އީރާނާއި އެމެރިކާގެ މަޝްވަރާތަކުގައި ހޮރްމޫޒް ކަނޑުއޮޅި އާއި ޔޫރޭނިއަމް މައްސަލަ ބޮޑު ހުރަހަކަށް

އެމެރިކާ އާއި އިޒްރޭލުން އީރާނާ ދެކޮޅަށް ފެށި ހަނގުރާމަ ހުއްޓާލުމާ ގުޅޭގޮތުން ހުށަހަޅާފައިވާ ކަންކަމާ މަޝްވަރާކުރެއްވުމަށް، އީރާނުގެ ޚާރިޖީ ވަޒީރު ހުކުރު ދުވަހު ޕާކިސްތާނުގެ ދާޚިލީ ވަޒީރާ ބައްދަލުކުރައްވައިފި ކަމަށް އީރާނުގެ މީޑިއާތަކުން ރިޕޯޓްކޮށްފިއެވެ. މި ބައްދަލުވުން ބާއްވާފައި މިވަނީ އީރާނުގެ ޔުރޭނިއަމް ރައްކާކޮށްފައި ހުރި މިންވަރާއި، ހޮރްމޫޒް ކަނޑުއޮޅި ކޮންޓްރޯލް ކުރުމާ ގުޅޭގޮތުން ތެހެރާނާއި ވޮޝިންގޓަނާ ދެމެދު ބޮޑެތި ޚިޔާލުތަފާތުވުންތަކެއް ހުރި ދަނޑިވަޅެއްގައެވެ.

އެމެރިކާގެ އެންމެ ފަހުގެ މެސެޖު އީރާނަށް ފޯރުކޮށްދިންތާ ދެ ދުވަސް ފަހުން، ޕާކިސްތާނުގެ ދާޚިލީ ވަޒީރު ސައްޔިދު މުޙައްސިން ނަޤްވީ ވަނީ އީރާނުގެ ޚާރިޖީ ވަޒީރު އައްބާސް އަރާގްޗީއާ ތެހެރާނުގައި ބައްދަލުކުރައްވައި، މަޝްވަރާގެ އިތުރު ބުރެއް ކުރިއަށް ގެންދަވާފައި ކަމަށް އީރާނުގެ ތަސްނީމް އަދި އިސްނާ ނިއުސް އެޖެންސީން ރިޕޯޓްކޮށްފައިވެއެވެ.

އިސްނާ ނިއުސް އެޖެންސީން ރިޕޯޓްކޮށްފައިވާ ގޮތުގައި، މުޙައްސިން ނަޤްވީ މަސައްކަތް ކުރައްވަމުން ގެންދަވަނީ ދެ ގައުމުގެ ދެމެދުގައި މުއާމަލާތްތައް ފަސޭހަކޮށްދީ، ހަނގުރާމަ ނިމުމަކަށް ގެނައުމަށާއި ޚިޔާލުތަފާތުވުންތައް ހައްލުކުރުމަށް ބޭނުންވާ އޮނިގަނޑެއް އެކުލަވާލުމަށެވެ.

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ބުރާސްފަތި ދުވަހު ނޫސްވެރިންނަށް މައުލޫމާތު ދެއްވަމުން ވިދާޅުވީ، މަޝްވަރާތަކުން "އުންމީދީ ބައެއް ނިޝާންތައް" ފެންނަން ހުރި ނަމަވެސް، ހޮރްމޫޒް ކަނޑުއޮޅިން ދަތުރުކުރާ އުޅަނދުތަކުން ފީ ނެގުމުގެ ނިޒާމެއް ތެހެރާނުން ތަންފީޒުކުރާ ނަމަ އެއްވެސް ހައްލެއް ނުލިބޭނެ ކަމަށެވެ. ފެބްރުއަރީ 28 ގައި ހަނގުރާމަ ފެށުނު ފަހުން އީރާނުން ވަނީ ގިނަ އުޅަނދުފަހަރަށް އެ ކަނޑުއޮޅި ބަންދުކޮށްފައެވެ.

"އުންމީދީ ބައެއް ނިޝާންތައް އެބަހުރި،" ރޫބިއޯ ވިދާޅުވިއެވެ. "އަޅުގަނޑު ބޭނުމެއް ނޫން މާ ބޮޑަށް އުންމީދު އާކުރާކަށް. އެހެންވީމާ، ކުރިއަށް އޮތް ދުވަސްތަކުގައި ވާގޮތެއް ބަލަމާ ހިނގާ."

އީރާނުގެ އިސް މަސްދަރަކުން ބުރާސްފަތި ދުވަހު ރޮއިޓާސްއަށް މައުލޫމާތު ދިން ގޮތުގައި، ދެ ގައުމުގެ ދެމެދުގައި ހުރި ފަރަގުތައް މިހާރު ވަނީ ކުޑަވެފައެވެ. ނަމަވެސް ޔުރޭނިއަމް މުއްސަނދިކުރުމާއި، ހޮރްމޫޒް ކަނޑުއޮޅީގެ މައްސަލައަކީ އަދިވެސް އެއްބަސްވުމަކަށް އައުމަށް ހުރި އެންމެ ބޮޑު ހުރަސްތަކެވެ.

މި ހަނގުރާމައިގެ ސަބަބުން ދުނިޔޭގެ އިގްތިސާދަށް ބޮޑެތި ގެއްލުންތަކެއް ލިބެމުންދާއިރު، ތެލުގެ އަގު އުފުލުމުގެ ސަބަބުން އިންފްލޭޝަން ކޮންޓްރޯލުން ނެއްޓިދާނެ ކަމުގެ ބިރު ވަނީ ބޮޑުވެފައެވެ. ހަނގުރާމަ ފެށުމުގެ ކުރިން ދުނިޔޭގައި އުފައްދާ ތެލާއި ގުދުރަތީ ގޭހުގެ ފަސްބައިކުޅަ އެއްބައި އުޅަނދުފަހަރުގައި އުފުލަނީ ހޯރްމޫޒް ކަނޑުއޮޅި މެދުވެރިކޮށެވެ.

ސުލްހައިގެ މަޝްވަރާތަކާ މެދު އުފެދިފައިވާ ނުތަނަވަސްކަމާ ގުޅިގެން، ހުކުރު ދުވަހު އެމެރިކާ ޑޮލަރުގެ އަގު ވަނީ ފާއިތުވި ހަ ހަފުތާގެ ތެރޭގައި އުފުލުނު އެންމެ މަތީ މިންވަރާ ގާތްވެފައެވެ. އަދި މަޝްވަރާތަކުން ކުރިއެރުމެއް ލިބިދާނެ ކަމާމެދު އިންވެސްޓަރުން ޝައްކު އުފައްދަމުންދާތީ، ތެލުގެ އަގުތައް ވެސް ވަނީ މައްޗަށް ގޮސްފައެވެ.