ކީއްވެތޯ ސުވާލު އުފެދެއެވެ. މިކަމާ ގުޅިގެން ނޫސްވެރިއަކު ސުވާލު ކުރުމުން މުންދު ވިދާޅުވީ، ރައީސަކީ ސިފައިންގެ ކޮމާންޑަރ އިން ޗީފް ކަމުގައިވީ ނަމަވެސް، ރައީސަކީ ސިފައިންނަށް ކަންކަމުގައި އެންގުންތައް އަންގަވާ ބޭފުޅެއް ނޫން ކަމަށެވެ.

ސިފައިންގެ ޤާނޫނުން ރައީސުލްޖުމްހޫރިއްޔާއަށް ސިފައިންގެ މައްޗަށް އަމުރުކުރުމުގެ ބާރު ލިބިދީފައި އޮތް ނަމަވެސް، އެފަދަ ނާޒުކު ޙާލަތެއްގައި ރައީސް އެ އަމުރު ނުކުރައްވަންވީ ކީއްވެތޯ ސުވާލު ކުރުމުން މުންދު ވަނީ އެކަމަށް ސީދާ ޖަވާބެއް ދެއްވުމުގެ ބަދަލުގައި ކުރީ ސަރުކާރުތަކުގައި ކަންކަން ހިނގާފައިވާ ގޮތާ ގުޅޭގޮތުން ވާހަކަ ދައްކަވާފައެވެ. އޭނާ ވިދާޅުވީ ޤާނޫނުން ބާރު ލިބިދީފައި އޮތް ނަމަވެސް ރައީސް އެގޮތަށް އަމުރު ނުކުރައްވާނެ ކަމަށެވެ.

ގެއްލުނު ފީނުންތެރިން ހޯދުމުގެ އޮޕަރޭޝަނާ ގުޅޭގޮތުން ސަރުކާރުން އެންމެ ފަހުން ދީފައިވާ ތަފްސީލުތަކުގެ ސަބަބުން، ހިނގައިދިޔަ ހާދިސާއަށްވުރެ މާ ބޮޑު އަދި މާ ނުރައްކާތެރި ސުވާލެއް މިވަނީ އުފެދިފައެވެ. ސިފައިންގެ އެންމެ މަތީ ވެރިޔާގެ ހައިސިއްޔަތުން، ކަނޑުމަތީގެ މިފަދަ މުހިންމު ހޯދުމުގެ އޮޕަރޭޝަނެއް ހިންގުމުގެ ގާބިލުކަން ދިވެހި އަސްކަރިއްޔާގައި ނެތްކަން ރައީސުލްޖުމްހޫރިއްޔާއަށް އެނގިވަޑައިގެންފައި ނުވާނަމަ، ގައުމުގެ ތައްޔާރީ ހާލަތު ބަލަހައްޓަނީ ސީދާ ކޮން ފަރާތަކުންތޯ މިއީ މިއަދު އުފެދޭ ސުވާލެކެވެ.

މައްސަލައަކީ ރައީސުލްޖުމްހޫރިއްޔާ ސީދާ އެ އޮޕަރޭޝަން ކޯޑިނޭޓް ކުރެއްވުން ނުވަތަ ނުކުރެއްވުމެއް ނޫނެވެ. މައްސަލައަކީ ގައުމީ ސަލާމަތާ ބެހޭ އެންމެ މަތީ ވެރިޔާގެ ހައިސިއްޔަތުން، އެމަނިކުފާނުގެ ކޮމާންޑުގެ ދަށުގައިވާ މުއައްސަސާގެ ވަސީލަތްތަކާއި، ނުކުޅެދުންތެރިކަމާއި، ހުރަސްތަކާއި އަދި ތައްޔާރީ ހާލަތު އެނގިވަޑައިގެންފައި ނެތްކަން ހާމަވެގެން ދިއުމެވެ.

ވަކިން ޚާއްޞަކޮށް ރާއްޖެ ފަދަ ވަށައިގެން ކަނޑު އޮތް ޤައުމެއްގައި ކަނޑުގެ ސިފައިންގެ ޤާބިލުކަމަކީ އަސްކަރިއްޔާގެ އެންމެ އަސާސީ އެއް ދާއިރާއެވެ. މިއީ ބޮޑު ކަނޑުގެ ސަރަހައްދަކަށް ފެތުރިފައިވާ ޖަޒީރާ ގައުމެކެވެ. ކަނޑުމަތީގައި މީހުން ހޯދުމާއި ސަލާމަތްކުރުމުގެ އޮޕަރޭޝަންތަކަކީ ދޭތެރެ ދޭތެރެއިން ހިންގަންޖެހޭ އޮޕަރޭޝަން ތަކެކެވެ.

ތަރުޖަމާނުގެ އެ ވާހަކަފުޅުން ރައްޔިތުންނަށް ގަބޫލުކުރަން މަޖުބޫރުވަނީ ދެ ހާލަތަކުން ކުރެ އެއް ހާލަތެކެވެ. އެއްގޮތަކީ، އަސްކަރިއްޔާގެ ތެރޭގައި އޮޕަރޭޝަނަލް ގޮތުން ހުރި ބޮޑު ނުކުޅެދުންތެރިކަމެއް ސިފައިންގެ އެންމެ މަތީ ވެރިޔާއަށް އެނގިވަޑައިގެންފައި ނެތުމެވެ. ނުވަތަ އަނެއްގޮތަކީ، ސަރުކާރާއި އަސްކަރިއްޔާއާ ދެމެދު މައުލޫމާތު ބަދަލުކުރާ ނިޒާމު ބަލިކަށިކަމުން، މިފަދަ މުހިންމު މައުލޫމާތެއް ގައުމުގެ އެންމެ މަތީ އޮފީހާ ހަމައަށް ފޯރާފައި ނުވުމެވެ.

މި ވާހަކަތަކާއެކު، ސަރުކާރުގެ އެހެން ހުރިހާ ކަމެއްގައި "ރައީސްގެ އިރުޝާދު" ބޭނުންވާ އިރު، ޤައުމީ ސަލާމަތާއި ރައްޔިތުންގެ ފުރާނައާ ގުޅުންހުރި ސިފައިންގެ މުހިއްމު ކަންކަމުގައި ރައީސްގެ ދައުރަކީ ކޮބައިތޯ މިހާރު ވަނީ ސުވާލު އުފެދިފައެވެ. ސިފައިންގެ އެންމެ މަތީ ވެރިޔާގެ ހައިސިއްޔަތުން މުއައްސަސާގެ ޤާބިލުކަން ހުރި މިންވަރު ރައީސަށް އެނގިވަޑައިނުގަތުމަކީ ދައުލަތް ހިންގުމުގެ ނިޒާމުގެ ތެރެއިން ފެނިގެންދިޔަ ބޮޑު އިހުމާލެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.