ރައީސްގެ މެމްބަރު ޔަޒްމީދު ޖޭއެސްސީގެ ނައިބު ރައީސްކަމުން އިސްތިއުފާ ދެއްވައިފި
ޖޭއެސްސީގެ ނައިބު ރައީސް ޔަޒްމީދު މުހައްމަދު މަގާމުން އިސްތިއުފާ ދެއްވީ، އޭނާއާ ގުޅޭ ސުލޫކީ މައްސަލައެއް އެ ކޮމިޝަނުން ބަލަމުންދަނިކޮށް. އޭނާގެ މައްޗަށް ތުހުމަތު ކުރެވެނީ ޖިނާއީ މައްސަލައެއް ވަކި ގޮތަކަށް ނިންމުމަށާއި އިންތިޚާބެއްގައި ވަކި ބަޔަކަށް ވޯޓު ދިނުމަށް ބާރުއެޅި ކަމަށް ބުނާ އޯޑިއޯއެއްގެ މައްސަލަ. ޔަޒްމީދަކީ މީގެ ކުރިން އޭސީސީގެ މެންބަރުކަން ކުރައްވާފައިވާ، ނަމަވެސް ޝަރުއީ ދާއިރާގެ ތަޖުރިބާ ނެތް ބޭފުޅެއް.
ޖުޑީޝަލް ސާވިސް ކޮމިޝަންގެ މެންބަރަކަށް ޔަޒްމީދު މުހައްމަދު އައްޔަން ކުރުމަށް ބޭއްވި ރަސްމިއްޔާތުގެ ތެރެއިން - 23 ފެބްރުއަރީ 2025 | ރައީސް އޮފީސް
ޖުޑީޝަލް ސާވިސް ކޮމިޝަން (ޖޭއެސްސީ) ގެ ނައިބު ރައީސްގެ މަގާމުގައި ހުންނެވި ޔަޒްމީދު މުހައްމަދު އެ މަގާމުން އިސްތިއުފާ ދެއްވައިފި އެވެ.
ޔަޒްމީދަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ފަރާތްޕުޅުން އެ ކޮމިޝަނަށް އައްޔަންކުރައްވާފައިވާ މެންބަރެވެ.
ޔަޒްމީދު މަގާމުން އިސްތިއުފާ ދެއްވިކަން ކަށަވަރުވެފައިވީ ނަމަވެސް، އޭނާ އިސްތިއުފާ ދެއްވި ސީދާ ސަބަބެއް މިހާތަނަށް ރަސްމީކޮށް ހާމަކޮށްފައެއް ނުވެ އެވެ. ނަމަވެސް ޔަޒްމީދުގެ މައްޗަށް ތުހުމަތުކުރެވޭ ސުލޫކީ މައްސަލައެއް ޖޭއެސްސީން އައީ ބަލަމުންނެވެ. އެ މައްސަލައަކީ ވަކި ގޮތަކަށް ޖިނާއީ މައްސަލައެއް ނިންމުމަށާއި، ކައުންސިލް އިންތިހާބުގައި ވަކި ގޮތަކަށް ވޯޓު ދިނުމަށް އޭނާ އިރުޝާދުދޭ ކަމަށް ބުނާ އޯޑިއޯއަކާ ގުޅިގެން ބަލަން ފެށި މައްސަލައެކެވެ.
މި ފަހުން ސޯޝަލް މީޑިއާގައި ލީކުވެފައިވާ އެ އޯޑިއޯގައި، ލޯކަލް ކައުންސިލް އިންތިހާބުގައި ޕީއެންސީއަށް ވޯޓު ނުދިނުމަށް އެދޭ އަޑާއި، މަސްތުވާތަކެތީގެ މައްސަލައެއްގައި ހައްޔަރުކޮށްފައިވާ ބަޔަކަށް ޕްރޮސެކިއުޓާ ޖެނެރަލްގެ އޮފީހާ ހަމައަށް މައްސަލަ ނުގޮސް ސަލާމަތްވެވިދާނެ ކަމަށް ބުނާ އަޑު އިވެ އެވެ. ޔަޒްމީދު އިސްތިއުފާ ދެއްވީ މި މައްސަލައިން ސަލާމަތްވުމަށް ކަމެއް ނުވަތަ ނޫން ކަމެއް އަދި ސާފެއް ނުވެ އެވެ.
ޔަޒްމީދު ޖޭއެސްސީގެ ނައިބު ރައީސްކަމަށް އިންތިހާބުކުރީ 23 އޮކްޓޫބަރު 2024 ގައެވެ. އެ މަގާމަށް އޭނާ އައްޔަންކުރީ އެ މަގާމުގައި ކުރިން ހުންނެވި ހައިކޯޓުގެ ފަނޑިޔާރު މުހައްމަދު ނިޔާޒު އިސްތިއުފާ ދެއްވުމާ ގުޅިގެންނެވެ. ޔަޒްމީދު އެ ކޮމިޝަނަށް ފުރަތަމަ އައްޔަންކުރެއްވީ މިދިޔަ އަހަރުގެ ފެބްރުއަރީ މަހު، ކުރިން އެ މަގާމުގައި ހުންނެވި ތަޖުރިބާކާރު ވަކީލު މުހައްމަދު ސަމީރު ވަކިކުރެއްވުމަށް ފަހުގައެވެ.
ޔަޒްމީދަކީ މީގެ ކުރިން ޕީޕީއެމް/ޕީއެންސީގެ ޓިކެޓުގައި ރައްޔިތުންގެ މަޖިލީހުގެ އިންތިހާބުގައި ވެސް ވާދަކުރައްވާފައިވާ ބޭފުޅެކެވެ. މީގެ އިތުރުން ކުރީގެ ރައީސް އަބްދުﷲ ޔާމީންގެ ވެރިކަމުގައި އޭނާ ވަނީ އެންޓި ކޮރަޕްޝަން ކޮމިޝަން (އޭސީސީ) ގެ މެންބަރުކަން ވެސް ކުރައްވާފައެވެ. ފާހަގަކޮށްލެވޭ ގޮތުގައި ޔަޒްމީދަކީ ޝަރުއީ ދާއިރާގެ އެއްވެސް ތަޖުރިބާއެއް ލިބިވަޑައިގެންފައިވާ ބޭފުޅެއް ނޫނެވެ.
ރައީސްގެ މެންބަރުގެ ގޮތުގައި ޔަޒްމީދު ޖޭއެސްސީއަށް އައްޔަންކުރެއްވި ދަނޑިވަޅަކީ ސުޕްރީމް ކޯޓުގެ ތިން ފަނޑިޔާރެއްގެ މައްސަލަ އެ ކޮމިޝަނުން ބަލަމުންދިޔަ ދަނޑިވަޅެއްކަން ވެސް ފާހަގަކޮށްލެވެ އެވެ.
